கங்குவா பற்றி கவலை வேண்டாம்: இயக்குனர், தயாரிப்பாளருக்கு சூர்யா ஆறுதல்..

சுமார் 350 கோடி ரூபாய் பட்ஜெட்டில், பான் இந்தியா திரைப்படமாக பற்பல அவதாரம் தரித்து, மிகப்பெரிய எதிர்பார்ப்புகளுடன் வெளியான படம் கங்குவா என்பது தெரிந்ததே.

தற்போது, இப்படம் கடுமையாகவும் கரிசனமாகவும் இரண்டும் கலந்த கலவையான விமர்சனங்களால் வலைத்தளங்கள் திக்கு முக்காடிக் கொண்டிருக்கிறது. மேலும், பல ட்ரோல்களுக்கும் இப்படம் உள்ளானது.

இந்தியா முழுவதும் இப்படத்திற்கு விளம்பரம் செய்தனர். ஏகப்பட்ட மாநிலங்களுக்கு சென்று சூர்யா உட்பட படக்குழுவினர் அனைவரும் புரோமோட் செய்தனர். ரூபாய் 2000 கோடி வசூல் சாதனை புரியும் என தொடர்ந்து கூறி வந்தனர்.

ஆனால், கதை மற்றும் திரைக்கதையில் தெளிவு மற்றும் சுவாரஸ்யம் இல்லை என்றும், நடிகர்கள் அனைவரும் கத்திக்கொண்டே இருக்கின்றனர் என்றும் படம் பார்த்தவர்கள் கூறி வருகின்றனர்.

குறிப்பாக படத்தின் வெளியீட்டிற்கு முன்னால் படக்குழுவினர் படத்தை ஹைப் செய்து பேசியதை வைத்து பலரும் ட்ரோல் செய்தும் வருகின்றனர்.

இதெல்லாம் ஒருபக்கம் இருக்க, இப்படத்தில் இருக்கும் ஒரே ஒரு ஆறுதல் சூர்யாவின் அசத்தலான நடிப்பு. மிகவும் கடுமையாக உழைத்து உடம்பை கட்டுக்கோப்பாக வைத்துக்கொண்டது மட்டுமல்லாமல், தன் அசாதாரண நடிப்பை சூர்யா வெளிக்கொண்டு வந்துள்ளார் என ரசிகர்கள் பாராட்டி வருகின்றனர்.

இந்நிலையில், என்னதான் கங்குவா படத்திற்கு கலவையான விமர்சனங்கள் வந்தபோதும் இப்படத்தின் வசூல் மிகப்பெரிய அளவில் இருக்கின்றது என்றுதான் சொல்லவேண்டும். இப்படத்தின் முதல் நாள் வசூல் மட்டும் 40 கோடி வரை இருக்கும் என தகவல் வந்துள்ளது.

சூர்யாவின் திரைப்படங்களிலேயே முதல் நாளில் அதிக வசூல் செய்த படமாக கங்குவா அமைந்துள்ளது. இதைத்தொடர்ந்து, கங்குவா படத்திற்கு நெகட்டிவான விமர்சனங்கள் வந்த நிலையில், சூர்யா தயாரிப்பாளர் ஞானவேல் ராஜாவிற்கும் இயக்குனர் சிவாவிற்கும் போன் செய்துள்ளதாகவும்,

படத்திற்கு வரும் நெகட்டிவான விமர்சனங்களால் துவண்டுபோக வேண்டாம் என்றும், வசூல் நன்றாகவே இருப்பதால் கவலை வேண்டாம்’ என்றும் சூர்யா ஆறுதலாக பேசியதாக கோலிவுட் வட்டாரம் தெரிவிக்கிறது.

மேலும், இப்படத்தை மிகப்பிரம்மாண்டமாக உருவாக்கிய சிவாவிற்கும், அதனை உருவாக்க காரணமாக இருந்த தயாரிப்பாளர் ஞானவேல் ராஜாவையும் சூர்யா பாராட்டியதாகவும் கூறப்படுகிறது. கலெக்‌ஷன் ஆனா சந்தோஷம்.!