ரன்பீர் கபூர், சாய் பல்லவி நடிக்கும் “ராமாயணா” படத்தின் 3வது பாடல் வெளியானது

நமித் மல்ஹோத்ரா தயாரிப்பில் உருவாகும் பிரம்மாண்ட திரைப்படமான ‘ராமாயணா’ படத்தின் இசைப் பயணத்தில் புதிய மைல்கல்லாக ‘மங்கள வண்ணமே’ பாடல் வெளியாகியுள்ளது. ராமர் – சீதையின் அன்பு, திருமணம் மற்றும் வாழ்க்கைப் பயணத்தை அழகிய காட்சிகளுடன் வெளிப்படுத்தும் இந்தப் பாடல் ரசிகர்களின் கவனத்தை ஈர்த்துள்ளது.

நிதேஷ் திவாரி இயக்கத்தில் உருவாகும் இப்படத்தில் ராமராக ரன்பீர் கபூரும், சீதையாக சாய் பல்லவியும் நடித்துள்ளனர். அரண்மனையின் பிரம்மாண்டம், ராமர் – சீதையின் திருமண நிகழ்வுகள், இயற்கை எழில் கொஞ்சும் காட்சிகள் எனப் பல அழகான தருணங்கள் ‘மங்கள வண்ணமே’ பாடலில் இடம்பெற்றுள்ளன.

திருமணத்தின் மகிழ்ச்சியையும் புனிதத்தையும் வெளிப்படுத்தும் காட்சிகளுடன், வனவாசப் பயணத்தில் ராமர் – சீதைக்கு இடையிலான அன்பு, நம்பிக்கை மற்றும் ஒற்றுமையையும் இந்தப் பாடல் எடுத்துரைக்கிறது. அரண்மனையின் ஆடம்பரத்திலிருந்து விலகி, கடமை மற்றும் நம்பிக்கையை அடிப்படையாகக் கொண்ட வாழ்க்கையை இருவரும் தொடங்கும் காட்சிகள் பாடலுக்கு மேலும் உணர்வுபூர்வமான அழகைச் சேர்க்கின்றன.

ஏ.ஆர். ரஹ்மான் இசையமைத்துள்ள இப்பாடலுக்கு இந்திப் பாடல் வரிகளை டாக்டர் குமார் விஸ்வாஸ் எழுதியுள்ளார். இந்திப் பதிப்பில் அரிஜித் சிங் மற்றும் ஷ்ரேயா கோஷல் பாடியுள்ளனர். தமிழ்ப் பதிப்பில் அபய் ஜோத்புர்கர் மற்றும் சைந்தவி குரல் கொடுத்துள்ளனர். தமிழ்ப் பாடல் வரிகளை கார்த்திக் நேதா எழுதியுள்ளார்.

இந்தி, தமிழ், தெலுங்கு, கன்னடம், மலையாளம் ஆகிய ஐந்து மொழிகளில் ஒரே நேரத்தில் வெளியாகியுள்ள ‘மங்கள வண்ணமே’ பாடலை, வேர்ல்ட் ஆஃப் ராமாயணா மற்றும் டி-சீரிஸ் நிறுவனங்களின் அதிகாரப்பூர்வ யூடியூப் சேனல்களில் காணலாம். மேலும், அனைத்து முக்கிய இசை ஸ்ட்ரீமிங் தளங்களிலும் இப்பாடல் வெளியாகியுள்ளது.

ஏ.ஆர். ரஹ்மான் பகிர்ந்த அனுபவம்

‘ராமாயணா’ திரைப்படத்திற்கு இசையமைத்த அனுபவம் குறித்துப் பேசிய ஏ.ஆர். ரஹ்மான், பல தலைமுறைகளாக மக்களின் மனதில் இடம்பெற்றுள்ள இதிகாசத்தை இசையின் வழியாக அணுகுவது தனக்குச் சிறப்பான அனுபவம் என்று தெரிவித்துள்ளார்.

மேலும், ராமர் – சீதையின் உறவில் உள்ள தூய்மையான அன்பையும் பக்தியையும் இசையின் மூலம் வெளிப்படுத்த விரும்பியதாகக் குறிப்பிட்ட அவர், ‘மங்கள வண்ணமே’ பாடலைக் கேட்பவர்கள் அதில் தங்களுக்கான தனிப்பட்ட உணர்வைக் கண்டடைவார்கள் என்றும் நம்பிக்கை தெரிவித்துள்ளார்.

