எம்.ஜி. ஸ்டூடியோஸ் ஏ.பி.வி. மாறன், கணேஷ் கே. பாபு மற்றும் ஃபைவ் ஸ்டார் கிரியேஷன்ஸ் கே. செந்தில் தயாரிப்பில், அறிமுக இயக்குநர் கல்யாண் கே. ஜெகன் இயக்கத்தில் உருவாகியுள்ள சைக்காலஜிக்கல் ஹாரர் திரில்லர் திரைப்படம் ‘டார்க்’. இந்தப் படத்தின் முன்னோட்ட (டிரைலர்) வெளியீட்டு விழா சென்னையில் கோலாகலமாக நடைபெற்றது.
‘டாடா’ படத்தின் இயக்குநர் கணேஷ் கே. பாபு கதை எழுதியுள்ள இப்படத்தில் அஜய் கார்த்தி, அஞ்சனா நேத்ரன், நட்டி நட்ராஜ், கே. பாக்யராஜ், விடிவி கணேஷ் உள்ளிட்ட பலர் நடித்துள்ளனர். மனு ரமேசன் இசையமைத்துள்ள இப்படத்திற்கு ரவி சக்தி ஒளிப்பதிவு செய்துள்ளார். படம் விரைவில் திரையரங்குகளில் வெளியாக உள்ளது.
விழாவில் இயக்குநர்கள் பா. ரஞ்சித், கார்த்திக் யோகி, விக்னேஷ் கார்த்திக், நடிகர்கள் கௌதம் கார்த்திக், ரியோ, கலையரசன், தயாரிப்பாளர் டி. சிவா உள்ளிட்ட பலர் சிறப்பு விருந்தினர்களாக பங்கேற்றனர்.
“மலையாள தரத்தில் தமிழ் சினிமாவுக்கு ஒரு திரில்லர்”
பேசிய தயாரிப்பாளர் மணிமாறன், “‘டார்க்’ ஒரு வித்தியாசமான சைக்காலஜிக்கல் ஹாரர் திரில்லர். மலையாளம் மற்றும் வெளிநாட்டு மொழிகளில் வெளியாகும் தரமான திரில்லர்களுக்கு இணையாக இப்படம் இருக்கும். இந்த ஆண்டு தமிழ் சினிமாவுக்கு பல புதிய ஹீரோக்கள் கிடைக்கிறார்கள். அதில் முக்கியமான இடத்தை அஜய் கார்த்தி பிடிப்பார்” என்றார்.
மேலும், படத்தின் புரமோஷனுக்காக உருவாக்கப்பட்ட ஒரு பாடலை யுவன் சங்கர் ராஜா மற்றும் ஜி.வி. பிரகாஷ் பாடியுள்ளதாகவும், அதற்கு எஸ். தமன் இசையமைத்துள்ளதாகவும் தெரிவித்தார்.
“புதுமை இருந்தால்தான் ரசிகர்கள் வருகிறார்கள்”
தயாரிப்பாளர் டி. சிவா பேசுகையில், “இன்றைய ரசிகர்கள் புதிதாக என்ன இருக்கிறது என்பதையே தேடுகிறார்கள். டார்க் படத்தின் டிரைலர் வித்தியாசமாக இருந்தது. இந்தப் படம் ட்ரெண்ட் செட்டிங் படமாகவும், லாபகரமான படமாகவும் அமைய வேண்டும்” என வாழ்த்தினார்.
“சைக்காலஜிக்கல் திரில்லர்களுக்கு குடும்ப ரசிகர்களும் இருக்கிறார்கள்”
நடிகர் ரியோ, “பயந்து கொண்டு படம் பார்ப்பது குடும்ப ரசிகர்களுக்கும் பிடிக்கும். டிரைலரில் அந்த அம்சங்கள் இருந்தன. தமிழ் சினிமாவில் இதுபோன்ற படங்கள் அதிகம் வர வேண்டும். அந்த முயற்சியாக ‘டார்க்’ இருக்கும்” என்றார்.
“அஜய் கார்த்தி ஆச்சரியப்படுத்தியுள்ளார்”
நடிகர் நட்டி நட்ராஜ், “கணேஷ் பாபு இந்தக் கதையை சொன்னபோது, புதுமுகமான அஜய் இந்த கதாபாத்திரத்தை சுமப்பாரா என்ற சந்தேகம் இருந்தது. ஆனால் டப்பிங் நேரத்தில் பார்த்தபோது, அவர் மிகச் சிறப்பாக நடித்திருப்பதை உணர்ந்தேன்” என்று பாராட்டினார்.
