வித்தியாசமான கதைக்களங்களையும், நடிப்புத் திறனை வெளிப்படுத்தும் கதாபாத்திரங்களையும் தேர்வு செய்து நடித்து பாராட்டுகளைப் பெற்று வருபவர் நடிகை நிமிஷா சஜயன். தமிழ், மலையாளம், இந்தி உள்ளிட்ட பல்வேறு மொழிகளில் தொடர்ந்து நடித்து வரும் இவர், தனது தலைமுறையின் திறமையான நடிகைகளில் ஒருவராகத் திகழ்ந்து வருகிறார்.
சமீபத்தில் ரசிகர்களிடையே நல்ல வரவேற்பைப் பெற்ற இந்திப் படமான ‘பபிதா சிங் ரிப்போர்ட்டிங்’ உள்ளிட்ட திரைப்படங்களில் மாறுபட்ட கதாபாத்திரங்களில் நடித்துள்ள நிமிஷா சஜயன், தற்போது ‘என்ன விலை’ திரைப்படத்தின் மூலம் தமிழ் ரசிகர்களை சந்திக்கிறார். படத்தின் முன்னோட்டக் காட்சிகள் மற்றும் பத்திரிகையாளர் திரையிடல்களில் கிடைத்து வரும் வரவேற்பு படக்குழுவினருக்கு உற்சாகத்தை அளித்துள்ளது.
தனது கதாபாத்திரம் குறித்து நிமிஷா சஜயன் கூறியதாவது:
“இயக்குநர் சஜீவ் என்னிடம் கதையைச் சொன்னபோது, எனக்காக எந்தக் கதாபாத்திரத்தை மனதில் வைத்திருக்கிறார் என்பதை அவர் சொல்லவில்லை. ‘இப்போது நீங்களே தேர்வு செய்துகொள்ளுங்கள்’ என்று மட்டும் கூறினார். இரண்டு கதாபாத்திரங்களுமே மிகவும் அழகாகவும், வலுவாகவும் எழுதப்பட்டிருந்தன.
ரிஷியின் கதாபாத்திரமும் அற்புதமாக வடிவமைக்கப்பட்டிருந்தது. அதனால், விஜயலட்சுமி அல்லது காஞ்சனா என எந்தக் கதாபாத்திரத்தில் நடிக்கப் போகிறேன் என்ற ஆர்வம் எனக்குள் இருந்தது. உண்மையைச் சொன்னால், எந்தக் கதாபாத்திரமாக இருந்தாலும் நான் மகிழ்ச்சியாக ஏற்றுக்கொண்டிருப்பேன். விஜியின் கதாபாத்திரத்தையும் ஏற்றுக்கொள்ள தயாராக இருந்தேன். ஏனென்றால், அந்தக் கதாபாத்திரம் எனக்கு மிகவும் பிடித்திருந்தது.
அதேபோல், காஞ்சனா கதாபாத்திரமும் எனக்கு மிகவும் பிடித்திருந்தது. அதனால், காஞ்சனா கதாபாத்திரத்தில் நான் நடிக்கப் போவதாக சஜீவ் சொன்னபோது எனக்கு கண்ணீர் வந்துவிட்டது. அவரைக் கட்டிப்பிடித்து, ‘ஏன் இப்படிச் செய்தீர்கள்?’ என்று கேட்டேன்.
இரண்டு கதாபாத்திரங்களுமே மிகவும் அழகாகவும், வலுவாகவும் எழுதப்பட்டிருந்ததால், அவர் எனக்கு எந்தக் கதாபாத்திரத்தைத் தரப்போகிறார் என்பது தெரியாமல் இருந்தது. ஆனால், ‘அது உங்களுக்கான கதாபாத்திரம்’ என்று அவர் கூறிய அந்த நொடி எனக்கு மிகவும் உணர்ச்சிபூர்வமான தருணமாக அமைந்தது.
- Advertisement -
‘என்ன விலை’ திரைப்படத்தின் சிறப்பு என்னவென்றால், ஒவ்வொரு கதாபாத்திரத்திற்கும் ஆழமான உணர்வுப்பூர்வமான பயணம் இருக்கிறது. கருணாஸ் சாருடன் எனக்கு அதிகமான காட்சிகள் இல்லை. ஆனால், அவரது நடிப்பு அசாத்தியமானது.
விஜயலட்சுமி கதாபாத்திரமும் மிகவும் வலுவான தாக்கத்தை ஏற்படுத்தக்கூடியது. அந்தக் கதாபாத்திரத்தில் நடித்துள்ளவரும் சிறப்பாக நடித்துள்ளார். பத்திரிகையாளர்கள் மற்றும் ஊடகத் துறையினர் திரைப்படத்தையும், எனது கதாபாத்திரத்தையும் பாராட்டியிருப்பது மகிழ்ச்சியாக உள்ளது.
இந்தக் கதாபாத்திரங்களை உயிரோட்டமாக உருவாக்கியதற்கான முழுப் பாராட்டும் இயக்குநர் சஜீவுக்கே சேரும். ‘என்ன விலை’ திரைப்படம் சினிமா ரசிகர்களின் மனதில் நீண்ட காலம் நினைவில் நிற்கும் படமாக இருக்கும் என நான் உறுதியாக நம்புகிறேன்” என்றார்.
‘என்ன விலை’ படத்தின் கதை
சமூக முக்கியத்துவம் வாய்ந்த பின்னணியில் உருவாகியுள்ள ‘என்ன விலை’ திரைப்படம், ராமேஸ்வரம் அருகே கடலில் பக்தர்கள் காணிக்கையாகச் செலுத்தும் நாணயங்களை மீட்டெடுத்து வாழும் ஒருவரின் வாழ்க்கையை மையமாகக் கொண்டுள்ளது. கண்ணியத்துடனும், வாழ்வாதாரத்துக்காகவும் அவர் மேற்கொள்ளும் போராட்டம், இறுதியில் ஒரு முக்கியமான சட்டப் போராட்டத்திற்கு வழிவகுக்கிறது.
இப்படத்தில் கருணாஸ், நிமிஷா சஜயன், ஷாஷா சிவகுமார், விஜயலட்சுமி வீரமணி, சித்தா தர்ஷன், பூர்ணிமா பாக்யராஜ், ஒய்.ஜி. மகேந்திரன், மொட்ட ராஜேந்திரன், நிழல்கள் ரவி, பிரவீணா, மோகன் ராம், சேத்தன் குமார், கவிதாலயா கிருஷ்ணன், கமலேஷ், கோலி சோடா பாண்டி, ஜே.எஸ். கவி, சுவாமிநாதன், தீபா சங்கர், கவி நக்கலைட்ஸ் உள்ளிட்ட பலர் நடித்துள்ளனர்.
சஜீவ் பழூர் எழுதி இயக்கியுள்ள இப்படத்தை கலாமயா ஃபிலிம்ஸ் நிறுவனம் சார்பில் ஜிதேஷ் வி தயாரித்துள்ளார். சாம் சி.எஸ். இசையமைக்க, ஆல்பி ஆண்டனி ஒளிப்பதிவு செய்துள்ளார். ஸ்ரீஜித் சாரங் படத்தொகுப்பை மேற்கொண்டுள்ளார்.
‘என்ன விலை’ திரைப்படம் உலகம் முழுவதும் செப்டம்பர் 17ஆம் தேதி திரையரங்குகளில் வெளியாகிறது.