யுவன் சங்கர் ராஜா இசையில் விக்ரம் பிரபு நடிக்கும் புதிய திரைப்படம்!

ரோமியோ பிக்சர்ஸ் தயாரிப்பில் விக்ரம் பிரபுவின் 26வது படம்; யுவன் சங்கர் ராஜா இசையில் புதிய ஆக்சன் திரில்லர்!

தமிழ் சினிமாவில் தரமான மற்றும் வணிகரீதியாக வெற்றி பெறும் திரைப்படங்களை தொடர்ந்து வழங்கி வரும் ரோமியோ பிக்சர்ஸ், தனது அடுத்த பிரம்மாண்ட தயாரிப்பை அதிகாரப்பூர்வமாக அறிவித்துள்ளது. நடிகர் விக்ரம் பிரபு கதாநாயகனாக நடிக்கும் இந்த புதிய திரைப்படத்தை அறிமுக இயக்குநர் சித்தார்த் இயக்குகிறார். விக்ரம் பிரபுவின் திரைப்பயணத்தில் இது 26வது திரைப்படமாக உருவாகுகிறது.

தங்க சந்தையை மையமாகக் கொண்ட விறுவிறுப்பான கதைக்களத்தில் உருவாகும் இந்த திரைப்படம், ஆக்சன், சஸ்பென்ஸ் மற்றும் கமர்ஷியல் அம்சங்கள் நிறைந்த திரில்லர் படைப்பாக உருவாக உள்ளது. ரசிகர்களுக்கு புதுமையான திரையரங்கு அனுபவத்தை வழங்கும் நோக்கில் படக்குழு பணிகளை தீவிரமாக மேற்கொண்டு வருகிறது.

இப்படத்தின் படப்பிடிப்பு இம்மாத இறுதியில் தொடங்கவுள்ளதாக தகவல் வெளியாகியுள்ளது. முதல் கட்ட படப்பிடிப்பு சென்னையில் நடைபெறவுள்ளது. தற்போது நடிகர், நடிகைகள் மற்றும் முக்கிய கதாபாத்திரங்களுக்கான தேர்வு பணிகள் நடைபெற்று வருகின்றன.

சமீப ஆண்டுகளில் ‘டாணாக்காரன்’, ‘சிறை’ உள்ளிட்ட படங்கள் மூலம் தனது நடிப்புத் திறனை நிரூபித்துள்ள விக்ரம் பிரபு, கதைத்தேர்வுகளில் தனித்துவத்தை கடைபிடித்து வருகிறார். அந்த வரிசையில் உருவாகும் இந்த புதிய திரைப்படமும் அவரது திரைப்பயணத்தில் முக்கியமான மைல்கல்லாக அமையும் என எதிர்பார்க்கப்படுகிறது.

தரமான கதைக்களங்களை தேர்வு செய்து வெற்றிகரமான திரைப்படங்களை தயாரித்து வரும் ரோமியோ பிக்சர்ஸ், இந்தப் படத்தையும் உயர்தர தொழில்நுட்பங்களுடன் பிரம்மாண்ட பொருட்செலவில் உருவாக்கத் திட்டமிட்டுள்ளது.

இப்படத்திற்கு இசையமைப்பாளராக யுவன் சங்கர் ராஜா இணைந்துள்ளார். அவரது இசை படத்திற்கு கூடுதல் பலமாக அமையும் என எதிர்பார்க்கப்படுகிறது. ஒளிப்பதிவை கார்த்திக் ஷராஜ் மேற்கொள்கிறார். படத்தொகுப்பை அருள் மோசஸ் கவனிக்கிறார்.

இதனிடையே, ரோமியோ பிக்சர்ஸ் நிறுவனத்தின் தயாரிப்பில் நடிகர் ரவி மோகன் நடிக்கும் ஒரு திரைப்படமும், ஆகாஷ் முரளி கதாநாயகனாக நடிக்கும் மற்றொரு படமும் தயாரிப்பில் இருப்பது குறிப்பிடத்தக்கது.

விக்ரம் பிரபு – யுவன் சங்கர் ராஜா – சித்தார்த் கூட்டணியில் உருவாகும் இந்த புதிய திரைப்படம் குறித்த அடுத்தடுத்த அறிவிப்புகளை ரசிகர்கள் ஆவலுடன் எதிர்நோக்கி வருகின்றனர்.