‘வாரி வாரி’ பாடல் மூலம் ரசிகர்களை கவர்ந்த பாப் நட்சத்திர பாடகி DHEE

சர்வதேச இசை மேடையில் தடம் பதிக்கும் தீ (Dhee)… ‘வாரி வாரி’ பாடலுடன் மீண்டும் ரசிகர்களை கவர்ந்தார்!

வோண்டாகர்ள், திவா சாவேஜ், எட் ஷீரன் உள்ளிட்ட உலகப் புகழ் பெற்ற இசைக் கலைஞர்களுடன் இணைந்து பணியாற்றிய பாப் நட்சத்திர பாடகி தீ (Dhee), தனது புதிய தனிப்பாடலான ‘வாரி வாரி’ (VARI VARI)யை வெளியிட்டு மீண்டும் கவனம் ஈர்த்துள்ளார்.

ஆஸ்திரேலியா-தமிழ் பாடகியும் பாடலாசிரியருமான தீ, உலகளாவிய இசை ரசிகர்களிடையே தனக்கென ஒரு இடத்தை உருவாக்கியவர். “Ancient Seed”, “Don’t Look Down” போன்ற சர்வதேச பாடல்களில் இணைந்து பணியாற்றிய அனுபவத்துடன், தற்போது அவர் வெளியிட்டுள்ள ‘வாரி வாரி’ பாடல் உணர்ச்சியும் கவித்துவமும் கலந்த ஒன்றாக அமைந்துள்ளது.

இந்தப் பாடலுக்கு இசையமைப்பாளர் சந்தோஷ் நாராயணன் இசையமைத்துள்ளதுடன், கவிஞர் விவேக் வரிகளை எழுதியுள்ளார். விஸ்வா ரெக்கார்ட்ஸ் (Visva Records US) நிறுவனத்துடன் இணைந்து வெளியாகியுள்ள இந்த பாடல், தீயின் குரலின் ஆழத்தையும் உணர்ச்சி வெளிப்பாட்டையும் மையமாகக் கொண்டுள்ளது.

பாடல் குறித்து தீ கூறுகையில், “இது நம்மை விட்டு பிரிந்துபோன ஒருவரையோ அல்லது ஒரு உணர்வையோ பற்றியது. வழியில் நாம் இழந்த நம்மையே தேடி, அந்த உணர்வை மீண்டும் பெற முயற்சிக்கும் ஒரு பயணமாக இந்தப் பாடல் அமைகிறது” என தெரிவித்துள்ளார்.

‘வாரி வாரி’ ஒரு மென்மையான காதல் பாடலாக இருந்தாலும், அது காதலைத் தாண்டி மனித உறவுகளின் ஆழத்தையும் நெகிழ்ச்சியையும் பதிவு செய்கிறது. கைத்தட்டல்கள், கிட்டார் இசை மற்றும் நாட்டுப்புற நுணுக்கங்கள் இணைந்த இசை அமைப்பு, பாடலின் உணர்வை மேலும் செழுமைப்படுத்துகிறது. தீயின் ஆத்மார்த்தமான குரல், கேட்பவரை ஒரு தனி உலகிற்குள் அழைத்து செல்லும் தன்மை கொண்டது.

பல்லவியில் வரும் ‘வாரி வாரி’ என்ற சொல் (இங்கே வா, என்னுடன் வா) நெருக்கத்திற்கும் மீண்டும் இணைவதற்குமான மென்மையான அழைப்பாக மாறுகிறது. கிராமப்புற தமிழ் மொழி மற்றும் நாட்டுப்புற உணர்வுகளில் வேரூன்றிய இந்த பாடல், ஒரே நேரத்தில் பாரம்பரியத்தையும் நவீனத்தையும் இணைக்கும் தன்மையைக் கொண்டுள்ளது.

தீயின் இசைப் பயணம் தொடர்ந்து வளர்ச்சியடைந்து வருகிறது. கொழும்பில் பிறந்து ஆஸ்திரேலியாவில் வளர்ந்த அவர், ‘மெட்ராஸ்’ படத்தின் ‘நான் நீ’ பாடல் மூலம் அறிமுகமானார். தொடர்ந்து ‘இறுதி சுற்று’, ‘காலா’ போன்ற படங்களில் பாடி கவனம் பெற்றார். குறிப்பாக ‘மாரி 2’ படத்தின் ‘Rowdy Baby’ பாடல் உலகளவில் பெரும் சாதனை படைத்து, தமிழ் இசையை சர்வதேச அளவில் எடுத்துச் சென்றது.

அதனைத் தொடர்ந்து ‘என்ஜாய் என்ஜாமி’ போன்ற பாடல்கள் மூலம் சர்வதேச ஸ்ட்ரீமிங் தளங்களில் தனது இடத்தை வலுப்படுத்திய தீ, தற்போது ‘வாரி வாரி’ மூலம் தமிழ் பாப் இசையின் எல்லைகளை மேலும் விரிவுபடுத்துகிறார்.

இசைக்கு அப்பாற்பட்ட கலாச்சார தளங்களிலும் தீ தனது தாக்கத்தை ஏற்படுத்தி வருகிறார். சமீபத்தில் H&M நிறுவனத்தின் உலகளாவிய ‘Red Stage’ பிரச்சாரத்தின் முகமாகவும் அவர் தேர்ந்தெடுக்கப்பட்டுள்ளார்.

‘வாரி வாரி’ பாடல் மூலம் பாரம்பரியம், உணர்வு மற்றும் நவீன இசை உருவாக்கம் ஆகியவற்றை ஒருங்கிணைத்து, உலகளாவிய தமிழ் இசைக்கு புதிய பரிமாணத்தை தீ (Dhee) வழங்கியுள்ளார். அவரது தனித்துவமான குரலும் நேர்மையான வெளிப்பாடும், சமகால தெற்காசிய இசையில் அவரை முன்னணி குரல்களில் ஒருவராக நிலைநிறுத்துகிறது.