சூரியின் மண்டாடி படத்திற்கு U/A 16+ சான்றிதழ்
சூரி நடிப்பில் உருவாகியுள்ள ‘மண்டாடி’ திரைப்படத்திற்கு மத்திய திரைப்பட தணிக்கை வாரியம் U/A 16+ சான்றிதழ் வழங்கியுள்ளது. இதையடுத்து, படம் செப்டம்பர் 10-ஆம் தேதி உலகம் முழுவதும் திரையரங்குகளில் வெளியாகிறது.
மதிமாறன் புகழேந்தி இயக்கியுள்ள இப்படத்தில் சூரியுடன் மகிமா நம்பியார், சுஹாஸ், சத்யராஜ், ரவீந்திர விஜய், பால சரவணன், மிதுன் உள்ளிட்டோர் முக்கிய கதாபாத்திரங்களில் நடித்துள்ளனர். ஆர்.எஸ். இன்ஃபோடெயின்மென்ட் சார்பில் எல்ரெட் குமார் தயாரித்துள்ள இப்படத்திற்கு ஜி.வி. பிரகாஷ் குமார் இசையமைத்துள்ளார்.
கடலோர மக்களின் வாழ்க்கை, பாரம்பரியம் மற்றும் பாய்மரப் படகுப் போட்டிகளை மையமாகக் கொண்டு உருவாகியுள்ள ஸ்போர்ட்ஸ் ஆக்ஷன் டிராமாவாக ‘மண்டாடி’ உருவாகியுள்ளது. படத்திலிருந்து வெளியாகியுள்ள “மண்டாடி மண்டாடி”, “உசுரே நீதான் புள்ள” ஆகிய பாடல்கள் ரசிகர்களிடம் வரவேற்பைப் பெற்றுள்ளன.
முன்னதாக செப்டம்பர் 4-ஆம் தேதி வெளியாகும் என அறிவிக்கப்பட்டிருந்த நிலையில், தற்போது வெளியீட்டு தேதி செப்டம்பர் 10-ஆம் தேதிக்கு மாற்றப்பட்டுள்ளது. சுமார் 2 மணி 34 நிமிடங்கள் ஓடும் இப்படம் தமிழ், தெலுங்கு மற்றும் இந்தி மொழிகளில் வெளியாக உள்ளது.
