அவெஞ்சர்ஸ்: டூம்ஸ்டே படத்திற்கு இந்தியாவில் முன்பதிவு தொடக்கம்… ரசிகர்கள் உற்சாகம்!

மார்வெல் ஸ்டுடியோஸ் தயாரிப்பில் உருவாகியுள்ள ‘அவெஞ்சர்ஸ்: டூம்ஸ்டே’ திரைப்படத்திற்காக உலகம் முழுவதும் ரசிகர்கள் ஆவலுடன் காத்திருக்கின்றனர். இந்நிலையில், இந்தியாவில் இப்படத்திற்கான டிக்கெட் முன்பதிவு நள்ளிரவு 12 மணி முதல் அதிகாரப்பூர்வமாகத் தொடங்கியுள்ளது. இதனால் உற்சாகமடைந்த ரசிகர்கள் போட்டி போட்டுக்கொண்டு டிக்கெட்டுகளை முன்பதிவு செய்து வருகின்றனர்.
இந்தியாவில் முன்பதிவைத் தொடங்க வேண்டும் என ரசிகர்கள் சமூக வலைதளங்களில் #OpenDoomsdayBookings என்ற ஹேஷ்டேக்கில் தொடர்ந்து கோரிக்கை விடுத்து வந்தனர். ரசிகர்களின் இந்தக் கோரிக்கையைத் தொடர்ந்து தற்போது முன்பதிவு தொடங்கப்பட்டுள்ளது.
படம் வெளியாக இன்னும் ஒரு மாதமே உள்ள நிலையில், இந்தியா முழுவதும் கொண்டாட்டம் களைகட்டியுள்ளது. அதிகாலை 12.01 மணி முதல் இரவு 11.55 மணி வரை பல்வேறு காட்சிகள் திரையிடப்பட உள்ளன. மும்பை, பெங்களூரு, டெல்லி, ஹைதராபாத், கொச்சி உள்ளிட்ட முக்கிய நகரங்களில் டிக்கெட் விற்பனை விறுவிறுப்பாக நடைபெற்று வருகிறது. சில காட்சிகளுக்கான டிக்கெட்டுகள் ஏற்கெனவே விற்றுத் தீர்ந்துள்ளதாகவும் கூறப்படுகிறது.
இந்தியாவில் மட்டுமின்றி சர்வதேச அளவிலும் ‘அவெஞ்சர்ஸ்: டூம்ஸ்டே’ படத்திற்குப் பெரும் வரவேற்பு கிடைத்துள்ளது. உலகளவில் இப்படத்திற்கான முன்பதிவு விற்பனை 150 மில்லியன் அமெரிக்க டாலர்களைக் கடந்துள்ளதாகத் தகவல்கள் தெரிவிக்கின்றன. பிரீமியம் திரையரங்குகளுக்கான முன்பதிவு மட்டும் முதல் 24 மணி நேரத்தில் 16.5 மில்லியன் டாலர்களை ஈட்டியுள்ளது.
மேலும், இப்படத்தின் முதல் முழுநீள டிரெய்லர் வெளியான 24 மணி நேரத்திற்குள் 503 மில்லியன் பார்வைகளைக் கடந்து சாதனை படைத்துள்ளது. திரைப்பட வரலாற்றில் அதிக பார்வைகளைப் பெற்ற இரண்டாவது பெரிய டிரெய்லர் வெளியீடு என்ற பெருமையையும் பெற்றுள்ளது. இங்கிலாந்து, பிரேசில் உள்ளிட்ட நாடுகளிலும் முன்பதிவு விற்பனையில் புதிய சாதனைகளைப் படைத்துள்ளதாகக் கூறப்படுகிறது.
வர்த்தக வட்டாரக் கணிப்புகளின்படி, படத்தின் முதல் வார இறுதி உலகளாவிய வசூல் 1 பில்லியன் அமெரிக்க டாலர்களைக் கடக்க வாய்ப்புள்ளதாக எதிர்பார்க்கப்படுகிறது. இதன் மூலம் உலக பாக்ஸ் ஆபீஸ் வரலாற்றில் புதிய சாதனை உருவாகலாம் என்றும் கணிக்கப்பட்டுள்ளது.

இதற்கிடையே, இந்தியாவில் முன்பதிவைத் தொடங்கக் கோரி ரசிகர்கள் பல்வேறு விதங்களில் தங்களது கோரிக்கையை வெளிப்படுத்தினர். ‘மார்வெல் இந்தியா, எங்களை ஏன் கண்டுகொள்ளவில்லை? டூம்ஸ்டே முன்பதிவைத் தொடங்குங்கள்’ என்ற வாசகத்துடன் பதாகை ஏந்தி ரசிகர் ஒருவர் கவனம் ஈர்த்தார். மற்றொரு ரசிகர், ஜென் ஜீ தலைமுறையினரின் பொறுமை தீர்ந்துவிட்டதாக நகைச்சுவையாகப் பதிவிட்டு மார்வெல் இந்தியாவிடம் கோரிக்கை வைத்திருந்தார்.
தற்போது முன்பதிவு தொடங்கியுள்ளதால் இந்திய ரசிகர்கள் மகிழ்ச்சியடைந்துள்ளனர். அதிலும், அமெரிக்காவில் படம் வெளியாகும் தேதிக்கு ஒரு நாள் முன்னதாகவே இந்தியாவில் திரையிடப்படுவது ரசிகர்களுக்கு கூடுதல் உற்சாகத்தை அளித்துள்ளது.
வரும் டிசம்பர் 17ஆம் தேதி திரையரங்குகளில் வெளியாகும் ‘அவெஞ்சர்ஸ்: டூம்ஸ்டே’ திரைப்படம், ஆங்கிலம், இந்தி, தமிழ் மற்றும் தெலுங்கு ஆகிய மொழிகளில் வெளியாகிறது. மேலும், மார்வெல் ஸ்டுடியோஸ் பிரசண்ட்ஸ், இன்ஃபினிட்டி விஷன் உள்ளிட்ட பிரீமியம் திரையரங்குத் தொழில்நுட்ப வடிவங்களிலும் இப்படத்தைக் காணலாம்.
ரசிகர்களின் நீண்ட நாள் கோரிக்கைக்கு மார்வெல் தற்போது பதிலளித்துள்ள நிலையில், ‘அவெஞ்சர்ஸ்: டூம்ஸ்டே’ படத்தின் வெளியீட்டிற்கான எதிர்பார்ப்பு மேலும் அதிகரித்துள்ளது.
