விஜய் சேதுபதியின் ‘பத்தா’ படத்தின் முதல் சிங்கிள் ‘மகளே’ வெளியானது!

மக்கள் செல்வன் விஜய் சேதுபதி நடிப்பில், இயக்குநர் பாலாஜி தரணிதரன் இயக்கத்தில் உருவாகியுள்ள திரைப்படம் ‘பத்தா’. இப்படத்தின் முதல் சிங்கிளான ‘மகளே’ பாடல் வெளியாகி ரசிகர்களின் கவனத்தை ஈர்த்து வருகிறது.

சாய் அப்யங்கர் இசையமைத்து பாடியுள்ள இப்பாடலுக்கு கவிஞர் கார்த்திக் நேதா வரிகள் எழுதியுள்ளார். வழக்கமாக துள்ளலான பாடல்களால் ரசிகர்களை கவர்ந்து வரும் சாய் அப்யங்கர், இந்தப் பாடலில் மென்மையான மெலடி பாணியை கையாண்டுள்ளார்.

ஒரு தந்தை தனது மகளிடம் அன்புடன் பேசுவது போன்ற உணர்வில் உருவாகியுள்ள ‘மகளே’, தந்தை–மகள் பாசத்தை மையமாகக் கொண்ட பாடலாக அமைந்துள்ளது. குறிப்பாக, 80-களின் இசை உலகை நினைவுபடுத்தும் வகையில் பாடலின் வீடியோ உருவாக்கப்பட்டுள்ளது. பழைய கால இசைக்கூடம் மற்றும் அக்கால ரெக்கார்டிங் முறைகள் உள்ளிட்ட காட்சிகள் இதில் இடம்பெற்றுள்ளன.

மேலும், பாடல் வீடியோவில் சாய் அப்யங்கர் இசையமைப்பாளராகவும் பாடகராகவும் தோன்றியிருப்பது ரசிகர்களின் கவனத்தை பெற்றுள்ளது.

விஜய் சேதுபதி – பாலாஜி தரணிதரன் கூட்டணியில் உருவாகியுள்ள ‘பத்தா’ திரைப்படம் அக்டோபர் 1ஆம் தேதி உலகம் முழுவதும் திரையரங்குகளில் வெளியாக உள்ளது.