செப்டம்பர் 25 முதல் ‘மீசைய முறுக்கு 2’ அதிகாரப்பூர்வ வெளியீட்டு தேதி அறிவிப்பு!
ஹிப்ஹாப் தமிழா ஆதியின் ரசிகர்கள் நீண்ட நாட்களாக ஆவலுடன் எதிர்பார்த்து வந்த ‘மீசைய முறுக்கு 2’ திரைப்படத்தின் உலகளாவிய வெளியீட்டு தேதி அதிகாரப்பூர்வமாக அறிவிக்கப்பட்டுள்ளது. இசை, காதல், நட்பு, நகைச்சுவை, குடும்ப உணர்வுகள் என முழுமையான பொழுதுபோக்கு அம்சங்களுடன் உருவாகியுள்ள இப்படம், செப்டம்பர் 25 முதல் உலகம் முழுவதும் திரையரங்குகளில் வெளியாகிறது.
2017-ம் ஆண்டு வெளியாகி ரசிகர்களிடையே பெரும் வரவேற்பைப் பெற்ற ‘மீசைய முறுக்கு’ படத்தின் 9-வது ஆண்டு நிறைவை முன்னிட்டு, இப்படத்தின் வெளியீட்டு தேதி அறிவிக்கப்பட்டுள்ளது. ஹிப்ஹாப் தமிழா ஆதியை நடிகராகவும் இயக்குநராகவும் அறிமுகப்படுத்திய இப்படம், இளைஞர்களின் வாழ்க்கையுடன் தொடர்புடைய கதைக்களம், மனதில் நிற்கும் பாடல்கள் மற்றும் ஊக்கமளிக்கும் திரைக்கதையால் ரசிகர்களின் மனதில் தனி இடத்தைப் பிடித்தது.
இந்நிலையில், ‘மீசைய முறுக்கு 2’ குறித்து ஹிப்ஹாப் தமிழா ஆதி, “ஒரு கனவாகத் தொடங்கியது, இன்று கோடிக்கணக்கான மக்களின் உணர்வாக மாறியுள்ளது. அந்த மாயாஜாலத்தை மீண்டும் ஒருமுறை ‘மீசைய முறுக்கு 2’ மூலம் அனுபவிக்க வேண்டிய நேரம் வந்துவிட்டது” என உணர்வுப்பூர்வமாக தெரிவித்துள்ளார்.
இப்படத்தின் மீதான எதிர்பார்ப்பை ஏற்கனவே வெளியான பாடல்கள் மேலும் அதிகரித்துள்ளன. ‘Aura 10/10’, ‘பப்பாளி பழமே’, ‘கோயிந்தம்மா’, ‘அடி போடி’ உள்ளிட்ட பாடல்கள் ரசிகர்களிடையே நல்ல வரவேற்பைப் பெற்று, சமூக வலைதளங்களிலும் இசைப் பட்டியல்களிலும் கவனம் ஈர்த்து வருகின்றன.
முதல் பாகத்தைப் போலவே ‘மீசைய முறுக்கு 2’ படத்திலும் கதை, திரைக்கதை, வசனம், இயக்கம், இசை மற்றும் கதாநாயகன் என பல்வேறு பொறுப்புகளை ஹிப்ஹாப் தமிழா ஆதி ஏற்றுள்ளார். இளமைக் காதல், நட்பு, நகைச்சுவை, குடும்பப் பாசம் மற்றும் உற்சாகமான இசைக் காட்சிகளை மையமாகக் கொண்டு இப்படம் உருவாகியுள்ளது.
படத்தில் ஹிப்ஹாப் தமிழாவுடன் சைத்ரா J ஆச்சார், கேதிகா ஷர்மா, ரம்யா ரங்கநாதன் ஆகியோர் கதாநாயகிகளாக நடித்துள்ளனர். மேலும் ஹர்ஷத் கான், கருணாஸ், நாசர், ஆடுகளம் நரேன், கருணாகரன் உள்ளிட்டோர் முக்கிய கதாபாத்திரங்களில் நடித்துள்ளனர்.
‘மீசைய முறுக்கு 2’ படத்தை அவ்னி மூவீஸ் மற்றும் பென்ஸ் மீடியா பிரைவேட் லிமிடெட் நிறுவனங்கள் இணைந்து தயாரித்துள்ளன. குஷ்பூ சுந்தர் மற்றும் ஏ.சி.எஸ். அருண்குமார் தயாரிப்பில் உருவாகியுள்ள இப்படத்திற்கு பாலாஜி சுப்ரமணியம் ஒளிப்பதிவு செய்துள்ளார். பென்னி ஒலிவர் படத்தொகுப்பு பணிகளை மேற்கொண்டுள்ளார்.
முதல் பாகம் ஏற்படுத்திய இளமைத் துடிப்பையும் ரசிகர்களின் நினைவுகளையும் தக்க வைத்துக்கொண்டு, புதிய அனுபவத்துடன் உருவாகியுள்ள ‘மீசைய முறுக்கு 2’, செப்டம்பர் 25 முதல் உலகம் முழுவதும் திரையரங்குகளில் வெளியாகிறது.
இனி கவுண்ட்டவுன் தொடங்கியது… திரையரங்குகளில் ஒரு பிரம்மாண்ட இசைக் கொண்டாட்டத்திற்கு ரசிகர்கள் தயாராகலாம்!
