சிவகார்த்திகேயன் நடிக்கும் ‘பராசக்தி’ படத்தில் ராணா..

சிவகார்த்திகேயன் ஹீரோவாக நடிக்கும் 25-வது படமான ‘பராசக்தி’ படத்தை சுதா கொங்கரா இயக்கி வருகிறார். இப்படம், அடுத்த ஆண்டு பொங்கலை முன்னிட்டு வெளியாகும் என எதிர்பார்க்கப்படுகிறது. இப்படத்தில் வில்லனாக ரவி மோகன் நடிக்கிறார். ஸ்ரீலீலா, அதர்வா முக்கிய கதாபாத்திரங்களில் நடிக்கின்றனர்.

டான் பிக்சர்ஸ் தயாரிக்கும் இந்தப் படத்துக்கு ஜி.வி.பிரகாஷ் குமார் இசையமைக்கிறார். ரவி கே.சந்திரன் ஒளிப்பதிவு செய்கிறார். பீரியட் படமான இது, கல்லூரி பின்னணியில் நடக்கும் இந்தி எதிர்ப்பு கதையைக் கொண்டது என கூறப்படுகிறது. இதன் அடுத்தகட்டப் படப்பிடிப்பு பொள்ளாச்சியில் சமீபத்தில் தொடங்கியுள்ளது.

இந்நிலையில், இதன் படப்பிடிப்பில் இருந்து எடுக்கப்பட்ட வீடியோ இணையத்தில் வெளியாகியுள்ளது. அதில் நடிகர் ராணா, ரசிகர்களுக்கு ஆட்டோகிராப் போடும் காட்சிகள் இடம்பெற்றுள்ளன. இதனால், அவர் இதில் நடிப்பது உறுதி செய்யப்பட்டுள்ளது. ஆனால், படக்குழு இதுகுறித்து ஏதும் தெரிவிக்கவில்லை.