ஜெயில் மேட்ஸ் திரைப்படத்தின் டைட்டில் டீசர் வெளியீடு!

‘புதிய கீதை’, ‘கோடம்பாக்கம்’, ‘ராமன் தேடிய சீதை’, ‘என் ஆளோட செருப்ப காணோம்’ உள்ளிட்ட படங்களை இயக்கியவர் இயக்குநர் K.P. ஜெகன். ‘மிக மிக அவசரம்’ படத்திற்கு கதை, வசனம் எழுதியதுடன், பத்து இயக்குநர்கள் இணைந்து நடித்த ‘மாயாண்டி குடும்பத்தார்’ படத்திலும் முக்கியக் கதாபாத்திரத்தில் நடித்துப் பாராட்டுகளைப் பெற்றவர். இவர் தற்போது இயக்கி, நடிக்கும் புதிய திரைப்படம் ‘ஜெயில் மேட்ஸ்’ (Jail Mates).

தென்னிந்தியாவில் முதல் முறையாக மெட்டா சினிமா (Meta Cinema) பாணியில் உருவாகியுள்ள இப்படத்தில், இயக்குநர் K.P. ஜெகன் தனது பெயரிலேயே இயக்குநர் கதாபாத்திரத்தில் நடித்துள்ளார். விஜய் வர்மா மற்றொரு கதாநாயகனாக நடிக்க, அவருக்கு ஜோடியாக ‘வடம்’ படத்தில் நடித்த சனாஷ்கா ஸ்ரீ நடித்துள்ளார். மேலும், மௌனிகா சந்தோஷ், அருள்தாஸ், வெற்றிவேல் ராஜா, உறியடி சங்கர், சாய் அபிநயா, வீரசமர், கதிரவன் பாலு, திண்டுக்கல் அலெக்ஸ் உள்ளிட்ட பலர் முக்கியக் கதாபாத்திரங்களில் நடித்துள்ளனர். தேசிய விருது பெற்ற நடிகர் எம்.எஸ். பாஸ்கர், சிவனடியார் வேடத்தில் சிறப்புத் தோற்றத்தில் நடித்துள்ளார்.

இப்படத்திற்கு ஸ்ரீகாந்த் தேவா இசையமைத்துள்ளார். இயக்குநர் விக்னேஷ் சிவன் ஒரு பாடலையும், பாடலாசிரியர் கார்த்திக் நேத்தா மற்றும் இயக்குநர் திரைவண்ணன் இணைந்து மற்றொரு பாடலையும் எழுதியுள்ளனர். அறிமுகப் பெண் கவிஞர் சக்தி உமா பாலகிருஷ்ணா ஒரு பாடலை எழுதியுள்ளார். மறைந்த தேனிசைத் தென்றல் தேவா இறுதியாகப் பாடிய மனதை உருக்கும் ஆன்மீகப் பாடலும் இப்படத்தில் இடம்பெற்றுள்ளது குறிப்பிடத்தக்கது.

அறிமுக ஒளிப்பதிவாளர் சுக செல்வம் ஒளிப்பதிவு செய்துள்ள இப்படத்திற்கு மணிகண்டன் சிவக்குமார் படத்தொகுப்புப் பணிகளை மேற்கொண்டுள்ளார். கலை இயக்கத்தை வீரசமர் கவனித்துள்ளார். குறிப்பாக, படத்தின் இரண்டாம் பாதி பெரும்பாலும் இயற்கையாகப் பெய்த மழையிலேயே படமாக்கப்பட்டுள்ளது.

யுனைடெட் ஆர்ட்ஸ் நிறுவனம் இப்படத்தைத் தயாரித்துள்ளது. தயாரிப்பு மேலாண்மையை சாமுவேல் சிவராஜ் மேற்கொண்டுள்ளார். முழுப் படமும் திருச்செந்தூர் மற்றும் அதன் சுற்றுவட்டாரப் பகுதிகளில் படமாக்கப்பட்டுள்ளது. 2017ஆம் ஆண்டு இயக்குநர் K.P. ஜெகனின் வாழ்க்கையில் நிகழ்ந்த உண்மைச் சம்பவத்தை அடிப்படையாகக் கொண்டு இப்படத்தின் கதை உருவாக்கப்பட்டுள்ளது.

எதார்த்தமான நகைச்சுவையுடன் திரில்லர் அம்சங்களும் கலந்த படைப்பாக உருவாகியுள்ள ‘ஜெயில் மேட்ஸ்’ படத்தின் அனைத்து பணிகளும் நிறைவடைந்துள்ளன. இப்படத்தைப் பார்த்த இயக்குநர்கள் பாண்டிராஜ் மற்றும் விக்னேஷ் சிவன் ஆகியோர், படத்திற்கு ஆதரவளிக்கும் விதமாகத் தங்களது நிறுவனத்தின் மூலம் வெளியிட முன்வந்துள்ளனர்.

இந்நிலையில், ‘ஜெயில் மேட்ஸ்’ திரைப்படத்தின் டைட்டில் டீசர் தற்போது வெளியாகியுள்ளது. படத்தின் பாடல் வெளியீட்டு விழா மற்றும் திரையரங்க வெளியீட்டுத் தேதி குறித்த அறிவிப்புகள் விரைவில் வெளியாகும் எனப் படக்குழு தெரிவித்துள்ளது.