
‘லவ் இன்சூரன்ஸ் கம்பெனி’ சார்பில் ஒளிப்பதிவாளர் ரவி வர்மனுக்கு வாழ்த்துகள்
இந்தியாவில் இருந்து 2-வது ஒளிப்பதிப்பாளராக சாதனை படைத்த ரவிவர்மனுக்கு வாழ்த்துகள் தெரிவித்து மகிழ்வோம்…
ஆம், விக்னேஷ் சிவன் இயக்கத்தில் உருவாகி வரும் ‘லவ் இன்சூரன்ஸ் கம்பெனி’
படத்தில் பிரதீப் ரங்கநாதன் நாயகனாக நடிக்க, அவருக்கு ஜோடியாக கீர்த்தி ஷெட்டி நடிக்கிறார்.
மேலும் கெளரி கிஷான், எஸ்.ஜே.சூர்யா, சீமான் உள்பட பலர் நடிக்க இப்படத்தை செவன் ஸ்கிரீன் நிறுவனமும், நயன்தாராவின் ரெளடி பிக்சர்ஸ் நிறுவனமும் இணைந்து தயாரித்து வருகிறது. அனிருத் இசையமைக்கிறார். இதன் படப்பிடிப்பு இறுதிக்கட்டத்தை எட்டியுள்ளது.
இந்நிலையில் அப்படத்தின் ஷூட்டிங் ஸ்பாட்டில் கேக் வெட்டி கொண்டாடிய புகைப்படத்தை இயக்குனர் விக்னேஷ் சிவன் தனது இன்ஸ்டாவில் பதிவிட்டுள்ளார். அதில் ஒளிப்பதிவாளர் ரவி வர்மன் செய்த சாதனையை கொண்டாடும் விதமாக அவருக்காக பிரம்மாண்ட கேக் ஒன்றை வாங்கி வெட்டி இருக்கின்றனர்.
அதாவது ரவிவர்மன், அமெரிக்க ஒளிப்பதிவாளர் சங்கத்தில் உறுப்பினராக இணைத்துக் கொள்ளப்பட்டுள்ளார். இந்தியாவில் இதுவரை சந்தோஷ் சிவன் மட்டுமே இந்த பெருமை மிகு சங்கத்தில் உறுப்பினராக இருந்து வந்தார். அந்த பட்டியலில் தற்போது ரவிவர்மனும் இடம்பெற்று இருக்கிறார்.
அந்த சங்கத்தில் உலகெங்லும் உள்ள திறமை வாய்ந்த ஒளிப்பதிவாளர்கள் மட்டுமே இடம்பெற்று இருப்பார்கள். அந்த சங்கத்தில் இரண்டாவது இந்தியராக ரவிவர்மன் இடம்பிடித்துள்ளதை தான் தற்போது ‘லவ் இன்சூரன்ஸ் கம்பெனி’ படக்குழு கொண்டாடி உள்ளது.
இதுகுறித்து ரவிவர்மன் கூறுகையில், ‘உலகெங்கும் இருக்கும் ஒளிப்பதிவாளர்கள், இந்த சங்கத்தில் இணைவதை வாழ்நாள் கனவாகக் கொண்டிருப்பார்கள். ஆஸ்கர் விருது வென்ற பல்வேறு முன்னணி ஒளிப்பதிவாளர்கள் உறுப்பினர்களாக இருக்கும் இந்த சங்கத்தில் நானும் இடம் பெற்றிருப்பது மகிழ்ச்சியாகவும், பெருமையாகவும் உள்ளது’ என தெரிவித்துள்ளார்.
வேட்டையாடு விளையாடு, ஆட்டோகிராப், தசாவதாரம், பொன்னியின் செல்வன் போன்ற படங்களில் ஒளிப்பதிவாளராக பணியாற்றிய ரவிவர்மன் தற்போது விக்னேஷ் சிவன் இயக்கும் ‘லவ் இன்சூரன்ஸ் கம்பெனி’யில் ஒளிப்பதிவாளராக பணியாற்றி வருகிறார்.