கமல்ஹாசன் பிறந்தநாளில் தொடங்கிய ‘சண்டியர்’ படப்பிடிப்பு!
நடிகர் கமல்ஹாசனின் பிறந்தநாள் கொண்டாட்டத்தை மேலும் சிறப்பிக்கும் வகையில், இயக்குநர் எஸ்.யு. அருண்குமார் இயக்கத்தில் அவர் நடிக்கும் மிகவும் எதிர்பார்க்கப்பட்ட ‘சண்டியர்’ திரைப்படத்தின் படப்பிடிப்பு இன்று (நவம்பர் 7) அதிகாரப்பூர்வமாகத் தொடங்கியுள்ளது.
கமல்ஹாசனின் பிறந்தநாளை முன்னிட்டு, நேற்று (நவம்பர் 6) இப்படத்தின் தலைப்பான ‘சண்டியர்’ படக்குழுவினரால் அதிகாரப்பூர்வமாக அறிவிக்கப்பட்டது. இந்தத் தலைப்பு ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது.
ஏற்கனவே இப்படத்திற்காக கமல்ஹாசன் மேற்கொண்ட லுக் டெஸ்ட் புகைப்படங்கள் வெளியாகி கவனம் ஈர்த்த நிலையில், தற்போது படப்பிடிப்பும் தொடங்கியுள்ளதால் ரசிகர்கள் உற்சாகமடைந்துள்ளனர்.
தனித்துவமான கதை சொல்லல் முறைக்குப் பெயர் பெற்ற இயக்குநர் எஸ்.யு. அருண்குமார், இந்தியத் திரையுலகின் பன்முகக் கலைஞரான கமல்ஹாசனுடன் முதன்முறையாக இணைந்துள்ளார். இந்தக் கூட்டணி திரையில் எத்தகைய அனுபவத்தை வழங்கும் என்ற எதிர்பார்ப்பு அதிகரித்துள்ளது.
இப்படத்திற்கு அனிருத் ரவிச்சந்தர் இசையமைக்கிறார். அன்பறிவ் சண்டைப் பயிற்சி இயக்குநர்களாகவும், கே.எஸ். சுனில் ஒளிப்பதிவாளராகவும், சி.எஸ். பாலச்சந்தர் தயாரிப்பு வடிவமைப்பாளராகவும், அம்ரிதா ராம் ஆடை வடிவமைப்பாளராகவும் பணியாற்றுகின்றனர்.
ராஜ்கமல் ஃபிலிம்ஸ் இன்டர்நேஷனல் (RKFI) மற்றும் டர்மெரிக் மீடியா நிறுவனங்கள் சார்பில் கமல்ஹாசன் மற்றும் ஆர். மகேந்திரன் இணைந்து இப்படத்தைத் தயாரிக்கின்றனர்.
நவம்பர் 6-ம் தேதி தலைப்பு அறிவிப்பு, நவம்பர் 7-ம் தேதி படப்பிடிப்புத் தொடக்கம் என அடுத்தடுத்த அறிவிப்புகளால் ‘சண்டியர்’ திரைப்படம் ரசிகர்கள் மத்தியில் கவனம் பெற்று வருகிறது. இப்படத்தில் நடிக்கும் மற்ற நடிகர்கள் மற்றும் தொழில்நுட்பக் கலைஞர்கள் குறித்த கூடுதல் விவரங்கள் விரைவில் வெளியாகும் என எதிர்பார்க்கப்படுகிறது.
