மீண்டும் கிராமிய கதையில் ஜீவா
சமீபத்தில் வெளியான ‘TTT’ திரைப்படத்தின் வெற்றியைத் தொடர்ந்து, நடிகர் ஜீவா தனது அடுத்த படத்திற்காக புதிய கதைக்களத்தில் இணைந்துள்ளார். இந்தப் படத்தை, விமர்சகர்கள் மற்றும் ரசிகர்களின் பாராட்டைப் பெற்ற ‘கிடா’ திரைப்படத்தின் இயக்குநர் ரா. வெங்கட் இயக்குகிறார்.
மதுரை மற்றும் அதன் சுற்றுவட்டார பகுதிகளை பின்னணியாகக் கொண்டு உருவாகும் இந்த திரைப்படம், அப்பா – மகன் உறவை மையமாகக் கொண்ட உணர்வுபூர்வமான குடும்பக் கதையாக உருவாகிறது. குடும்ப பாசம், உறவுகளின் ஆழம் மற்றும் வாழ்க்கையின் நுணுக்கமான உணர்வுகளை பேசும் இந்தக் கதை, அனைத்து தரப்பு ரசிகர்களையும் கவரும் வகையில் வடிவமைக்கப்பட்டுள்ளதாக கூறப்படுகிறது.
இந்தப் படத்தை தயாரிப்பாளர் கே. குமார் தயாரிக்கிறார். ஒளிப்பதிவை எம். சுகுமார் மேற்கொள்ள, படத்தொகுப்புப் பணிகளை கணேஷ் சிவா கவனிக்கிறார். அனுபவம் மிக்க தொழில்நுட்பக் குழுவின் பங்களிப்பால், படம் தரமான படைப்பாக உருவாகும் என்ற எதிர்பார்ப்பு எழுந்துள்ளது.
படத்தின் படப்பிடிப்பு அடுத்த மாதம் மதுரை மற்றும் அதன் சுற்றுவட்டார பகுதிகளில் ஒரே கட்டமாக தொடங்கப்பட உள்ளது. கதை, நடிகர்கள் மற்றும் தொழில்நுட்பக் குழுவின் வலிமையால், இந்த திரைப்படம் தற்போது திரையுலகில் பெரும் கவனத்தை ஈர்த்துள்ளது.
மதுரை மண்ணின் இயல்பான வாழ்க்கை முறையையும், அப்பா – மகன் உறவின் உணர்வுகளையும் நெகிழ்ச்சியுடன் பதிவு செய்யவிருக்கும் இந்த படம், ஜீவாவின் திரைப்பயணத்தில் மேலும் ஒரு முக்கியமான படைப்பாக அமையும் என எதிர்பார்க்கப்படுகிறது.
