11 ஆண்டுகளுக்குப் பிறகு மீண்டும் இணையும் நிவின் பாலி – அல்போன்ஸ் புத்திரன் கூட்டணி… ‘விஜயம்’ என பெயரிடப்பட்ட Nivin Pauly 50!
திரையுலக ரசிகர்கள் நீண்ட நாட்களாக ஆவலுடன் எதிர்பார்த்திருந்த அறிவிப்பு தற்போது அதிகாரப்பூர்வமாக வெளியாகியுள்ளது. 11 ஆண்டுகளுக்குப் பிறகு, பிளாக்பஸ்டர் கூட்டணியான நிவின் பாலி மற்றும் இயக்குநர் அல்போன்ஸ் புத்திரன் மீண்டும் இணையும் புதிய திரைப்படத்திற்கு ‘விஜயம்’ எனப் பெயரிடப்பட்டுள்ளது.
‘நேரம்’ மற்றும் ‘பிரேமம்’ ஆகிய வெற்றிப்படங்களுக்குப் பிறகு மீண்டும் இணையும் இந்த கூட்டணி, ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது.
மேலும், நிவின் பாலியின் 50-ஆவது திரைப்படமாக உருவாகும் ‘விஜயம்’, அவரது திரைப்பயணத்தில் ஒரு முக்கிய மைல்கல்லாக அமையவுள்ளது. படத்தின் தலைப்பு மற்றும் அறிமுக வீடியோ, எர்ணாகுளத்தில் உள்ள பத்மா திரையரங்கில், ரசிகர்கள் மற்றும் ஊடகத்தினர் முன்னிலையில் நடைபெற்ற விழாவில் வெளியிடப்பட்டது.
ரேசிங் உலகத்தை பின்னணியாகக் கொண்டு உருவாகும் இந்த திரைப்படத்திற்கு அல்போன்ஸ் புத்திரன் கதை எழுதி, இயக்கி, படத்தொகுப்பையும் மேற்கொள்கிறார்.
Pauly Jr. Pictures நிறுவனத்துடன் இணைந்து, Cineholics பேனரின் கீழ் டன்சன் டோனி மற்றும் சுனில் ராமடி தயாரிக்கும் இப்படத்தின் வடிவமைப்பு மற்றும் நிர்வாக தயாரிப்புப் பொறுப்பை குட்டு சிவானந்தன் கவனிக்கிறார்.
‘துரந்தர்’, ‘துரந்தர் 2’ மற்றும் ‘Bards of Bollywood’ உள்ளிட்ட படைப்புகளுக்கு இசையமைத்த கேரளாவைச் சேர்ந்த ஸ்டீவ் கோட்டூர், இந்தப் படத்தின் பின்னணி இசையை அமைக்கிறார்.
வெளியான தலைப்பு அறிவிப்பு வீடியோ, இயக்குநர் அல்போன்ஸ் புத்திரனை நகைச்சுவையாக கிண்டல் செய்யும் காட்சியுடன் தொடங்கி, பின்னர் அல்போன்ஸ் மற்றும் நிவின் பாலியின் திரைப்பயணத்தை சுவாரஸ்யமாக நினைவுகூரும் வகையில் வடிவமைக்கப்பட்டுள்ளது. இந்த வீடியோ சமூக வலைதளங்களில் ரசிகர்களின் பெரும் வரவேற்பைப் பெற்று வைரலாகி வருகிறது.
வெற்றிகரமான கூட்டணி மீண்டும் இணைவதும், நிவின் பாலியின் 50-ஆவது திரைப்படமாக உருவாகுவதும் காரணமாக, ‘விஜயம்’ திரைப்படத்தின் மீதான எதிர்பார்ப்பு நாளுக்கு நாள் அதிகரித்து வருகிறது.
படத்தின் மற்ற நடிகர்கள் மற்றும் தொழில்நுட்பக் கலைஞர்கள் குறித்த அறிவிப்புகள் விரைவில் வெளியாகும் என்று படக்குழு தெரிவித்துள்ளது.