நச்சு பூச்சிக்கொல்லி விவசாயத்தால் ஏற்படும் பாதிப்புகளை மையமாகக் கொண்டு உருவாகியுள்ள ‘தி இந்தியா ஸ்டோரி’ திரைப்படத்தின் புதிய போஸ்டர் வெளியாகி ரசிகர்களின் கவனத்தை ஈர்த்துள்ளது.
Zee Studios மற்றும் MIG Production இணைந்து தயாரிக்கும் இப்படத்தை சேட்டன் DK இயக்கியுள்ளார். சாகர் B. ஷிண்டே எழுதி தயாரித்துள்ள இப்படம், ஜூலை 24, 2026 அன்று இந்தி, தமிழ், தெலுங்கு ஆகிய மொழிகளில் உலகம் முழுவதும் திரையரங்குகளில் வெளியாகிறது.
மனித உடல்நலத்தில் நச்சு பூச்சிக்கொல்லி விவசாயம் ஏற்படுத்தும் தீவிர விளைவுகள், அதன் பின்னணியில் உள்ள உண்மைகள் மற்றும் சமூகப் பிரச்சனைகளை நீதிமன்ற நாடக வடிவில் இப்படம் பேசுகிறது.
வெளியான புதிய போஸ்டரில், காஜல் அகர்வால் மற்றும் ஷ்ரேயாஸ் தல்படே இருவரும் கோபமடைந்த பொதுமக்கள் கூட்டத்தால் சூழப்பட்டிருப்பது போன்று காட்சிப்படுத்தப்பட்டுள்ளது. காய்கறி சந்தையின் நடுவே நடைபெறும் இந்தக் காட்சியில், வியாபாரிகள் இருவரையும் எதிர்த்து காய்கறிகளை வீசுவதும், குற்றச்சாட்டுகளை முன்வைப்பதும் இடம்பெற்றுள்ளது.
உண்மையை வெளிக்கொண்டு வர முயற்சிக்கும் போது சந்திக்க வேண்டிய எதிர்ப்புகளையும், சமூகத்தின் கோபத்தையும் இந்த போஸ்டர் பிரதிபலிக்கிறது. அதில் இடம்பெற்றுள்ள “Slow Poison in Progress…” என்ற வாசகம், படத்தின் மையக் கருத்தான மறைமுக ஆபத்தை உணர்த்துகிறது.
இயக்குநர் சேட்டன் DK கூறுகையில், “உண்மையை பேசுவதற்கான விலையை இந்த போஸ்டர் பிரதிபலிக்கிறது. ஏமாற்றத்தின் மீது கட்டமைக்கப்பட்ட அமைப்பை கேள்வி கேட்கும்போது முதலில் வெளிப்படுவது பயமும் கோபமும்தான். நாம் உண்ணும் உணவு மற்றும் நம்பிக்கைகள் குறித்து சிந்திக்க வைக்கும் படமாக ‘தி இந்தியா ஸ்டோரி’ உருவாகியுள்ளது” என்றார்.
இப்படத்தில் இணை தயாரிப்பாளர்களாக ஸ்வாதி விநாயக் சைந்தானி, அனிதா ஜாதவ், விநாயக் சைந்தானி, கல்பேஷ் ஷா, தேவ்யானி கொராடே மற்றும் பிரேம் ஜோஷி ஆகியோர் பணியாற்றியுள்ளனர்.
தொழில்நுட்பக் குழுவில் ஒளிப்பதிவாளர் நிஷாந்த் பகவத், இசையமைப்பாளர் மங்கேஷ் தாக்டே, படத்தொகுப்பாளர் ஆஷிஷ் மாத்ரே, பாடலாசிரியர் ஷகீல் அஜாமி, ஒலி வடிவமைப்பாளர் அன்மோல் பாவே ஆகியோர் இடம்பெற்றுள்ளனர்.