“சின்ன படங்கள் வெற்றி பெறுவது அவசியம்”
இயக்குநர் பா. ரஞ்சித் பேசுகையில், “அஜய் கார்த்தியின் திரை இருப்பு மிகவும் வலுவாக இருக்கிறது. இயக்குநராக இருந்த கணேஷ் கே. பாபு, தற்போது தயாரிப்பாளராக மாறி புதிய இயக்குநர்களை அறிமுகப்படுத்துவது பாராட்டத்தக்கது. சின்ன பட்ஜெட் படங்கள் வெற்றி பெறுவது தமிழ் சினிமாவுக்கு மிகவும் அவசியம். மக்கள் மீது நம்பிக்கை வைத்து நல்ல படங்களை கொடுத்தால் வெற்றி நிச்சயம்” என்றார்.
“முதல் படத்திலேயே பெரிய நட்சத்திரங்களுடன் நடித்தது ஆசீர்வாதம்”
நாயகி அஞ்சனா நேத்ரன், “முதல் படத்திலேயே நட்டி நட்ராஜ், பாக்யராஜ் போன்ற மூத்த கலைஞர்களுடன் நடித்தது எனக்கு கிடைத்த ஆசீர்வாதம். அஜய் கார்த்தி மிகவும் எளிமையானவர், கடின உழைப்பாளர்” என்றார்.
“தமிழ் சினிமாவின் புதிய சாக்லேட் பாய்”
நடிகர் கௌதம் கார்த்திக் பேசுகையில், “டார்க் படத்தின் டிரைலர் மிகவும் இன்ட்ரஸ்டிங்காக இருந்தது. அஜய் கார்த்தி வேற லெவலில் நடித்திருக்கிறார். தமிழ் சினிமாவுக்கு ஒரு நல்ல நடிகர் கிடைத்திருக்கிறார். அவர் தமிழ் சினிமாவின் புதிய சாக்லேட் பாய்” என்று பாராட்டினார்.
“டார்க் எனக்கு ஒரு படம் அல்ல, ஒரு பாடம்”
நாயகன் அஜய் கார்த்தி, “சினிமாவை முறையாக கற்றுக்கொண்டதே இந்தப் படத்தின் படப்பிடிப்பில் தான். கணேஷ் கே. பாபு போன்ற வெற்றி இயக்குநர் ஒரு புதுமுகத்தை நம்பி இப்படத்தை தயாரித்தது பெரிய விஷயம். டார்க் ஒரு எக்ஸ்பிரிமென்டல் சைக்காலஜிக்கல் ஹாரர் திரில்லர். ரசிகர்களுக்கு புதிய அனுபவம் தரும் வகையில் உருவாக்கியுள்ளோம்” என்றார்.
“டாடா படத்துக்கான நன்றிக்கடன்தான் டார்க்”
கதை எழுத்தாளரும் தயாரிப்பாளருமான கணேஷ் கே. பாபு, தனது சினிமா பயணத்தை பகிர்ந்து கொண்டார். “13 வயதில் இயக்குநராக வேண்டும் என்று முடிவு செய்தேன். பல போராட்டங்களுக்குப் பிறகு ‘டாடா’ எனக்கு வெற்றியை கொடுத்தது. என்னுடன் பயணித்த நண்பர்களுக்காக தயாரித்த படம்தான் ‘டார்க்’. இது ‘டாடா’ படத்திற்கான நன்றிக்கடன்” என்றார்.
மேலும், “இந்தக் கதையை முதலில் தனுஷை மனதில் வைத்து எழுதினேன். ஆனால் அஜய் கார்த்தி அந்த கதாபாத்திரத்தை சிறப்பாக சுமந்திருக்கிறார். இது அவரது முதல் படம் என்று யாரும் நம்ப மாட்டார்கள்” என்று அவர் பாராட்டினார்.
விரைவில் திரைக்கு வரும் ‘டார்க்’
சைக்காலஜிக்கல் ஹாரர் திரில்லராக உருவாகியுள்ள ‘டார்க்’ திரைப்படம், வித்தியாசமான கதைக்களம் மற்றும் புதிய அனுபவத்தை தரும் திரைக்கதையுடன் விரைவில் திரையரங்குகளில் வெளியாக உள்ளது. ரசிகர்களிடையே ஏற்கனவே டிரைலர் நல்ல எதிர்பார்ப்பை உருவாக்கியுள்ளது.