ரவி தேஜாவின் இருமுடி கட்டு படத்தின் க்ளிம்ஸ் விடியோ!

மைத்ரி மூவி மேக்கர்ஸ் தயாரிப்பில், மாஸ் மகாராஜா ரவி தேஜா நடிக்கும் ‘இருமுடி கட்டு’ திரைப்படத்தின் விஷுவல் கிளிம்ப்ஸ் வெளியாகி ரசிகர்களிடையே பெரும் வரவேற்பைப் பெற்றுள்ளது. தமிழ் மற்றும் தெலுங்கு ஆகிய இரு மொழிகளில் உருவாகும் இந்த திரைப்படம், ரவி தேஜாவின் முதல் இருமொழி திரைப்படமாக உருவாகியுள்ளது.

பான் இந்திய அளவில் பல வெற்றிப் படங்களை வழங்கி வரும் மைத்ரி மூவி மேக்கர்ஸ் நிறுவனம், இந்த முறை குடும்ப உறவுகள், ஆன்மிகம் மற்றும் மனிதனின் உள்ளார்ந்த மாற்றத்தை மையமாகக் கொண்ட கதைக்களத்தை கையில் எடுத்துள்ளது. இயக்குநர் சிவா நிர்வாணா இயக்கத்தில் உருவாகும் இப்படம், உணர்வுகளுக்கு முக்கியத்துவம் அளிக்கும் குடும்ப பொழுதுபோக்கு திரைப்படமாக உருவாகி வருகிறது.

சமீபத்தில் வெளியிடப்பட்ட விஷுவல் கிளிம்ப்ஸில், ரசிகர்கள் இதுவரை பார்த்திராத ஒரு புதிய ரவி தேஜாவை காண முடிகிறது. மகளை உயிராக நேசிக்கும் அன்பான தந்தையாகவும், கோபம் மற்றும் வேதனைகளால் போராடும் மனிதராகவும், பின்னர் பகவான் ஐயப்பனின் பாதையைத் தேர்ந்தெடுத்து ஆன்மிக மாற்றத்தை நோக்கி பயணிக்கும் நபராகவும் அவர் தோன்றுகிறார்.

அப்பா – மகள் உறவை மையமாகக் கொண்டு நகரும் இந்த திரைப்படம், உறவுகளின் மதிப்பு, தியாகம், நம்பிக்கை மற்றும் வாழ்க்கையின் மாற்றங்களை உணர்வுப்பூர்வமாக பதிவு செய்கிறது. குறிப்பாக ஐயப்ப பக்தி மற்றும் ‘இருமுடி’ என்ற ஆன்மிக அடையாளத்தை கதையின் முக்கிய அம்சமாக பயன்படுத்தியிருப்பது படத்தின் மீது கூடுதல் கவனத்தை ஏற்படுத்தியுள்ளது.

இப்படத்தில் பிரியா பவானி சங்கர் கதாநாயகியாக நடித்துள்ளார். அவருடன் சாய் குமார், பேபி நக்ஷத்ரா, அஜய் கோஷ், ரமேஷ் இந்திரா, ஸ்வாசிகா, மீசாலா லக்ஷ்மண், ராஜ்குமார் காசிரெட்டி, ரமணா பார்கவ், கிஷோர் காஞ்சரபாளம், கார்த்திக் அடுசுமல்லி உள்ளிட்ட பலர் முக்கிய கதாபாத்திரங்களில் நடித்துள்ளனர்.

ஜி.வி. பிரகாஷ்குமார் இசையமைக்கும் இப்படத்திற்கு விஷ்ணு ஷர்மா ஒளிப்பதிவு செய்துள்ளார். படத்தொகுப்பை பிரவீன் புடி மேற்கொண்டுள்ள நிலையில், தயாரிப்பு வடிவமைப்பை சாஹி சுரேஷ் கவனித்துள்ளார்.

வெளியாகியுள்ள விஷுவல் கிளிம்ப்ஸ், உணர்வுகள், ஆன்மிகம் மற்றும் குடும்ப பாசம் ஆகியவற்றின் கலவையாக ரசிகர்களை கவர்ந்துள்ளது. திரைப்படத்தின் தலைப்பான ‘இருமுடி கட்டு’ கூட கதையின் ஆன்மிக சாரத்தையும், நாயகனின் வாழ்க்கைப் பயணத்தையும் பிரதிபலிப்பதாக அமைந்துள்ளது.

பெரும் எதிர்பார்ப்பை ஏற்படுத்தியுள்ள ‘இருமுடி கட்டு’, 2026 ஆகஸ்ட் மாதம் உலகம் முழுவதும் திரையரங்குகளில் வெளியாக உள்ளது.