தமிழ் சினிமாவில் திகில் திரைப்படங்களுக்கு தனி ரசிகர் பட்டாளத்தை உருவாக்கிய முக்கியமான படங்களில் ஒன்றாக திகழ்கிறது ‘டிமான்டி காலனி’. 2015ஆம் ஆண்டு வெளியான முதல் பாகமும், அதனைத் தொடர்ந்து வெளியான இரண்டாம் பாகமும் ரசிகர்களிடையே பெரும் வரவேற்பைப் பெற்ற நிலையில், தற்போது ரசிகர்கள் ஆவலுடன் எதிர்பார்த்து காத்திருக்கும் ‘டிமான்டி காலனி 3 – தி எண்ட் இஸ் டூ ஃபார்’ திரைப்படத்தின் வெளியீட்டு தேதி அதிகாரப்பூர்வமாக அறிவிக்கப்பட்டுள்ளது.
அருள்நிதி கதாநாயகனாக நடிக்கும் இந்த திகில் திரில்லர் திரைப்படம், 2026 செப்டம்பர் 11ஆம் தேதி உலகம் முழுவதும் திரையரங்குகளில் வெளியாகவுள்ளது. முதல் இரண்டு பாகங்களில் உருவாக்கப்பட்ட மர்ம உலகத்தை மேலும் விரிவுபடுத்தும் வகையில் இந்த மூன்றாவது பாகம் உருவாகியுள்ளது. “சில கதைகள் ஒருபோதும் முடிவடைவதில்லை” என்ற கருவை மையமாகக் கொண்டு, இன்னும் இருண்ட மற்றும் சுவாரஸ்யமான அனுபவத்தை ரசிகர்களுக்கு வழங்க படக்குழு தயாராகியுள்ளது.
இத்திரைப்படத்தை இயக்குநர் அஜய் ஆர். ஞானமுத்து எழுதி இயக்கியுள்ளார். அவரது தனித்துவமான கதை சொல்லும் பாணியும், திகில் கலந்த திரைக்கதைகளும் இந்த தொடரை ரசிகர்களின் மனதில் தனி இடம் பெறச் செய்துள்ளன.
படத்தை சுதன் சுந்தரம், மனிஷ் சிங்கால் மற்றும் துர்காராம் சௌத்ரி ஆகியோர் தயாரித்துள்ளனர். ஆர்டிஎக்ஸ் மீடியா, ஞானமுத்து பட்டறை மற்றும் பேஷன் ஸ்டுடியோஸ் இணைந்து தயாரித்துள்ள இந்த திரைப்படம், டங்கல் டிவி மூலம் வழங்கப்படுகிறது.
படத்தின் வெளியீட்டு அறிவிப்பைத் தொடர்ந்து தயாரிப்பாளர் சுதன் சுந்தரம், “முதல் இரண்டு பாகங்களின் வெற்றியைத் தொடர்ந்து, மூன்றாவது பாகம் ரசிகர்களுக்கு இன்னும் பெரிய அனுபவமாக இருக்கும். இறுதி பதிப்பைப் பார்த்தபின் இந்தப் படத்தின் ஒரு பகுதியாக இருப்பதில் பெருமை கொள்கிறேன். ரசிகர்களை ஆச்சரியப்படுத்தும் பல அம்சங்கள் இதில் இடம்பெற்றுள்ளன” என்று தெரிவித்துள்ளார்.
நடிகர்கள் பட்டியலில் அருள்நிதியுடன் பிரியா பவானி சங்கர், குரு சோமசுந்தரம், ஜி.எம். குமார், முத்துக்குமார், ஸ்ரீகுமார், மீனாட்சி கோவிந்தராஜன், கதிர், ஆஷிக் ஹூசைன், சர்ஜனோ காலித், அர்ச்சனா ரவிச்சந்திரன் உள்ளிட்ட பலர் முக்கிய கதாபாத்திரங்களில் நடித்துள்ளனர்.
தொழில்நுட்பக் குழு:
எழுத்து & இயக்கம்: அஜய் ஆர். ஞானமுத்து
இசை: சாம் சி.எஸ்.
ஒளிப்பதிவு: சிவக்குமார் விஜயன்
படத்தொகுப்பு: குமரேஷ்.டி
தமிழ்நாடு வெளியீடு: ஃபைவ் ஸ்டார் கே. செந்தில்
திகில் ரசிகர்கள் மத்தியில் ஏற்கனவே பெரும் எதிர்பார்ப்பை ஏற்படுத்தியுள்ள ‘டிமான்டி காலனி 3 – தி எண்ட் இஸ் டூ ஃபார்’, செப்டம்பர் 11ஆம் தேதி திரையரங்குகளில் புதிய திகில் அனுபவத்தை வழங்க தயாராக உள்ளது.