என் பெற்றோரை பெருமையில் நெகிழ செய்த உங்களை வணங்குகிறேன்: பாலாவுக்கு, அருண் விஜய் கடிதம்..
இந்தியத் திரையில் கவனம் ஈர்த்த இயக்குனர்களில் பாலா குறிப்பிடத்தக்கவர். அதற்கு அவர் இயக்கிய சேது, பிதாமகன், பரதேசி படங்களே சான்று எனலாம்.
இந்நிலையில், வணங்கான் படத்திலிருந்து சூர்யா விலகிய சூழலில், அருண் விஜய்யை வைத்து படத்தை மீண்டும் ஆரம்பித்தார் பாலா.
படத்தின் அத்தனை வேலைகளும் முடிந்துவிட்டன. சில நாட்களுக்கு முன்புகூட வணங்கான் படத்தை அருண் விஜய் தனது தந்தை விஜயகுமார் மற்றும் தனது குடும்பத்தினருடன் பார்த்ததாகவும் அப்போது விஜயகுமார் கலங்கிவிட்டதாகவும் ஒரு தகவல் வெளியானது.
அதுமட்டுமின்றி, தனது மகனின் திரையுலக வாழ்க்கையில் வணங்கான் மிகப்பெரிய திருப்புமுனையை ஏற்படுத்தும் என்ற நம்பிக்கையில், விஜயகுமார் நெகிழ்ந்து விட்டதாகவும் கூறப்படுகிறது. அதுமட்டுமின்றி படத்தை பார்த்த பாலாவின் நண்பர்களும் இது அவருக்கு தரமான நிகழ்வாக அமையும் என்றும் கூறி வருகிறார்கள்.
இந்நிலையில், படத்தின் ரிலீஸ் பற்றிய அதிகாரப்பூர்வ அறிவிப்பு வந்திருக்கிறது. அதன்படி, வணங்கான் படமானது அடுத்த வருட பொங்கலுக்கு ரிலீஸாகும் என்று தெரிவிக்கப்பட்டிருக்கிறது.
முன்னதாக அருண் விஜய், பாலாவுக்கு நெகிழ்ச்சியுடன் எழுதிய கடிதத்தில், ‘மன நெகிழ்வுடனும் கனத்த இதயத்துடனும், என் இயக்குனர் திரு. பாலா சார் அவர்களுக்கு, நான் திரையுலகில் கால் பதித்த காலத்தில் இருந்து, உங்கள் படைப்புகளின் ரசிகனாகவும், உங்களைக் கண்டு வியந்து, நேசித்து, ஒரு நடிகனாக “எனக்கும் இப்படி ஒரு வாய்ப்பு கிடைக்காதா” என ஏங்கியவனுக்கு தங்களின் இயக்கத்தில் பணியாற்ற ‘வணங்கான்’ படத்தின் மூலம் வாய்ப்பளித்தமைக்கு மனமார்ந்த நன்றிகள்.
நம் படப்பிடிப்பின் பொழுது கூட இக்கதையின் பாதிப்பை நான் முழுமையாக உணரவில்லை. ஆனால், அதனை இப்பொழுது வெள்ளித்திரையில் காண்கையில், என் உணர்ச்சிகளை வெளிப்படுத்த வார்த்தைகள் இல்லை. என் பெற்றோரை பெருமையில் நெகிழ்வடைய செய்தமைக்கு உங்களை வணங்குகிறேன்.
எனது திரையுலக பயணத்தில், வணங்கான் ஒரு மிக முக்கியமான பாகமாக அமையும் என்பதில் எனக்கு துளி அளவும் சந்தேகமில்லை!
இப்படைப்பின் மீது முழுமையான நம்பிக்கை வைத்து, பக்க பலமாக இருந்து கொண்டிருக்கும் சுரேஷ் காமாட்சி அவர்களுக்கும் என் நெஞ்சார்ந்த நன்றிகள்.
மக்கள் அனைவரும் இப்படத்தை விரைவில் திரையில் காணும் நாளை மிகவும் ஆவலுடன் எதிர்நோக்கிக் காத்துக் கொண்டிருக்கும்’ என குறிப்பிட்டிருந்தார்.
முன்னதாக, பொங்கல் வெளியீடாக ‘வணங்கான்’ படமே முதலாவதாக அதிகாரப்பூர்வமாய் அறிவிக்கப்பட்டுள்ளது குறிப்பிடத்தக்கது.
