விஜய் ஆண்டனியின் அப்பா குட்டி படத்தைப் பார்த்து கண்கலங்கிய தனஞ்செயன்

விஜய் ஆண்டனி நடிப்பில், இயக்குநர் மு. மாறன் இயக்கத்தில் உருவாகியுள்ள திரைப்படம் ‘அப்பா குட்டி’. தந்தைக்கும் மகளுக்கும் இடையிலான அன்பு, பாசம் மற்றும் உணர்வுபூர்வமான உறவை மையமாகக் கொண்டு இப்படம் உருவாகியுள்ளது. இப்படத்தில் விஜய் ஆண்டனிக்கு ஜோடியாக ப்ரீத்தி அஸ்ராணி நடித்துள்ளார். பேபி லிதன்யா முக்கிய கதாபாத்திரத்தில் நடித்துள்ளார்.

இப்படத்தின் பத்திரிகையாளர் சந்திப்பு சென்னையில் நடைபெற்றது. இதில் படக்குழுவினர் கலந்துகொண்டு படத்தின் உருவாக்க அனுபவங்களையும், படத்தில் இடம்பெற்றுள்ள சிறப்பம்சங்களையும் பகிர்ந்துகொண்டனர்.

நிகழ்ச்சியில் பேசிய தயாரிப்பாளர் தனஞ்செயன், “சுமார் நான்கு மாதங்களுக்கு முன்பே ‘அப்பா குட்டி’ படத்தைப் பார்த்தேன். விஜய் ஆண்டனி தனது படத்தின் எடிட்டிங் முடிந்ததும் என்னை அழைத்து கருத்துக் கேட்பார். அப்படித்தான் நானும் என் மனைவியும் இப்படத்தைப் பார்த்தோம். படம் முடிந்தபோது என் கண்களில் கண்ணீர் வந்தது. என் மனைவியும் அழுதுவிட்டார். அந்த அளவுக்கு இப்படம் எங்களை உணர்வுபூர்வமாகப் பாதித்தது.

‘தெய்வத்திருமகள்’ படத்தில் விக்ரம் சிறப்பாகத் தந்தையாக நடித்திருந்தார். அதேபோல், ஒரு தந்தை தனது மகளுக்காக எவ்வளவு தூரம் செல்ல முடியும் என்பதை இந்தப் படத்தில் விஜய் ஆண்டனி வெளிப்படுத்தியிருக்கிறார். இந்தப் படத்திற்குப் பிறகு அவரது நடிப்பை ரசிகர்கள் கொண்டாடுவார்கள்.

இயக்குநர் மு. மாறன் சுமார் 60 நாட்களில் ஒரே ஷெட்யூலில் படத்தை உருவாக்கியிருக்கிறார். ப்ரீத்தி அஸ்ராணி சவாலான கதாபாத்திரத்தை ஏற்று சிறப்பாக நடித்துள்ளார். பேபி லிதன்யாவின் நடிப்பும் மிகவும் அருமையாக இருக்கிறது.

தமிழ் தெரியாத சர்வதேச ஓடிடி நிறுவனப் பிரதிநிதிகளுக்குப் படத்தைத் திரையிட்டபோது, மொழி புரியாமலேயே கதையுடன் ஒன்றிப்போய்ப் பார்த்தனர். இடைவேளையின்போதுகூட படத்தை நிறுத்த வேண்டாம் என்று கூறினர். படம் முடிந்ததும் பாராட்டியதோடு, வாங்குவதற்கான பேச்சுவார்த்தையையும் தொடங்கினர். மேலும், Zee நிறுவனம் படத்தின் சாட்டிலைட் உரிமையைக் கைப்பற்றியுள்ளது. ஃபைவ் ஸ்டார் செந்திலும் தனது குடும்பத்துடன் படத்தைப் பார்த்துவிட்டு வெளியீட்டு உரிமையைக் கைப்பற்றினார்.

படம் முடிந்து வெளியே வரும்போது உங்கள் கண்களில் ஒரு சொட்டு கண்ணீராவது வரும் என நம்புகிறேன். நவம்பர் 20-ம் தேதி வெளியாகும் இப்படத்தை ரசிகர்கள் கொண்டாட வேண்டும்” என்று தெரிவித்தார்.

தொடர்ந்து பேசிய நடிகை ப்ரீத்தி அஸ்ராணி, “அப்பாக்கள் தங்களுடைய அன்பையும் உணர்வுகளையும் அதிகம் வெளிப்படுத்துவதில்லை. அவர்கள் நமக்காகச் செய்யும் தியாகங்களைப் பல நேரங்களில் நாம் கவனிப்பதில்லை. இந்தப் படத்தைப் பார்த்துவிட்டு பலரும் தங்களுடைய அப்பாவுக்குத் தொலைபேசியில் அழைத்துப் பேசுவார்கள் என்று நம்புகிறேன்” என்றார்.

இயக்குநர் மு. மாறன் பேசுகையில், இதற்கு முன்பு தான் இயக்கிய மூன்று படங்களும் கிரைம் த்ரில்லர் கதைக்களத்தில் அமைந்திருந்ததாகவும், இந்த முறை முற்றிலும் மாறுபட்ட கதையை முயற்சி செய்துள்ளதாகவும் தெரிவித்தார். கதையின் முதல் பாதியைக் கேட்டதுமே விஜய் ஆண்டனி நடிக்க ஒப்புக்கொண்டதாகவும், இரண்டாம் பாதியைக் கேட்டதும் உடனடியாகப் படத்தைத் தொடங்கலாம் என்று கூறியதாகவும் அவர் பகிர்ந்துகொண்டார்.

நிகழ்ச்சியில் பேசிய விஜய் ஆண்டனி, இப்படத்தின் முதல் பாதியைக் கேட்டதுமே கதை பிடித்துவிட்டதாகவும், கிளைமாக்ஸ் மிகவும் சிறப்பாக அமைந்துள்ளதாகவும் தெரிவித்தார். மேலும், இந்த நிகழ்வில் ‘பிச்சைக்காரன் 3’ குறித்த அறிவிப்பு வெளியானது மகிழ்ச்சியளிப்பதாகவும், அந்தப் படமும் விரைவில் வெளியாகும் என நம்புவதாகவும் கூறினார்.

விஜய் ஆண்டனி இசையமைத்து படத்தொகுப்பும் செய்துள்ள இப்படத்திற்கு ராஜீவ் ராஜேந்திரன் ஒளிப்பதிவு செய்துள்ளார். ஃபைவ் ஸ்டார் செந்தில் திரையரங்க வெளியீட்டு உரிமையைக் கைப்பற்றியுள்ளார். பெரும் எதிர்பார்ப்பை ஏற்படுத்தியுள்ள ‘அப்பா குட்டி’ திரைப்படம் நவம்பர் 20, 2026 அன்று உலகம் முழுவதும் திரையரங்குகளில் வெளியாகிறது.