வாழ்க்கையில் எப்போதும் One More கேளுங்கள்! – மாணவர்களுக்கு சூர்யா ஊக்கம்

ஸ்ரீ சிவகுமார் கல்வி அறக்கட்டளையின் 47-வது ஆண்டு விழா! ஓவியர் ஜீவானந்தனுக்கு ரூ.1 லட்சம் விருது; மாணவர்கள், கல்வி அமைப்புகளுக்கு ரூ.13.78 லட்சம் நிதியுதவி!

சென்னை தியாகராயா நகரில் உள்ள அகரம் ஃபவுண்டேஷன் அலுவலகத்தில் ஸ்ரீ சிவகுமார் கல்வி அறக்கட்டளையின் 47-வது ஆண்டு விழா நடைபெற்றது. இவ்விழாவில், பிளஸ் டூ முடித்து கல்லூரியில் சேர்ந்துள்ள 25 மாணவ, மாணவியருக்குக் கல்வி ஊக்கத்தொகை வழங்கப்பட்டது. மேலும், மூத்த ஓவியர் ஜீவானந்தனுக்கு ரூ.1 லட்சம் பரிசுத்தொகையுடன் விருது வழங்கி கௌரவிக்கப்பட்டதுடன், விளிம்புநிலை மக்களின் கல்வி மேம்பாட்டிற்காகச் செயல்பட்டு வரும் மூன்று அமைப்புகளுக்கும் நிதியுதவி அளிக்கப்பட்டது.

47 ஆண்டுகளாகத் தொடரும் கல்விச் சேவை!

கடந்த 1979-ஆம் ஆண்டு, தனது 100-வது திரைப்படமான ‘ரோசாப்பூ ரவிக்கைக்காரி’ படத்திற்காகப் பெற்ற ரூ.25,000 முழுச் சம்பளத்தையும் வங்கியில் முதலீடு செய்து, அதன் வட்டித் தொகையின் மூலம் மாணவர்களுக்கு உதவ வேண்டும் என்ற நோக்கில் நடிகர் சிவகுமார் இந்த அறக்கட்டளையைத் தொடங்கினார். ஆரம்பத்தில் மாணவர்களுக்குப் பரிசுகள் வழங்கப்பட்டு வந்த நிலையில், பின்னர் கல்வி உதவித்தொகைகளும் வழங்கப்பட்டன.

2006-ஆம் ஆண்டு முதல் அகரம் ஃபவுண்டேஷன் இந்த அறக்கட்டளையின் பொறுப்பை முழுமையாக ஏற்று, ஆண்டுதோறும் கல்வி உதவித்தொகைகளையும் விருதுகளையும் வழங்கி வருகிறது. இதன் தொடர்ச்சியாக நடைபெற்ற 47-வது ஆண்டு விழாவில், கல்வி மற்றும் கலைத்துறையில் சிறந்து விளங்குபவர்களைக் கௌரவிக்கும் வகையில் பல்வேறு உதவிகள் வழங்கப்பட்டன.

ஓவியர் ஜீவானந்தனுக்கு ரூ.1 லட்சம் விருது!

கல்வியில் சிறந்து விளங்கும் மாணவர்களை ஊக்குவிப்பதோடு, ஓவியத் துறையில் நீண்டகாலப் பங்களிப்பை வழங்கிய மூத்த கலைஞர்களைக் கௌரவிக்கும் வகையில், ஆண்டுதோறும் ரூ.1 லட்சம் பரிசுத்தொகையுடன் சிவகுமார் கல்வி அறக்கட்டளை விருது வழங்கப்பட்டு வருகிறது.

இதற்கு முன்பு ஓவியர்கள் அம்புலிமாமா சங்கர், ராமு, ஜெயராஜ், மாயா, மணியம் செல்வன் உள்ளிட்டோர் இந்த விருதைப் பெற்றுள்ளனர். இந்நிலையில், 47-வது ஆண்டு விழாவில் சிறந்த ஓவியரும் கலைத்துறையின் குறிப்பிடத்தக்க ஆளுமையுமான ஜீவானந்தனுக்கு ரூ.1 லட்சம் பொற்கிழியுடன் விருது வழங்கி கௌரவிக்கப்பட்டது.

25 மாணவர்களுக்குக் கல்வி ஊக்கத்தொகை!