- Advertisement -

பாடகர் அபய் ஜோத்புர்கரும், பல தலைமுறைகளாக இந்தியக் கலாசாரத்தில் கலந்துள்ள ‘ராமாயணா’ இதிகாசத்தின் ஒரு பகுதியாக அமைந்துள்ள இப்பாடலைப் பாடியது மகிழ்ச்சியளிப்பதாகத் தெரிவித்துள்ளார். ராமர் – சீதையின் உறவில் உள்ள நேர்மையையும் உண்மையான அன்பையும் தனது குரல் மூலம் வெளிப்படுத்த முயன்றதாகவும் கூறியுள்ளார்.

பாடலாசிரியர் டாக்டர் குமார் விஸ்வாஸ், ராமர் – சீதையின் தெய்வீகத் திருமணத்தை வார்த்தைகளில் வடிப்பது சவாலான அனுபவமாக இருந்ததாகப் பகிர்ந்துள்ளார். அவர்களது பந்தம் பல பிறவிகளைக் கடந்தது என்றும், சூரிய வம்சத்தில் அவதரித்த ராமருக்கும் பூமித்தாயின் மடியில் தோன்றிய சீதைக்கும் இடையிலான இணைவு வாழ்க்கையின் தொடர்ச்சியையும் நிலைத்தன்மையையும் குறிக்கிறது என்றும் அவர் விளக்கியுள்ளார்.

பிரம்மாண்டமாக உருவாகும் ‘ராமாயணா’

நிதேஷ் திவாரி இயக்கத்தில் உருவாகும் இப்படத்தில் ராமராக ரன்பீர் கபூர், சீதையாக சாய் பல்லவி, ராவணனாக யஷ், அனுமனாக சன்னி தியோல், லட்சுமணனாக ரவி துபே ஆகியோர் நடித்துள்ளனர்.

நமித் மல்ஹோத்ராவின் பிரைம் ஃபோகஸ் ஸ்டுடியோஸ் நிறுவனம், எட்டு ஆஸ்கர் விருதுகளை வென்ற டிஎன்இஜி நிறுவனத்துடன் இணைந்து இப்படத்தைத் தயாரித்துள்ளது. யஷ்ஷின் மான்ஸ்டர் மைண்ட் கிரியேஷன்ஸ் நிறுவனமும் தயாரிப்பில் பங்கேற்றுள்ளது.

இரண்டு பாகங்களாக உருவாகும் ‘ராமாயணா’ திரைப்படத்தின் முதல் பாகம் நவம்பர் 5ஆம் தேதியும், இரண்டாம் பாகம் 2027ஆம் ஆண்டு தீபாவளியன்றும் வெளியாகும் என அறிவிக்கப்பட்டுள்ளது. இந்தி, தமிழ், தெலுங்கு, கன்னடம், மலையாளம் ஆகிய மொழிகளில் வெளியாகவுள்ள இப்படம், ஐமேக்ஸ் தொழில்நுட்பத்திலும் திரையிடப்படவுள்ளது.

இந்தியாவுக்கு வெளியேயான உலகளாவிய விநியோக உரிமையை சோனி பிக்சர்ஸ் நிறுவனம் பெற்றுள்ளது. இந்தி பேசும் சந்தையில் தர்மா புரொடக்‌ஷன்ஸ் நிறுவனம் படத்தை விநியோகிக்கிறது. படத்தின் பாடல்களை டி-சீரிஸ் நிறுவனம் வெளியிட்டு வருகிறது.

‘மங்கள வண்ணமே’ பாடல் வெளியானதைத் தொடர்ந்து, ‘ராமாயணா’ திரைப்படத்தின் அடுத்தடுத்த பாடல்கள் மற்றும் முன்னோட்டங்கள் குறித்த எதிர்பார்ப்பு ரசிகர்கள் மத்தியில் அதிகரித்துள்ளது.

Ramayanaranbir kapoorSai PallaviThird Song from Ranbir Kapoor and Sai Pallavi’s Ramayana Released