‘தாரா’வாக அறிமுகமாகும் ருக்மிணி வசந்த்!

Web Ads

‘சப்த சாகரதாச்சே எல்லோ’, ‘காந்தாரா: சாப்டர் 1’ ஆகிய படங்களின் மூலம் ரசிகர்களின் கவனத்தை ஈர்த்த நடிகை ருக்மிணி வசந்த், ‘கணம்’ படத்தின் இயக்குநர் ஸ்ரீ கார்த்திக்குடன் புதிய திரைப்படத்தில் இணைந்துள்ளார். இன்னும் தலைப்பிடப்படாத இப்படத்தில், ருக்மிணி வசந்த் ‘தாரா’ என்ற கதாபாத்திரத்தில் நடிக்கிறார். தேவ் ராம்நாத் மற்றும் விநாயக் வைத்யநாதன் ஆகியோரும் முக்கியக் கதாபாத்திரங்களில் நடிக்கின்றனர்.

மேட்பாய்ஸ் என்டர்டெயின்மென்ட் மற்றும் சிருனி சினி கார்ப்பரேஷன் இணைந்து தயாரிக்கும் இப்படத்தை, சாய் கிருஷ்ணா கட்வால் இணைந்து தயாரிக்கிறார். ருக்மிணி வசந்த் மற்றும் ஸ்ரீ கார்த்திக் முதன்முறையாக இணையும் திரைப்படம் என்பதால், இப்படத்தின் அறிவிப்பு ரசிகர்களிடையே கவனம் பெற்றுள்ளது.

காலப்பயணத்தை மையமாகக் கொண்டு, தாய் – மகன் உறவின் உணர்வுப்பூர்வமான ஆழத்தைப் பதிவு செய்த ‘கணம்’ திரைப்படத்தைத் தொடர்ந்து, ஸ்ரீ கார்த்திக் தனது அடுத்த படைப்பில் வித்தியாசமான கதைக்களத்துடன் களமிறங்குகிறார். இப்படத்தின் கதை குறித்த முழுமையான விவரங்கள் இன்னும் வெளியாகாத நிலையில், கதாபாத்திர அறிமுக வீடியோ மூலம் படக்குழு எதிர்பார்ப்பை ஏற்படுத்தியுள்ளது.

ருக்மிணி வசந்த் ஏற்று நடிக்கும் ‘தாரா’ கதாபாத்திரத்தை அறிமுகப்படுத்தும் பிரத்யேக வீடியோவைப் படக்குழு வெளியிட்டுள்ளது. இதில் இயக்குநர் ஸ்ரீ கார்த்திக், தேவ் ராம்நாத் மற்றும் விநாயக் வைத்யநாதன் ஆகியோர் ‘தாரா’ கதாபாத்திரத்திற்கான இறுதித் தேர்வில் ஈடுபடுகின்றனர். அப்போது எதிர்பாராத விதமாக வெளியாகும் ஓர் அறிவிப்பு அவர்களைத் திகைக்க வைக்கிறது. இறுதியில் ருக்மிணி வசந்த் அறிமுகமாகும் காட்சியுடன் வீடியோ நிறைவடைகிறது.

படத்தின் அறிவிப்பை வெளியிடுவதிலும் படக்குழு புதுமையான அணுகுமுறையைக் கையாண்டுள்ளது. கடந்த 18 மாதங்களில் மேட்பாய்ஸ் என்டர்டெயின்மென்ட் நிறுவனம் எதிர்கொண்ட சவால்கள், ஏற்றத்தாழ்வுகள் மற்றும் அனுபவங்களை மையமாகக் கொண்டு, இன்ஸ்டாகிராமில் பிரத்யேகமாக ஒளிபரப்பப்படும் கற்பனை கலந்த ஆவணத் தொடர் உருவாக்கப்பட்டுள்ளது. இதுவரை ஒன்பது அத்தியாயங்களைக் கடந்துள்ள இத்தொடர், நிஜ அனுபவங்களையும் கற்பனைக் காட்சிகளையும் இணைத்து, இறுதியில் ருக்மிணி வசந்த் ‘தாரா’ கதாபாத்திரத்தில் நடிப்பதை வெளிப்படுத்தியுள்ளது.

Web Ad 2

தேவ் ராம்நாத் மற்றும் ஸ்ரீ கார்த்திக் ஆகியோரால் தொடங்கப்பட்ட மேட்பாய்ஸ் என்டர்டெயின்மென்ட் நிறுவனம், ‘ஐ ஹேட் யூ – ஐ லவ் யூ’ என்ற தமிழ் இணையத் தொடர் மற்றும் விருதுகளைப் பெற்ற ‘சைல்ட்ஹுட் டைரீஸ்’ குறும்படம் உள்ளிட்ட படைப்புகள் மூலம் கவனம் பெற்றுள்ளது. தற்போது திரைப்படத் தயாரிப்பிலும் தனது பயணத்தை விரிவுபடுத்தி வரும் இந்நிறுவனம், புதுமையான கதை சொல்லல் முறைகளைப் பெரிய திரைக்குக் கொண்டுவரும் முயற்சியில் ஈடுபட்டுள்ளது.

தயாரிப்பாளர் ஜஸ்வந்துடன் தொடர்புடைய சிருனி சினி கார்ப்பரேஷன், ராகுல் ரவீந்திரன் இயக்கத்தில் வெளியான ‘சி லா சோ’ திரைப்படத்தைத் தயாரித்துள்ளது. அப்படம் சிறந்த அசல் திரைக்கதைக்கான தேசிய திரைப்பட விருதைப் பெற்றது குறிப்பிடத்தக்கது. ‘கீதா கோலா’, ‘காந்தா’ ஆகிய படங்களுடன் தொடர்புடைய சாய் கிருஷ்ணா கட்வாலும் இப்படத்தின் தயாரிப்பில் இணைந்துள்ளார்.

ருக்மிணி வசந்த் ‘தாரா’ கதாபாத்திரத்தில் நடிப்பது குறித்த அறிவிப்பு வெளியாகியுள்ள நிலையில், இப்படத்தின் தலைப்பு மற்றும் இதர விவரங்கள் குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது. புதுமையான அறிவிப்பு முயற்சியும், புதிய கலைஞர்களின் கூட்டணியும் இணைந்துள்ள இப்படம், தற்போதே ரசிகர்களின் கவனத்தை ஈர்த்துள்ளது.