“அவெஞ்சர்ஸ்: டூம்ஸ்டே” படத்தின் டாக்டர் டூமின் புதிய போஸ்டர் வெளியீடு

இந்த ஆண்டின் மிகவும் எதிர்பார்க்கப்படும் ஹாலிவுட் திரைப்படங்களில் ஒன்றான ‘அவெஞ்சர்ஸ்: டூம்ஸ்டே’ (Avengers: Doomsday) படத்தின் வெளியீட்டிற்கான கவுண்ட்டவுன் தொடங்கியுள்ளது. இதனை முன்னிட்டு, மார்வெல் ஸ்டுடியோஸ் படத்தின் ஐந்து புதிய போஸ்டர்களை வெளியிட்டு ரசிகர்களின் எதிர்பார்ப்பை அதிகரித்துள்ளது. குறிப்பாக, மார்வெல் சினிமாட்டிக் யுனிவர்ஸின் சக்திவாய்ந்த வில்லன்களில் ஒருவரான டாக்டர் டூமின் தோற்றம் இந்தப் போஸ்டர்களில் முக்கிய கவனம் பெற்றுள்ளது.

பல முன்னணி நட்சத்திரங்கள் இணைந்து நடித்துள்ள இப்படம், பிரம்மாண்டமான ஆக்‌ஷன் காட்சிகள், விறுவிறுப்பான கதைக்களம் மற்றும் பிரமிக்க வைக்கும் காட்சியமைப்புகளுடன் உருவாகியுள்ளது. மார்வெல் திரைப்படங்களுக்கே உரிய பிரம்மாண்டத்தை அடுத்த கட்டத்திற்கு எடுத்துச் செல்லும் வகையில், ரசிகர்களுக்கு மறக்க முடியாத திரையரங்க அனுபவத்தை வழங்கும் என எதிர்பார்க்கப்படுகிறது.

மேலும், 4DX, RealD 3D, ScreenX, Dolby உள்ளிட்ட நவீன பிரீமியம் திரையரங்கத் தொழில்நுட்பங்களிலும், மார்வெல் ஸ்டுடியோஸின் பிரத்யேகமான Infinity Vision வடிவத்திலும் இப்படம் வெளியாகவுள்ளது.

அதன்படி, ‘அவெஞ்சர்ஸ்: டூம்ஸ்டே’ திரைப்படம் வரும் டிசம்பர் 17ஆம் தேதி இந்தியத் திரையரங்குகளில் ஆங்கிலம், இந்தி, தமிழ் மற்றும் தெலுங்கு ஆகிய நான்கு மொழிகளில் வெளியாகிறது.