அனுபமாவுடன் சமந்தா நடிக்கும் ‘பரதா’ படம், சர்ச்சையில் சிக்குமோ?

படத்துக்கும் விளம்பரம் கிடைக்கும், படத்தைப் பேசி விவாதிப்போருக்கும் விளம்பரம் கிடைக்கும். இதெல்லாம் மாறாது. விஷயத்திற்கு வருவோம்..

‘பிரேமம்’ படம் மூலம் சினிமாவில் அறிமுகமான அனுபமா பரமேஸ்வரன். அப்பட வெற்றியின் மூலம் தமிழ், தெலுங்கு ஆகிய மொழிகளிலும் நடிக்க துவங்கினார். தமிழில் தனுஷ் உடன் ‘கொடி’ படத்தில் நடித்திருந்தார். தெலுங்கில், ‘கார்த்திகேயா – 2′ , ’18 பேஜஸ்’, ‘டில்லு ஸ்கொயர்’ ஆகிய படங்களில் நடித்திருக்கிறார்.

சமீபத்தில் அஸ்வத் மாரிமுத்து இயக்கத்தில் வெளியான ‘டிராகன்’ படத்தின் கீர்த்தி என்ற கதாபாத்திரத்தில் தான் வரவேற்பை பெற்றார். தற்போது இவர் ‘பரதா’ என்ற படத்தில் நடித்து வருகிறார். ஆனந்தா மீடியா பேனரில் விஜய் டான்கடா, ஸ்ரீனிவாசலு, ஸ்ரீதர் மகுவா ஆகியோர் இணைந்து இப்படத்தை தயாரிக்கின்றனர். பிரவீன் கந்த்ரேகுலா இந்தப் படத்தினை இயக்குகிறார்.

சமீபத்தில் இப்படத்தின் டீசர் வெளியானது. அந்த டீசரில் இரண்டு பெண்களுடன் பயணிக்கும் கிராமத்திய பெண்ணின் சாகசப் பயணத்தோடு கதை நகர்வதுபோல் உள்ளது. கிராமங்களில் பெண்கள் பர்தா அணிவது, அவர்களை அடிமைகளாக சித்தரிக்க ஆண்கள் கொண்டுவந்த வழக்கம் என கூறப்படுகிறது.

‘பரதா’ படத்திலும் பர்தா அணிவதை வழக்கமாகக் கொண்டிருக்கும் பெண்களின் நிலையை கதைக்கருவாகக் கொண்டு கதை நகர்கிறது. தெலுங்கு, தமிழ், மலையாளம் மொழிகளில் வெளியாகவுள்ள இந்தப் படத்தின் வெளியீட்டு தேதி விரைவில் அறிவிக்கப்படவுள்ளது.

இந்நிலையில், இப்படத்தில் கேமியோ ரோலில் நடிகை சமந்தா நடித்துள்ளதாக தகவல் வெளியாகி உள்ளது. இதனால் படத்தின் மீதான எதிர்பார்ப்பு அதிகரித்துள்ளது. ஏற்கனவே அனுபமா மற்றும் சமந்தா இணைந்து நடித்த ‘ அ ஆ’ படம் வரவேற்பை பெற்றது குறிப்பிடத்தக்கது.

இது குறித்து இணையவாசிகள் ‘பரதா’ படம் சர்ச்சையில் இருந்து தப்பிக்குமா? எனவும் பார்ப்போம் என்று தெரிவித்து வருகின்றனர்.