தனது நற்பெயருக்குக் களங்கம் விளைவித்ததாகக் கூறி, முன்னாள் அண்ணியும் நடிகையுமான முஸ்கன் நான்ஸி மீது நடிகை ஹன்சிகா மோத்வானி மும்பை நீதிமன்றத்தில் வழக்கு தொடர்ந்துள்ளார்.
பின்னணி என்ன?
ஹன்சிகாவின் சகோதரர் பிரசாந்துக்கும், சின்னத்திரை நடிகை முஸ்கன் நான்ஸிக்கும் 2020-ல் திருமணம் நடந்து, 2022-ல் அவர்கள் பிரிந்தனர். இதைத்தொடர்ந்து, ஹன்சிகா மற்றும் அவரது தாயார் மீது முஸ்கன் குடும்ப வன்முறைப் புகார் அளித்தார். ஹன்சிகா குடும்பத்தினர் தன்னைத் தாக்கியதால், முகத்தின் ஒரு பக்க தசைகள் செயலிழக்கும் நோய்க்கு (Bell’s Palsy) ஆளானதாக முஸ்கன் குற்றம் சாட்டியிருந்தார்.
ரூ.2 கோடி நஷ்டஈடு கோரிக்கை
இந்தக் குற்றச்சாட்டுகளை முற்றிலுமாக மறுத்துள்ள ஹன்சிகா, தற்போது மும்பை திண்டோஷி செஷன்ஸ் நீதிமன்றத்தில் மனு ஒன்றைத் தாக்கல் செய்துள்ளார். அதில் அவர் கூறியிருப்பதாவது:
-
கடன் விவகாரம்: திருமணத்தின் போது நான்ஸிக்கு ரூ.27 லட்சம் கடன் கொடுத்தேன். அந்தப் பணத்தைத் திருப்பித் தராமல் ஏமாற்றவே என் மீது பொய்யான புகார்களைக் கூறி வருகிறார்.
-
அவதூறு பரப்புதல்: சமூக வலைதளங்களில் ஆதாரமற்ற கருத்துகளைப் பரப்பி எனது நற்பெயருக்குக் களங்கம் விளைவித்துள்ளார்.
-
நிபந்தனைகள்: மன உளைச்சலை ஏற்படுத்தியதற்காக ரூ.2 கோடி நஷ்டஈடு வழங்க வேண்டும். மேலும், அவர் பகிரங்கமாக மன்னிப்புக் கேட்க வேண்டும் மற்றும் எனக்கு எதிராகப் பேசத் தடை விதிக்க வேண்டும்.
தனிப்பட்ட வாழ்க்கை
சமீபத்தில் தொழிலதிபர் சோஹைல் கதுரியாவுடனான தனது விவாகரத்தை ஹன்சிகா உறுதி செய்திருந்த நிலையில், தற்போது இந்த சட்டப் போராட்டம் திரையுலகில் பரபரப்பை ஏற்படுத்தியுள்ளது. இந்த வழக்கு விரைவில் விசாரணைக்கு வரவுள்ளது.