நடிகர் ரிஷிகாந்த்தின் மொத ராத்திரி ரிலீஸ் தேதி அறிவிப்பு

ஒரு திருமணம் இனிய நினைவுகளை உருவாக்கும். சில திருமணங்கள் மறக்க முடியாத குழப்பங்களையும் நகைச்சுவையான தருணங்களையும் பரிசளிக்கும். அப்படிப்பட்ட ஒரு சிரிப்பும் சந்தோஷமும் நிறைந்த அனுபவத்தை ரசிகர்களுக்கு வழங்க வருகிறது மைத்ரி மூவி மேக்கர்ஸ் தயாரிக்கும் ‘மொத ராத்திரி’ திரைப்படம். முழுக்க முழுக்க குடும்பத்துடன் ரசிக்கக்கூடிய இந்த நகைச்சுவை திரைப்படம், ஆகஸ்ட் 21-ஆம் தேதி உலகம் முழுவதும் திரையரங்குகளில் பிரம்மாண்டமாக வெளியாகிறது.

இயக்குநர் ராஜா கருப்பசாமி இயக்கியுள்ள இப்படம், ஒரு சாதாரண கிராமத்து திருமணத்தில் ஒரே இரவில் நடைபெறும் எதிர்பாராத சம்பவங்கள், தவறான புரிதல்கள், நகைச்சுவையான திருப்பங்கள் மற்றும் மனதைத் தொடும் தருணங்களை மையமாகக் கொண்டு உருவாகியுள்ளது. ஒவ்வொரு காட்சியும் சிரிப்பையும் சுவாரஸ்யத்தையும் தாங்கி, குடும்பம் முழுவதும் ரசிக்கும் வகையில் அமைந்துள்ளது.

இந்தப் படத்தின் மூலம் நடிகர் ரிஷிகாந்த் கதாநாயகனாக அறிமுகமாகிறார். அவருக்கு ஜோடியாக அனிஷ்மா அனில்குமார் நடித்துள்ளார். மேலும் சேத்தன், ஏ. வெங்கடேஷ், பக்ஸ், அப்துல் லீ, ஷெல்லி கிஷோர், சங்கீதா பாலன், பானுப்ரியா, சுமித்ரா தேவி, வர்ஷினி கார்மேகம், கார்த்திகேயன், வேலன், கௌஷிக் கபிலன் உள்ளிட்ட பலர் முக்கிய கதாபாத்திரங்களில் நடித்துள்ளனர்.

படம் குறித்து தயாரிப்பாளர் நவீன் யெர்னேனி கூறுகையில், “இந்தக் கதையை முதலில் கேட்டபோதே எங்களை சிரிக்க வைத்தது. அதை திரையில் ரசிகர்கள் இன்னும் அதிகமாக ரசிப்பார்கள் என்ற நம்பிக்கையில் உடனடியாக தயாரிக்க முடிவு செய்தோம். நகைச்சுவை, உணர்வு, குடும்ப உறவுகள் மற்றும் முழுமையான பொழுதுபோக்கு அனைத்தும் இந்தப் படத்தில் இடம்பெற்றுள்ளன. படம் முழுவதும் ரசிகர்கள் சிரித்துக்கொண்டே இருக்க வேண்டும் என்பதே எங்கள் விருப்பம்” என்றார்.

இயக்குநர் ராஜா கருப்பசாமி பேசுகையில், “எனது இயக்குநர் பயணத்திற்கு இதைவிட சிறந்த தொடக்கம் இருக்க முடியாது. இந்தக் கதையை நம்பி எனக்கு வாய்ப்பு அளித்த தயாரிப்பாளர்களுக்கு நன்றி. மைத்ரி மூவி மேக்கர்ஸ் போன்ற முன்னணி நிறுவனத்துடன் இணைந்து பணியாற்றியது பெருமையாக உள்ளது. படம் முடிந்து வெளியே வரும் ரசிகர்கள் இந்தக் கதாபாத்திரங்களையும் நகைச்சுவை தருணங்களையும் நினைத்து சிரித்துக்கொண்டே செல்ல வேண்டும் என்பதே என் ஆசை” என்று தெரிவித்தார்.

ஒளிப்பதிவை சுரேந்திரன் பரஞ்சோதி, படத்தொகுப்பை அசோக் அர்ஜுனன், இசையை பரத் சங்கர் கவனித்துள்ளனர். குடும்ப உறவுகள், கலகலப்பான நகைச்சுவை மற்றும் திருமணக் கொண்டாட்டத்தை மையமாகக் கொண்ட ‘மொத ராத்திரி’, இந்த ஆகஸ்ட் 21 முதல் உலகம் முழுவதும் திரையரங்குகளில் ரசிகர்களை சிரிக்க வைக்க தயாராக உள்ளது.