தமிழக சட்டமன்றத் தேர்தல் களம் சூடுபிடித்துள்ள நிலையில், தமிழக வெற்றிக் கழகத் தலைவர் விஜய் தனது தொண்டர்களுக்கும் தமிழக மக்களுக்கும் ஒரு உணர்ச்சிகரமான அறிக்கையை வெளியிட்டுள்ளார். அதில் திமுக அரசின் ‘திசைதிருப்பும்’ அரசியல் குறித்தும், தவெக-வின் தேர்தல் வியூகம் குறித்தும் அவர் விரிவாகப் பேசியுள்ளார்.
திமுக அரசின் ‘கபட நாடகம்’ மற்றும் அதிகார துஷ்பிரயோகம்
திமுக அரசு காபந்து அரசாக இருந்துகொண்டு, தேர்தல் ஆணையத்தின் மூலம் அதிகாரிகளைத் தவறாகப் பயன்படுத்தி தவெக வேட்பாளர்களுக்கு நெருக்கடி கொடுப்பதாக விஜய் குற்றம் சாட்டியுள்ளார்.
-
பரப்புரை முடக்கம்: பரப்புரைக்கான அனுமதியை கடைசி நிமிடம் வரை தராமல் இழுத்தடிப்பது, பிறகு திடீரென ரத்து செய்வது போன்ற செயல்கள் மூலம் தவெக-வின் முன்னேற்பாடுகளைத் தடுக்க திமுக முயற்சிப்பதாக அவர் கூறியுள்ளார்.
-
புனைவுச் செய்திகள்: ஊடகங்கள் வாயிலாகத் தவறான செய்திகளைப் பரப்பி மக்களிடையே குழப்பத்தை ஏற்படுத்த திமுக முயல்வதாகவும் அவர் சாடியுள்ளார்.
“தமிழக மண்ணில் ஃபாசிசத்திற்கு இடமில்லை”
தமிழகம் என்பது தந்தை பெரியார், காமராஜர் மற்றும் அண்ணா ஆகியோர் விதைத்த சமூக நீதி மண் என்று குறிப்பிட்ட விஜய், இங்கு ஃபாசிச சக்திகள் ஒருபோதும் காலூன்ற முடியாது எனத் திட்டவட்டமாகத் தெரிவித்தார். மேலும், “மக்கள் விரோத” திமுக அரசிற்கு மீண்டும் ஒரு வாய்ப்பு என்பது எட்டாக்கனி என்றும் அவர் விமர்சித்துள்ளார்.
விசிலில் வீழும் ஊழல் கோட்டை
“திமுக என்பது லிமிட்டெட் இல்லாத அராஜகம் மற்றும் ஊழல் செய்யும் லிமிட்டெட் கம்பெனி” என்று கிண்டல் செய்துள்ள விஜய், இந்தத் தேர்தலில் மக்கள் அவர்களை ‘லிமிட்’ செய்து வீட்டிற்கு அனுப்புவது உறுதி எனத் தெரிவித்தார்.
“நாங்கள் பழைய பாணியில் ரோட்டில் செய்யும் பிரசாரத்தை மட்டும் நம்பி இல்லை. தமிழகத்தின் ஒவ்வொரு வீட்டிலும் தவெக-விற்கான ஆதரவு மக்கள் இயக்கமாகவே மாறிவிட்டது. ஏப்ரல் 23 அன்று ஊழல் மற்றும் ஃபாசிச சக்திகள் ‘விசில்’ புயலில் வீழ்வது உறுதி.”
அமைதிப் புரட்சிக்கு அழைப்பு
ஆதாய அரசியல் சூதாடும் அனுபவசாலிகள் மக்களின் அமைதிப் புரட்சியை உணரத் தவறிவிட்டதாகக் குறிப்பிட்ட அவர், மக்கள் அனைவரும் விழிப்புடன் இருந்து வேடதாரிகளைத் தோற்கடிக்க வேண்டும் எனக் கேட்டுக்கொண்டுள்ளார். “வெல்வோம், வாகை சூடுவோம், வரலாறு படைப்போம்” என்ற முழக்கத்துடன் தனது செய்தியை அவர் நிறைவு செய்துள்ளார்.