நடிகர் சிலம்பரசன் வெளியிட்ட ‘டெலிவரி பாய்’ டிரெய்லர்!

திண்டுக்கல் லியோனியின் மகன் லியோ சிவக்குமார் கதாநாயகனாக நடித்துள்ள ‘டெலிவரி பாய்’ திரைப்படத்தின் டிரைலரை நடிகர் சிலம்பரசன் TR இன்று வெளியிட்டுள்ளார். இயக்குநர் நானி எழுதி இயக்கியுள்ள இப்படத்தை Asasi Creations சார்பில் அமுதா லியோனி தயாரித்துள்ளார். வரும் அக்டோபர் 23ஆம் தேதி திரையரங்குகளில் வெளியாகவுள்ள இப்படத்தின் டிரைலர், ரசிகர்கள் மத்தியில் எதிர்பார்ப்பை அதிகரித்துள்ளது.

அம்மா – மகன் இடையேயான பாசத்தை மையமாகக் கொண்டு தொடங்கும் டிரைலர், அடுத்தடுத்த காட்சிகளில் எதிர்பாராத திருப்பங்களுடன் விறுவிறுப்பாக நகர்கிறது. சிறுவயது முதலே ஒன்றாக வளர்ந்து குற்றச் செயல்களில் ஈடுபடும் ஏழு பேரின் பின்னணியில், அவர்களிடம் சிக்கிக்கொள்ளும் கதாநாயகன் எதிர்கொள்ளும் பிரச்சினைகளும், அவை அவனது வாழ்க்கையில் ஏற்படுத்தும் மாற்றங்களும் சுவாரஸ்யமாகக் காட்சிப்படுத்தப்பட்டுள்ளன. குடும்ப உணர்வுகளுடன் குற்றச் சம்பவங்களும் இணைந்திருப்பது கதையின் மீதான ஆர்வத்தைத் தூண்டுகிறது.

குடும்பப் பாசம், காதல், ஆக்ஷன், காமெடி என அனைத்து தரப்பு ரசிகர்களையும் கவரும் வகையில் டிரைலர் அமைந்துள்ளது. உணர்வுபூர்வமான காட்சிகளுக்கு இடையே அதிரடியான சண்டைக் காட்சிகளும், காதல் தருணங்களும் நகைச்சுவைக் காட்சிகளும் இடம்பெற்றுள்ளன. ஒரு சாதாரண டெலிவரி பாயின் வாழ்க்கையில் ஏற்படும் எதிர்பாராத சம்பவங்கள் அவனை எந்தச் சூழலுக்குக் கொண்டு செல்கின்றன என்பதை அறிந்துகொள்ளும் ஆவலையும் டிரைலர் ஏற்படுத்துகிறது.

இப்படத்தில் லியோ சிவக்குமாருக்கு ஜோடியாக பிரிகிடா சாகா நடித்துள்ளார். நடிகை ராதிகா சரத்குமார், லியோ சிவக்குமாரின் தாயாக முக்கியக் கதாபாத்திரத்தில் நடித்துள்ளார். மேலும், காளி வெங்கட், போஸ் வெங்கட், ஜென்சன் திவாகர், துஷ்யந்த், உதயா தீப் உள்ளிட்ட பலர் நடித்துள்ளனர்.

Chaandi Talkies சார்பில் லெனின் மாதேஸ்வரனும் இப்படத்தின் தயாரிப்பில் ஈடுபட்டுள்ளார். சுந்தரமூர்த்தி கே.எஸ். இசையமைத்துள்ள இப்படத்திற்கு அசோக்குமார் ராஜ், பிரசன்னா எஸ். குமார் ஆகியோர் ஒளிப்பதிவு செய்துள்ளனர். ஆர். வசந்தகுமார் படத்தொகுப்புப் பணிகளையும், பி. ஜெய் முருகன் கலை இயக்கப் பணிகளையும் மேற்கொண்டுள்ளனர். சண்டைக் காட்சிகளை ஃபீனிக்ஸ் பிரபு வடிவமைத்துள்ளார். இயக்குநர் நானி இயக்குநராக அறிமுகமாகும் திரைப்படமாகவும் ‘டெலிவரி பாய்’ அமைந்துள்ளது.

சிலம்பரசன் TR வெளியிட்டுள்ள ‘டெலிவரி பாய்’ டிரைலர், குடும்ப உணர்வுகள், காதல், ஆக்ஷன், காமெடி எனப் பல்வேறு அம்சங்களைக் கொண்ட கமர்ஷியல் திரைப்படமாக இது இருக்கும் என்ற எதிர்பார்ப்பை உருவாக்கியுள்ளது. ரசிகர்களின் கவனத்தை ஈர்த்துள்ள இப்படம் வரும் அக்டோபர் 23ஆம் தேதி திரையரங்குகளில் வெளியாகிறது.