பொருளாதாரச் சவால்களையும் பல்வேறு தடைகளையும் கடந்து, பிளஸ் டூ பொதுத்தேர்வில் சிறந்த மதிப்பெண்கள் பெற்று கல்லூரியில் சேர்ந்துள்ள 25 மாணவ, மாணவியருக்கு தலா ரூ.10,000 வீதம் மொத்தம் ரூ.2.50 லட்சம் கல்வி ஊக்கத்தொகையாக வழங்கப்பட்டது. மாணவர்களின் சாதனைகளைப் பாராட்டும் வகையில் அவர்களுக்குச் சான்றிதழ்களும் வழங்கப்பட்டன.

மூன்று கல்வி அமைப்புகளுக்கு ரூ.11.28 லட்சம் நிதியுதவி!

விளிம்புநிலை மாணவர்களின் கல்வி வளர்ச்சிக்காகச் செயல்பட்டு வரும் மூன்று அமைப்புகளின் பணிகளைப் பாராட்டி, அகரம் ஃபவுண்டேஷன் சார்பில் நிதியுதவி வழங்கப்பட்டது.

– தாய் தமிழ்ப் பள்ளி, திண்டிவனம்: தாய்மொழிக் கல்வி மற்றும் இலவசக் கல்வியுடன் மதிய உணவுத் திட்டத்தையும் வழங்கி வரும் இப்பள்ளியில் பணியாற்றும் ஆசிரியர்களின் சம்பளப் பங்களிப்பிற்காக, 2026–2027 கல்வியாண்டுக்கு ரூ.6.28 லட்சம் வழங்குவதற்கான உறுதிமொழிக் கடிதம் அளிக்கப்பட்டது. இப்பள்ளிக்கு அகரம் ஃபவுண்டேஷன் கடந்த 16 ஆண்டுகளாகத் துணைநின்று வருகிறது.

– சுடர் அமைப்பு, ஈரோடு: பழங்குடியினக் குழந்தைகளின் கல்வி மேம்பாட்டிற்காக கடந்த 20 ஆண்டுகளாகச் செயல்பட்டு வரும் இந்த அமைப்பு, சத்தியமங்கலம் மற்றும் பர்கூர் மலைப்பகுதிகளில் பள்ளி இடைநிற்றலைத் தடுக்கவும், மாணவர்களின் கற்றல் திறனை மேம்படுத்தவும் 25 மாலை நேரப் படிப்பகங்களை நடத்தி வருகிறது. இதற்காக ரூ.2 லட்சம் நிதியுதவி வழங்கப்பட்டது.

– வாழை அமைப்பு: அரசுப் பள்ளி மாணவர்களுக்கு வழிகாட்டுதல் வழங்கி வரும் இந்த அமைப்பு, கிருஷ்ணகிரி மாவட்டம் அய்யூர் வனப்பகுதியில் உள்ள ஏழு அரசு தொடக்க மற்றும் நடுநிலைப் பள்ளிகளில் ஆசிரியர்களை நியமித்து கல்வி மேம்பாட்டுப் பணிகளை மேற்கொண்டு வருகிறது. இந்தப் பணிகளுக்கு உதவும் வகையில் ஓராண்டிற்கான பங்களிப்பாக ரூ.3 லட்சம் வழங்குவதற்கான உறுதிமொழிக் கடிதம் அளிக்கப்பட்டது.

மாணவர்களுக்கு சிவகுமார் வழங்கிய அறிவுரை!

விழாவில் மாணவர்களைப் பாராட்டிப் பேசிய நடிகர் சிவகுமார், கல்வியும் ஒழுக்கமும் இருந்தால் உலகின் எந்த மூலைக்குச் சென்றாலும் சாதிக்க முடியும் என்று தெரிவித்தார். ஏழ்மையான குடும்பத்தில் பிறந்தவர்கள், பெற்றோரை இழந்தவர்கள் அல்லது கிராமப்புறங்களில் வளர்ந்தவர்கள் என யாராக இருந்தாலும், தங்களுடைய பின்னணியைப் பற்றிக் கவலைப்படாமல் கல்வியில் கவனம் செலுத்த வேண்டும் என்று அறிவுறுத்தினார்.

