லட்சுமிகாந்தன் கொலை வழக்கு பத்திரிகையாளர் சந்திப்பில் படக்குழு உற்சாகம்!

மாநில அரசின் விருது பெற்ற இயக்குநர் தயாள் பத்மநாபன் இயக்கியுள்ள புதிய தமிழ் திரைப்படம் ‘லட்சுமிகாந்தன் கொலை வழக்கு’ ஜூன் 25, 2026 அன்று உலகம் முழுவதும் திரையரங்குகளில் வெளியாக உள்ளது. 2M சினிமாஸ் மற்றும் D பிக்சர்ஸ் சார்பில் கே.வி. ஷபரீஷ் தயாரித்துள்ள இப்படத்தில் வெற்றி, ரங்கராஜ் பாண்டே, பிரிகிடா சாகா, சரவணன், லிஸ்ஸி ஆண்டனி, அருவி மதன், கவிதா பாரதி, சுப்பிரமணியம் சிவா உள்ளிட்டோர் முக்கிய கதாபாத்திரங்களில் நடித்துள்ளனர்.

சென்னையில் நடைபெற்ற பத்திரிகையாளர் சந்திப்பில், படத்தின் Visual Synopsis மற்றும் கதாபாத்திர அறிமுக வீடியோ ஊடகங்களுக்கு பிரத்யேகமாக திரையிடப்பட்டது. இது படத்தின் மீதான எதிர்பார்ப்பை மேலும் உயர்த்தியது.

நிகழ்வில் பேசிய நடிகரும் எழுத்தாளருமான கவிதா பாரதி, “தயாள் பத்மநாபன் தரமான மற்றும் துணிச்சலான படைப்புகளை வழங்கும் இயக்குநர். இந்த திரைப்படம் பார்வையாளர்களுக்கு புதுமையான அனுபவமாக இருக்கும்” என்றார்.

ஒளிப்பதிவாளர் எம்.வி. பன்னீர்செல்வம், “திரைக்கதை வலுவாக இருக்கும் போது தொழில்நுட்பக் கலைஞர்களும் தங்களின் சிறந்த பங்களிப்பை வழங்க முடியும். இந்த படம் பார்வையாளர்களுக்கு ஒரு காட்சிவிருந்தாக அமையும்” என தெரிவித்தார்.

இசையமைப்பாளர் தர்புகா சிவா, “திரைக்கதை கேட்டதை மட்டுமே செய்ய வேண்டும் என்ற நேர்மையுடன் தயாள் சார் இந்த படத்தை உருவாக்கியுள்ளார். இந்தப் படம் எனக்கு மிகுந்த திருப்தியை அளித்துள்ளது” என்றார்.

நடிகர் வெற்றி, “தயாள் சார் போன்ற திட்டமிடலுடன் செயல்படும் இயக்குநரை நான் பார்த்ததில்லை. அவருடன் பணியாற்றியது மறக்க முடியாத அனுபவம்” என்று கூறினார்.

நடிகை பிரிகிடா சாகா, “எனக்கு வழங்கப்பட்ட கதாபாத்திரம் மிகவும் நெருக்கமானது. இந்த படம் என் திரைப்பயணத்தில் சிறப்பான இடம் பெறும்” என்றார்.

நடிகரும் இயக்குநருமான சுப்பிரமணியம் சிவா, “வணிக மற்றும் மாற்று சினிமாவுக்கு இடையிலான இடைவெளியை இந்த படம் அழகாக இணைக்கிறது” என பாராட்டினார்.

இயக்குநர் தயாள் பத்மநாபன் பேசுகையில், “இது எனது 22வது திரைப்படமும், மூன்றாவது தமிழ் படமும் ஆகும். 1972-ஆம் ஆண்டை பின்னணியாகக் கொண்ட இந்த படம், மரண தண்டனைக் கைதியின் வாழ்க்கையில் நடைபெறும் ஒரு இரவை மையமாகக் கொண்டு உருவாக்கப்பட்டுள்ளது. படத்தின் சில முக்கிய அம்சங்களை திட்டமிட்டு ரகசியமாக வைத்துள்ளோம்; அவை வெளியீட்டுக்குப் பிறகு வெளிப்படுத்தப்படும்” என்றார்.

மேலும், நடிகர்கள் மற்றும் தொழில்நுட்பக் கலைஞர்கள் அனைவரும் முழுமையான அர்ப்பணிப்புடன் பணியாற்றியதாகவும், படப்பிடிப்பு திட்டமிட்டதை விட இரண்டு நாட்கள் முன்னதாகவே நிறைவடைந்ததாகவும் அவர் தெரிவித்தார்.

பிரத்யேக காட்சிசார் சுருக்கம் மற்றும் கதாபாத்திர அறிமுகம் ஊடகங்களின் பாராட்டைப் பெற்ற நிலையில், ‘லட்சுமிகாந்தன் கொலை வழக்கு’ திரைப்படம் ஜூன் 25-ஆம் தேதி வெளியாகவுள்ளதால் ரசிகர்கள் மத்தியில் பெரும் எதிர்பார்ப்பு நிலவுகிறது.