திரை எழுத்தாளர்களின் திறமைகளை வளர்ப்பதுடன், அவர்களின் படைப்புரிமைகளைப் பாதுகாக்கும் நோக்கில் தென்னிந்திய திரைப்பட எழுத்தாளர்கள் சங்கம் (SWAN), ஐபி கிளைம்ப் நிறுவனத்துடன் இணைந்து ‘ஸ்வேன் அகாடமி’யை சென்னையில் தொடங்கியுள்ளது.
இதன் தொடக்க விழாவை முன்னிட்டு, சென்னை அண்ணா நூற்றாண்டு நூலகத்தில் எழுத்தாளர்களுக்கான சிறப்பு நிகழ்ச்சி நடைபெற்றது. இதில் 300-க்கும் மேற்பட்ட வளர்ந்து வரும் திரை எழுத்தாளர்கள் மற்றும் திரையுலகைச் சேர்ந்த முன்னணி பிரபலங்கள் பங்கேற்றனர்.
நிகழ்ச்சியில் பங்கேற்றவர்களை வரவேற்ற ஸ்வேன் அமைப்பின் தலைவரும் இயக்குநருமான சேரன், அகாடமியின் நோக்கங்கள் குறித்து விளக்கிப் பேசினார்.
கதை உருவாக்கம், திரைக்கதை எழுதும் நுணுக்கங்கள், நவீன கதைசொல்லல் முறைகள் மற்றும் அறிவுசார் சொத்துரிமை உள்ளிட்ட பல்வேறு முக்கிய அம்சங்கள் குறித்து கருத்தரங்குகள் மற்றும் கலந்துரையாடல்கள் நடைபெற்றன.
சிறப்பு விருந்தினராக கலந்துகொண்ட இயக்குநர் லோகேஷ் கனகராஜ், தனது எழுத்துப் பயணம் மற்றும் திரைக்கதை உருவாக்கம் தொடர்பான அனுபவங்களைப் பகிர்ந்துகொண்டார். தொடர்ந்து, புதிதாக தொடங்கப்பட்ட ‘ஸ்வேன் அகாடமி’யின் லோகோ மற்றும் பாடத்திட்டத்தையும் அவர் வெளியிட்டார்.
- Advertisement -
வளர்ந்து வரும் கதைசொல்லிகள் மற்றும் திரைக்கதை எழுத்தாளர்களுக்கு முறையான பயிற்சியும் வழிகாட்டுதலும் வழங்கும் வகையில் இந்த அகாடமி உருவாக்கப்பட்டுள்ளது. இதன் தொடக்க நிகழ்வில், ஐபி கிளைம்ப் நிறுவனத்தின் தலைமை செயல் அதிகாரி ஜி.கே. திருநாவுக்கரசு மற்றும் லோகேஷ் கனகராஜ் பங்கேற்ற சிறப்பு கலந்துரையாடலும் நடைபெற்றது.
மேலும், பாடலாசிரியரும் எழுத்தாளருமான மதன் கார்க்கி, நவீன கதைசொல்லலில் உருவாகி வரும் தொழில்நுட்ப அணுகுமுறைகள் மற்றும் கதை இயக்கவியல் குறித்து பேசினார். 916 ஸ்டூடியோ சார்பில் நடைபெற்ற அமர்வில், வேகமாக வளர்ந்து வரும் வெர்ட்டிக்கல் ஷார்ட் ஃபார்ம் டிராமா வடிவம் குறித்தும் கலந்துரையாடப்பட்டது.
எழுத்தாளரும் இயக்குநருமான லீனா மணிமேகலை, மலையாள எழுத்தாளர் மற்றும் இயக்குநர் அனுராஜ் மனோகர், மூத்த எழுத்தாளர் எஸ். ராமகிருஷ்ணன் உள்ளிட்ட பல்வேறு படைப்பாளர்களும் சிறப்பு அமர்வுகளில் பங்கேற்று தங்களது கருத்துகளைப் பகிர்ந்துகொண்டனர்.
திரைக்கதை எழுத்தின் நுட்பங்கள், நவீன கதைசொல்லல், டிஜிட்டல் காலத்தில் எழுத்தாளர்களுக்கான புதிய வாய்ப்புகள் மற்றும் அறிவுசார் சொத்துரிமையைப் பாதுகாப்பதன் அவசியம் உள்ளிட்ட பல்வேறு அம்சங்கள் நிகழ்ச்சியில் விரிவாகப் பேசப்பட்டன.
சேரன், பட்டுக்கோட்டை பிரபாகர், ஆர். சுந்தர்ராஜன், சமுத்திரக்கனி, சினேகன் உள்ளிட்ட மூத்த படைப்பாளிகளின் தலைமையில் செயல்பட்டு வரும் ஸ்வேன் அமைப்பின் இந்த புதிய முன்னெடுப்பு, தென்னிந்திய திரை எழுத்தாளர்களின் அடுத்த தலைமுறைக்கு முறையான பயிற்சி மற்றும் வழிகாட்டுதலை வழங்கும் முயற்சியாக அமைந்துள்ளது.