ரஜினியுடன் கதை விவாதம்: அஸ்வத் மாரிமுத்து பகிர்ந்த சுவாரசியமான அனுபவம்!

‘டிராகன்’ பட இயக்குநர் அஸ்வத் மாரிமுத்து ரஜினிகாந்துடன் தனது கதை விவாத அனுபவத்தை ஒரு பேட்டியில் வெளிப்படுத்தியுள்ளார்.

ரஜினிகாந்தின் 173வது படம் (தலைவர் 173) தற்போது சிபி சக்கரவர்த்தி இயக்கத்தில் ராஜ்கமல் நிறுவனம் தயாரிக்க உள்ளது. இதற்கு முன்பு பல இயக்குநர்கள் ரஜினியிடம் கதை சொல்லிய நிலையில், அஸ்வத் மாரிமுத்துவும் அந்தப் பட்டியலில் இடம்பெற்றிருந்தார்.

அஸ்வத் மாரிமுத்து பேட்டியில் கூறியதாவது:

“சிம்பு படத்துக்காக (STR 51) கதை எழுதிக் கொண்டிருந்தபோது, ஒரு கட்டத்தில் கதையை நகர்த்த முடியாமல் நின்றுவிட்டது. அப்போது வேறொரு திரைக்கதையில் பணியாற்றத் தொடங்கினேன். அப்போதுதான் கமல் சார் நிறுவனம் மூலமாக ரஜினி சார் நடிக்கும் படத்திற்கான கதை பற்றி பேசினார்கள்.

ரஜினி சாரை சந்தித்து கதையைச் சொன்னேன். அவர் இடைவேளை வரை கேட்டுவிட்டு முழுமையாக ஒன்றிவிட்டார். மதிய உணவு சாப்பிடுவதை மறந்துவிட்டு இருவரும் 2 மணி நேரம் வரை தொடர்ந்து பேசினோம்.

இந்தத் திரைக்கதை மிகவும் சிறப்பாக இருப்பதாக ரஜினி சார் தெரிவித்தார். மேலும், வில்லன் கதாபாத்திரத்தில் யாரை நடிக்க வைக்கலாம் என்று கூட விவாதித்தார்.

அப்படம் கிட்டத்தட்ட உறுதியான நிலையில் இருந்தும், சில சூழ்நிலைகளால் கைகூடவில்லை. ஆனால் அந்தக் கதையை ரஜினி சார் அல்லது கமல் சாருடன் இணைந்து நிச்சயம் உருவாக்குவேன்.

‘டிராகன்’ படத்துக்குப் பிறகு ரஜினி சாரை 4 முறை சந்தித்துப் பேசியிருக்கிறேன்” என்று அஸ்வத் மாரிமுத்து தெரிவித்துள்ளார்.

ரஜினி ரசிகர்கள் மத்தியில் இந்தச் செய்தி பெரும் ஆர்வத்தை ஏற்படுத்தியுள்ளது. தலைவர் 173 படத்தின் முதற்கட்டப் பணிகள் தீவிரமாக நடைபெற்று வருகின்றன.