நடிகை அசினின் கணவருக்கு ரூ.12,000 கோடி வருவாய் இழப்பு..

கஜினி படத்தில் தொழில் அதிபர் (சஞ்சய் ராமசாமி) சூர்யாவுக்கும் அசினுக்கும் காதல் ஏற்படும். ஆனால், கல்யாணம் முடியாத நிலை உருவாகி விடும். அது இருக்கட்டும். தற்போது விஷயத்திற்கு வருவோம்..

நடிகை அசினின் கணவர், மொபைல் ஃபோன் துறையில் முன்னணி நிறுவனமாக இருந்த மைக்ரோமேக்ஸின் இணை நிறுவனர் ராகுல்.

இவரது நிறுவனம் குறுகிய காலத்தில் இந்திய சந்தையில் ஆதிக்கம் செலுத்தி சர்வதேச பிராண்டுகளுடன் போட்டியிட்டாலும், சில வருடங்களில் வீழ்ச்சியடைந்தது. ரூ.12,00 கோடி இழப்பு ஏற்பட்டது. சீன பிராண்டுகளின் எழுச்சிதான் மைக்ரோமேக்ஸின் வீழ்ச்சிக்குக் காரணம் என ராகுல் ராஜ் ஷாமனியின் பாட்காஸ்டில் தெரிவித்தார்.

உலகின் முதல் 10 மொபைல் ஃபோன் நிறுவனங்களில் ஒன்றாக மைக்ரோமேக்ஸ் இருந்தது. நோக்கியா, சாம்சங் போன்ற நிறுவனங்களின் போட்டியை இந்தியாவில் வெற்றிகரமாக எதிர்கொண்டு ரூ.12,000 முதல் ரூ.15,000 கோடி வரை வருவாய் ஈட்டியது.

ஆனால், சீன நிறுவனங்களின் வருகையால் நிலைமை மாறியது. மைக்ரோமேக்ஸின் வீழ்ச்சியை ‘பவுன்சர்களுக்குப் பிறகு பவுன்சர்கள், இறுதியில் கிளீன் போல்ட்’ என்று ராகுல் வர்ணித்தார். இது மைக்ரோமேக்ஸுக்கு மட்டும் நடந்தது அல்ல, உலகளாவிய நிகழ்வு.

அப்போது பல பிராண்டுகள் இருந்தன. ஆனால், விநியோகச் சங்கிலி மாறத் தொடங்கியது. சீன உற்பத்தியாளர்கள் வளர்ந்து வரும் சீன பிராண்டுகளுடன் ஒப்பந்தம் செய்ததால் புதிய பரிசோதனைகளுக்கு வாய்ப்பில்லாமல் போனது.

இன்று எனக்கு மூன்று திரை கொண்ட ஃபோன் தயாரிக்க வேண்டும் என்றால், அதற்கான உதிரி பாகங்கள் இல்லாததால் முடியாது. அதாவது, தொடர்ந்து வியாபாரம் செய்ய முடியாது. இரண்டு வருடங்கள் முயற்சித்தோம். ஆனால், ஒரு கட்டத்தில் மேலும் முதலீடு செய்வதில் அர்த்தமில்லை எனத் தோன்றியது. போட்டியாளர்களுக்கு வரம்பற்ற நிதி கிடைக்கும்போது, நாம் பணத்தை வீணாக்கக் கூடாது.

2014-ல் அலிபாபாவின் 800 மில்லியன் நிதியுதவியை நிராகரித்தது தவறாக இருக்கலாம். அப்போது பின்லாந்து, கொரிய நிறுவனங்களை எதிர்கொண்டோம், சீன நிறுவனங்களால் முடியாது என்று நினைத்தோம். ஆனால், சீன நிறுவனங்கள் முழு ஆயுதங்களுடன் வந்தன. பின்னர் கட்டுமானத் துறைக்கு மாறினோம். இப்போது முன்பை விட அதிகமாக சம்பாதிக்கிறோம். ஆனால், அது பலருக்கும் தெரியாது என ராகுல் சர்மா கூறி உள்ளார்.

ராகுல் சர்மாவுக்கும் அசினுக்கும் கடந்த 2016-ம் ஆண்டு திருமணம் ஆனது. இந்த ஜோடிக்கு அரின் என்கிற பெண் குழந்தை உள்ளது. திருமணத்துக்கு பின் நடிகை அசின் சினிமாவில் நடிக்கவில்லை என்பது குறிப்பிடத்தக்கது.