Volmart Films உரிமையாளர் சாய் பாபா மீது காசோலை திரும்பிய வழக்கு… ஒரு ஆண்டு சிறைத்தண்டனை!
சென்னை எழும்பூர் அல்லிக்குளம் XXXV பெருநகர மாஜிஸ்திரேட் நீதிமன்றம், Volmart Films நிறுவனத்தின் உரிமையாளர் சி. சாய் பாபா தொடர்பான காசோலை திரும்பிய (Negotiable Instruments Act, Section 138) வழக்கில் தீர்ப்பளித்துள்ளது.
நீதிமன்ற பதிவுகளின்படி, புகார்தாரருக்கு வழங்கப்பட்ட ₹40,01,600 மதிப்பிலான காசோலை “Account Closed” என்ற காரணத்தால் வங்கியால் திருப்பி அனுப்பப்பட்டது. இதையடுத்து, சட்டப்படி நோட்டீஸ் அனுப்பப்பட்டும் தொகை செலுத்தப்படாததால், Negotiable Instruments Act, Section 138-ன் கீழ் வழக்கு தொடரப்பட்டது.
விசாரணையின் போது, காசோலையை வழங்கியதையும் அதிலுள்ள கையெழுத்தையும் குற்றம் சாட்டப்பட்டவர் மறுக்கவில்லை. ஆனால், அந்த காசோலை பாதுகாப்பு (Security Cheque) நோக்கத்திற்காக மட்டுமே வழங்கப்பட்டது என்ற வாதத்தை உறுதிப்படுத்தும் எந்த ஆதாரத்தையும் தாக்கல் செய்யவில்லை என நீதிமன்றம் குறிப்பிட்டது.
இதனால், புகார்தாரருக்கு சாதகமாக உள்ள சட்டப்பூர்வ அனுமானத்தை (Statutory Presumption) எதிர்த்தரப்பு மறுக்கத் தவறியதாக நீதிமன்றம் தெரிவித்தது. அதன் அடிப்படையில், குற்றச்சாட்டு நிரூபிக்கப்பட்டதாக நீதிமன்றம் தீர்ப்பளித்தது.
இதையடுத்து, குற்றம் சாட்டப்பட்டவருக்கு ஒரு ஆண்டு எளிய சிறைத்தண்டனை விதிக்கப்பட்டுள்ளது. மேலும், 30 நாட்களுக்குள் ₹40,01,600 இழப்பீட்டை புகார்தாரருக்கு வழங்கவும் உத்தரவிடப்பட்டுள்ளது. குறிப்பிட்ட காலத்திற்குள் இழப்பீடு வழங்கத் தவறினால், கூடுதலாக இரண்டு மாதங்கள் எளிய சிறைத்தண்டனை அனுபவிக்க வேண்டும் என்றும் நீதிமன்றம் உத்தரவிட்டுள்ளது.