காஜல் அகர்வால் மற்றும் ஷ்ரேயாஸ் தல்படே முதன்முறையாக இணைந்து நடித்துள்ள சமூக விழிப்புணர்வு திரைப்படமான ‘தி இந்தியா ஸ்டோரி: ஸ்லோ பாய்சன் இன் ப்ராக்ரஸ்’ (The India Story: Slow Poison in Progress) படத்தின் டீசர் விரைவில் வெளியாக உள்ளதாக தயாரிப்பாளர்கள் அதிகாரப்பூர்வமாக அறிவித்துள்ளனர்.
சமீபத்தில் வெளியிடப்பட்ட படத்தின் பிரத்யேக போஸ்டர் ரசிகர்களிடையே பெரும் வரவேற்பைப் பெற்ற நிலையில், தற்போது வெளியாகவுள்ள டீசர் படத்தின் மையக் கருத்து மற்றும் அதன் தீவிரமான கதைக்களத்தை மேலும் வலுப்படுத்தும் என எதிர்பார்க்கப்படுகிறது.
சேட்டன் டி.கே. இயக்கத்தில், சாகர் பி. ஷிண்டே கதை எழுதி தயாரித்துள்ள இந்த திரைப்படம், ரசாயனப் பொருட்களின் தவறான பயன்பாடு மற்றும் பூச்சிக்கொல்லி மருந்துகள் சார்ந்த விவசாய முறைகளால் ஏற்படும் சுகாதார பாதிப்புகள் குறித்து பேசுகிறது. தொழில்துறை அலட்சியத்தின் மறைமுக விளைவுகள் மற்றும் பொதுமக்கள் மத்தியில் விழிப்புணர்வு ஏற்படுத்த வேண்டிய அவசியத்தை இப்படம் மையப்படுத்துகிறது.
ஒரு தனிநபர் அல்லது குடும்பத்தின் கதையைத் தாண்டி, நாடு முழுவதும் உள்ள மக்களின் வாழ்வை பாதிக்கும் ஒரு முக்கிய பிரச்சினையை திரையில் பதிவு செய்யும் முயற்சியாக இந்த படம் உருவாகியுள்ளது.
MIG Productions & Studios நிறுவனத்துடன் இணைந்து Zee Studios வழங்கும் இந்த திரைப்படம் ஜூலை 24ஆம் தேதி உலகம் முழுவதும் திரையரங்குகளில் வெளியாகிறது. தமிழ், தெலுங்கு மற்றும் இந்தி மொழிகளில் வெளியாகும் இப்படத்தை Zee Studios உலகளவில் விநியோகம் செய்கிறது.
நிஷாந்த் பக்வத் ஒளிப்பதிவு செய்துள்ள இப்படத்திற்கு மங்கேஷ் தாக்டே இசையமைத்துள்ளார். ஆஷிஷ் மாத்ரே படத்தொகுப்பையும், ஷகீல் அஜாமி பாடல்களையும், அன்மோல் பாவே ஒலி வடிவமைப்பையும் கவனித்துள்ளனர். சுமித் பாகடே, அனிதா ஜாதவ், விநாயக் சைதானி, கல்பேஷ் ஷா, தேவ்யானி கொராடே மற்றும் பிரேம் ஜோஷி ஆகியோர் இணை தயாரிப்பாளர்களாக பணியாற்றியுள்ளனர்.
சமூகப் பொறுப்புணர்வை மையமாகக் கொண்ட இந்த திரைப்படம், அதன் வலுவான கதைக்களம் மற்றும் உணர்வுபூர்வமான காட்சிகளால் ரசிகர்களின் எதிர்பார்ப்பை அதிகரித்துள்ளது.