தனது சிறுவயது வாழ்க்கையையும் கல்விக்காகத் தாம் எதிர்கொண்ட சிரமங்களையும் நினைவுகூர்ந்த அவர், குடும்பத்தின் பொருளாதாரச் சூழலால் தனது சகோதரி மூன்றாம் வகுப்புடன் படிப்பை நிறுத்த வேண்டிய நிலை ஏற்பட்டதையும் பகிர்ந்துகொண்டார். கல்வி ஒருவரின் வாழ்க்கைத் தரத்தை உயர்த்தும் வலிமை கொண்டது என்பதைத் தனது அனுபவத்தின் மூலம் உணர்ந்துள்ளதாகக் குறிப்பிட்டார்.

மேலும், மாணவர்கள் தங்களுக்குக் கிடைத்துள்ள வாய்ப்புகளைச் சரியாகப் பயன்படுத்தி, இலக்கில் உறுதியாக இருந்து, ஒழுக்கத்துடன் தொடர்ந்து உழைக்க வேண்டும் என்றும் வலியுறுத்தினார்.

“வாழ்க்கையில் எப்போதும் ‘ஒன் மோர்’ கேளுங்கள்!” – சூர்யா

நிகழ்வில் பேசிய நடிகர் சூர்யா, சிவகுமார் கல்வி அறக்கட்டளையின் 47 ஆண்டுகாலப் பயணத்தை ஒரு குடும்ப நிகழ்வாகக் குறிப்பிட்டார். ஒவ்வொரு ஆண்டும் கல்வி உதவிபெறும் மாணவர்கள் தங்களது வாழ்க்கையில் எதிர்கொண்ட தடைகளைக் கடந்து சாதிப்பதைப் பார்க்கும்போது பெருமையாக இருப்பதாகத் தெரிவித்தார்.

அகரம் ஃபவுண்டேஷன் கடந்த 20 ஆண்டுகளில் முதல் தலைமுறை மாணவர்களின் குடும்பங்களைச் சேர்ந்த சுமார் 7,000 பேரைச் சென்றடைந்துள்ளதாகக் குறிப்பிட்ட அவர், கல்வி வாய்ப்புகள் கிடைக்காத மாணவர்களைத் தேடிச் சென்று அவர்களுக்கு உதவ வேண்டியதன் அவசியத்தையும் எடுத்துரைத்தார்.

தனது திரையுலக அனுபவங்களை மாணவர்களுடன் பகிர்ந்துகொண்ட சூர்யா, வாழ்க்கையில் தோல்விகள் ஏற்பட்டாலும் முயற்சியைக் கைவிடக் கூடாது என்பதை வலியுறுத்தினார். திரைப்படங்களில் ஒரு காட்சியைச் சிறப்பாக உருவாக்கப் பலமுறை மீண்டும் முயற்சி செய்வதைப் போல, வாழ்க்கையிலும் தொடர்ந்து முயற்சி செய்ய வேண்டும் என்றார்.

“ஒன் மோர்” (One More), “ரிஹர்சல்” (Rehearsal), “கிரெடிட்ஸ்” (Credits) ஆகிய மூன்று விஷயங்களை மாணவர்கள் நினைவில் வைத்துக்கொள்ள வேண்டும் என்று அறிவுறுத்தினார். தோல்வியை முடிவாகக் கருதாமல் மீண்டும் முயற்சி செய்வது, தொடர்ச்சியான பயிற்சியின் மூலம் திறமையை மேம்படுத்துவது, தங்களது வளர்ச்சிக்குத் துணைநின்றவர்களை ஒருபோதும் மறக்காமல் இருப்பது ஆகியவற்றின் முக்கியத்துவத்தை எடுத்துரைத்தார்.

மேலும், சமூகத்தில் முன்னேறியவர்கள் தங்களால் இயன்ற அளவுக்கு மற்றொருவரையும் உயர்த்துவதற்கு முயற்சி செய்ய வேண்டும் என்றும், சமூக வலைதளங்களில் நேரத்தைச் செலவிடுவதுடன் நின்றுவிடாமல், சாதனையாளர்களின் வாழ்க்கை மற்றும் அனுபவங்களையும் அறிந்துகொள்ள வேண்டும் என்றும் மாணவர்களிடம் கேட்டுக்கொண்டார்.

கல்வி வாய்ப்புகள் அனைவரையும் சென்றடைய வேண்டும் என்ற நோக்கத்துடன் நடைபெற்ற இந்த விழாவில், மாணவ, மாணவியர், கலைஞர்கள், அகரம் ஃபவுண்டேஷன் தன்னார்வலர்கள் மற்றும் சமூக ஆர்வலர்கள் உள்ளிட்ட பலர் கலந்துகொண்டனர்.