‘தி பாரடைஸ்’ மறுபடப்பிடிப்பில் நானி? – வதந்திகளுக்கு முற்றுப்புள்ளி வைத்த படக்குழு!
இயக்குநர் ஸ்ரீகாந்த் ஓடிலா இயக்கத்தில், தெலுங்குத் திரையுலகின் ‘நேச்சுரல் ஸ்டார்’ நானி நடிப்பில் உருவாகி வரும் திரைப்படம் ‘தி பாரடைஸ்’ (The Paradise). பிரம்மாண்ட பொருட்செலவில் உருவாகும் இந்தப் படம் குறித்து கடந்த சில நாட்களாக சமூக வலைதளங்களில் பரவி வந்த வதந்திகளுக்கு படக்குழுவினர் தற்போது அதிகாரப்பூர்வமாக விளக்கம் அளித்துள்ளனர்.
இந்தப் படத்தில் நடிகர் மோகன் பாபு உள்ளிட்ட பல முன்னணி நட்சத்திரங்கள் நடித்து வருகின்றனர். படப்பிடிப்பு விறுவிறுப்பாக நடைபெற்று வரும் சூழலில், ஏற்கனவே படமாக்கப்பட்ட சில காட்சிகள் நடிகர் நானிக்கு திருப்தி அளிக்கவில்லை என்றும், அதனால் பல காட்சிகளை மீண்டும் படமாக்க (Reshoot) படக்குழு திட்டமிட்டுள்ளதாகவும் தகவல்கள் வெளியாகின.
படம் மிகப்பெரிய பட்ஜெட்டில் உருவாகி வருவதால், இந்த மறுபடப்பிடிப்பு செய்தி தயாரிப்பு தரப்பிற்கு நஷ்டத்தை ஏற்படுத்தும் என ரசிகர்கள் மற்றும் திரைத்துறையினர் மத்தியில் அதிர்ச்சியை ஏற்படுத்தியது.
இந்த யூகங்களுக்கு முற்றுப்புள்ளி வைக்கும் வகையில் ‘தி பாரடைஸ்’ படக்குழுவினர் வெளியிட்டுள்ள செய்திக் குறிப்பில் கூறியிருப்பதாவது:
துல்லியமான திட்டமிடல்: “தி பாரடைஸ் படம் முதல் நாளிலிருந்தே முழுமையான தெளிவுடன் திட்டமிடப்பட்டது. தற்போது பணிகள் திட்டமிட்டபடியே மிகச் சரியாக நடைபெற்று வருகின்றன.”
மறுபடப்பிடிப்பு இல்லை: “இதுவரை 100 நாட்களுக்கும் மேலான படப்பிடிப்பு வெற்றிகரமாக முடிந்துள்ளது. இன்றுவரை ஒரு காட்சி கூட மறுபடப்பிடிப்பு செய்யப்படவில்லை. எதிர்காலத்திலும் அப்படி ஒரு திட்டம் இல்லை.”
தரம் குறையாது: “முதலில் என்ன பிரம்மாண்டத்துடனும், தரத்துடனும் இந்தப் படம் கற்பனை செய்யப்பட்டதோ, அதே தீவிரத்துடன் பணிகள் நடைபெற்று வருகின்றன.”
ரிலீஸ் தேதி அறிவிப்பு:
வதந்திகளை நம்ப வேண்டாம் என்று கேட்டுக்கொண்ட படக்குழுவினர், படத்தின் வெளியீட்டுத் தேதியையும் உறுதிப்படுத்தியுள்ளனர். அதன்படி, ஆகஸ்ட் 21-ம் தேதி ‘தி பாரடைஸ்’ திரைப்படம் உலகம் முழுவதும் பிரம்மாண்டமாகத் திரைக்கு வரவுள்ளது.
இயக்குநர் ஸ்ரீகாந்த் ஓடிலா மற்றும் நானி கூட்டணியில் ஏற்கனவே வெளியான ‘தசரா’ திரைப்படம் மிகப்பெரிய வெற்றியைப் பெற்ற நிலையில், இந்தப் படமும் அதே போன்ற ஒரு மேஜிக்கை நிகழ்த்தும் என ரசிகர்கள் ஆவலுடன் காத்திருக்கின்றனர்.
