நடிகர் காளிதாஸ் ஜெயராம் நடிப்பில், இயக்குநர் அஹம்மது கபீர் இயக்கியுள்ள காதல் மற்றும் நகைச்சுவை கலந்த திரைப்படம் ‘மெனி மெனி ஹேப்பி ரிட்டர்ன்ஸ்’ (Many Many Happy Returns). இப்படம் வரும் டிசம்பர் 4-ம் தேதி திரையரங்குகளில் வெளியாகிறது. தமிழ் மற்றும் மலையாளம் என இரு மொழிகளில் வெளியாகவுள்ள இப்படத்தின் ரிலீஸ் தேதியை அதிகாரப்பூர்வ போஸ்டருடன் படக்குழு அறிவித்துள்ளது. தமிழகத்தில் ரோமியோ பிக்சர்ஸ் நிறுவனம் சார்பில் ராகுல் இப்படத்தை வெளியிடுகிறார்.
காதல், நட்பு, குடும்ப உறவுகள் மற்றும் வாழ்க்கையில் மறக்க முடியாத நினைவுகள் ஆகியவற்றை மையமாகக் கொண்டு இப்படத்தின் கதை அமைக்கப்பட்டுள்ளது. நகைச்சுவை, காதல், இசை என அனைத்தும் கலந்த திரைக்கதையில், நமக்குப் பிடித்தமான மனிதர்கள் வாழ்க்கையில் ஏற்படுத்தும் தாக்கத்தையும், கடந்து சென்றதாக நினைக்கும் உறவுகள் நினைவுகளில் தொடர்ந்து பயணிப்பதையும் உணர்வுப்பூர்வமாகச் சொல்லும் படைப்பாக இப்படம் உருவாகியுள்ளது.
இப்படத்தில் காளிதாஸ் ஜெயராம், லட்சுமி ஜோதிஷ், லால், பொப்பன் அலுமூடன், சஞ்சு சானிச்சென், சோசம்மா மற்றும் ரெஞ்சித் சேகர் உள்ளிட்டோர் முக்கியக் கதாபாத்திரங்களில் நடித்துள்ளனர். அஹம்மது கபீர் மற்றும் ஹசன் ரஷீத் இணைந்து தயாரித்துள்ள இப்படத்திற்கு அஹம்மது கபீர் கதை எழுதியுள்ளார். ஜாபின் ஜான் மற்றும் அஹம்மது கபீர் இணைந்து திரைக்கதை அமைத்துள்ளனர்.
- Advertisement -
ஜிதின் ஸ்டானிஸ்லாஸ் ஒளிப்பதிவு செய்துள்ள இப்படத்திற்கு மகேஷ் புவனேந்த் படத்தொகுப்பு செய்துள்ளார். கோவிந்த் வசந்தா இசையமைத்துள்ளார். விஷ்ணு கோவிந்த் ஒலிப்பதிவுப் பணிகளையும், மஷார் ஹம்சா ஆடை வடிவமைப்பையும், ரோனெக்ஸ் சேவியர் ஒப்பனைப் பணிகளையும் கவனித்துள்ளனர். அனு விஸ்வநாதன் நடன இயக்குநராகப் பணியாற்றியுள்ளார்.
‘ஜூன்’ (2019), ‘மதுரம்’ (2021) ஆகிய திரைப்படங்களை இயக்கிய அஹம்மது கபீர், ஜியோ ஹாட்ஸ்டாரில் வெளியான ‘கேரளா கிரைம் ஃபைல்ஸ்’ இணையத் தொடரின் முதல் மற்றும் இரண்டாம் பாகங்களையும் இயக்கியுள்ளார். இவரது இயக்கத்தில் உருவாகியுள்ள ‘மெனி மெனி ஹேப்பி ரிட்டர்ன்ஸ்’ திரைப்படம் காதல், நட்பு, குடும்பம் மற்றும் பழைய நினைவுகளை மையமாகக் கொண்ட வித்தியாசமான ரொமாண்டிக் காமெடி அனுபவத்தை ரசிகர்களுக்கு வழங்கும் என எதிர்பார்க்கப்படுகிறது.
தமிழகத்தில் இப்படத்தை வெளியிடும் ரோமியோ பிக்சர்ஸ் நிறுவனம், தொடர்ந்து பல்வேறு திரைப்படங்களைத் தமிழ் ரசிகர்களிடம் கொண்டு சேர்த்து வருகிறது. அந்த வகையில், ‘மெனி மெனி ஹேப்பி ரிட்டர்ன்ஸ்’ திரைப்படத்தையும் தமிழகம் முழுவதும் திரையரங்குகளில் வெளியிடுகிறது.
இந்நிலையில், காளிதாஸ் ஜெயராம் நடிப்பில் உருவாகியுள்ள ‘மெனி மெனி ஹேப்பி ரிட்டர்ன்ஸ்’ திரைப்படம் வரும் டிசம்பர் 4-ம் தேதி தமிழ் மற்றும் மலையாளம் ஆகிய இரு மொழிகளிலும் திரையரங்குகளில் வெளியாகவுள்ளது.