‘மொத ராத்திரி’ படத்தில் முதிர்ச்சியான கதாபாத்திரம் – அனிஷ்மா அனில்குமார் பேட்டி

‘சிறை’, ‘யூத்’ உள்ளிட்ட படங்களில் தனது நடிப்பால் கவனம் ஈர்த்துள்ள இளம் நடிகை அனிஷ்மா அனில்குமார், தற்போது வெளியாகவுள்ள ‘மொத ராத்திரி’ திரைப்படத்தில் வித்தியாசமான மற்றும் உணர்வுப்பூர்வமான கதாபாத்திரத்தில் நடித்துள்ளார்.

ஒரே மாதிரியான கதாபாத்திரங்களைத் தேர்வு செய்யாமல், மாறுபட்ட கதாபாத்திரங்கள் மூலம் தனது நடிப்புத் திறனை வெளிப்படுத்தி வரும் அனிஷ்மா, இப்படத்தில் ஒரு பெண்ணின் வாழ்க்கையில் ஏற்படும் முக்கியமான மாற்றத்தை மையமாகக் கொண்ட கதாபாத்திரத்தில் நடித்துள்ளார்.

தனது கதாபாத்திரம் குறித்து அனிஷ்மா அனில்குமார் கூறுகையில், “மொத ராத்திரி படத்தில் எனது கதாபாத்திரத்தின் உணர்வுப்பூர்வமான தன்மைதான் என்னை மிகவும் கவர்ந்தது. தனக்குள் பல எண்ணங்களையும் உணர்வுகளையும் சுமந்திருந்தாலும், அவற்றை வெளிப்படையாகச் சொல்ல முடியாத பெண்ணாக அவர் இருக்கிறார். இப்படிப்பட்ட கதாபாத்திரத்தில் நடிப்பதில் ஒரு அழகு இருப்பதாக உணர்ந்தேன்.

குறிப்பாக, பெண்கள் ஒரே நேரத்தில் பல்வேறு உணர்வுகளை அனுபவிப்பார்கள். அதிலும் முற்றிலும் புதிதான சூழ்நிலையில் இருக்கும்போது அந்த உணர்வுகள் இன்னும் அதிகமாகும். அதனால், வழக்கமான கதாநாயகியாக இல்லாமல், அந்தக் கதாபாத்திரத்தை உண்மைத்தன்மையுடன் அணுக விரும்பினேன்” என்றார்.

மேலும் அவர், “ஒரு நடிகையாக என்னுடைய முதிர்ச்சியான பக்கத்தை வெளிப்படுத்த இந்தப் படம் வாய்ப்பளித்துள்ளது. கதையில் நகைச்சுவை மற்றும் பொழுதுபோக்கு அம்சங்கள் இருந்தாலும், அந்தச் சூழ்நிலைகளுக்குள் மிகவும் உண்மையான உணர்வுகளும் இருக்கின்றன.

ஒரு பெண் தனது வாழ்க்கையின் புதிய கட்டத்திற்குள் நுழையும்போது ஏற்படும் எதிர்பார்ப்பு, பதற்றம் மற்றும் பல்வேறு சந்தேகங்களை இந்தக் கதாபாத்திரம் பிரதிபலிக்கிறது. இந்த வாய்ப்பை வழங்கிய இயக்குநர் ராஜா கருப்பசாமிக்கும், தயாரிப்பாளர்களுக்கும் நன்றி. கதாநாயகன் ரிஷிகாந்தும் சிறப்பாக நடித்துள்ளார். எங்களது கதாபாத்திரங்களுடன் பார்வையாளர்கள் தங்களை நிச்சயம் தொடர்புபடுத்திப் பார்ப்பார்கள் என நம்புகிறேன்” என்றார்.

நகைச்சுவையான சூழ்நிலைகளில் இடம்பெறும் கதாபாத்திரமாக மட்டுமே இல்லாமல், ஒரு பெண்ணின் வாழ்க்கையில் ஏற்படும் முக்கியமான மாற்றத்தின்போது உருவாகும் அமைதியான, ஆழமான உணர்வுகளை வெளிப்படுத்தும் கதாபாத்திரமாகவும் அனிஷ்மாவின் பாத்திரம் உருவாக்கப்பட்டுள்ளது.

ரிஷிகாந்த் மற்றும் அனிஷ்மா அனில்குமார் முன்னணி கதாபாத்திரங்களில் நடித்துள்ள இப்படத்தில் சேத்தன், ஏ. வெங்கடேஷ், பகவதி பெருமாள், அப்துல் லீ, ஷெல்லி கிஷோர், சங்கீதா பாலன், பானுப்ரியா, சுமித்ரா தேவி, வர்ஷினி கார்மேகம், கார்த்திகேயன், வேலன், கௌஷிக் கபிலன் உள்ளிட்ட பலர் நடித்துள்ளனர்.

பரத் சங்கர் இசையமைக்க, சுரேந்திரன் பரஞ்சோதி ஒளிப்பதிவு செய்துள்ளார். அசோக் அர்ஜுனன் படத்தொகுப்பையும், பூர்ணிமா ராமசாமி ஆடை வடிவமைப்பையும், ஏ. பாலுமகேந்திரா கலை இயக்கத்தையும் கவனித்துள்ளனர்.

அறிமுக இயக்குநர் ராஜா கருப்பசாமி இயக்கியுள்ள ‘மொத ராத்திரி’ படத்தை மைத்ரி மூவி மேக்கர்ஸ் சார்பில் நவீன் யெர்னேனி மற்றும் ஒய். ரவி சங்கர் தயாரித்துள்ளனர். இப்படம் ஆகஸ்ட் 21, 2026 அன்று உலகம் முழுவதும் திரையரங்குகளில் வெளியாகிறது.