விக்கல்ஸ்’ விக்ரமின் லைட் வெயிட் பேபி படப்பிடிப்பு நிறைவு!
ஸ்டாண்ட்-அப் காமெடியனும், ‘பிக்பாஸ்’ நிகழ்ச்சி மூலம் பிரபலமானவருமான விக்கல்ஸ் விக்ரம் கதாநாயகனாக அறிமுகமாகும் ‘லைட் வெயிட் பேபி’ திரைப்படத்தின் படப்பிடிப்பு நிறைவடைந்துள்ளது.
ஃபிட்னஸ் ஸ்பெஷலிஸ்ட் ஆரத்தி கிருஷ்ணா கதாநாயகியாக நடிக்கும் இப்படத்தின் 45 நாள் படப்பிடிப்பு சென்னை, பெங்களூரு மற்றும் மைசூர் ஆகிய நகரங்களில் நான்கு கட்டங்களாக நடைபெற்றது. தற்போது படக்குழுவினர் படப்பிடிப்புக்கு பிந்தைய பணிகளில் கவனம் செலுத்தி வருகின்றனர்.
உடற்பயிற்சி மற்றும் பாடி பில்டிங் உலகத்தை பின்னணியாகக் கொண்ட இப்படம், காதல், குடும்பம், எதிர்பார்ப்புகள் மற்றும் தனிப்பட்ட லட்சியங்களுக்கு இடையேயான மோதல்களை மையமாகக் கொண்ட ரொமான்டிக் என்டர்டெய்னராக உருவாகியுள்ளது. நகைச்சுவை, உணர்வுப்பூர்வமான தருணங்கள் மற்றும் விறுவிறுப்பான போட்டிகள் என அனைத்து அம்சங்களும் கலந்த திரைக்கதையாக இப்படம் உருவாகியுள்ளது.
இப்படத்தின் மூலம் விக்கல்ஸ் விக்ரம் கதாநாயகனாக அறிமுகமாகிறார். நடிப்புடன் படத்திற்கான வசனங்களையும் அவரே எழுதியுள்ளார். அவருக்கு ஜோடியாக ஃபிட்னஸ் மற்றும் பாடி பில்டிங் துறையில் பிரபலமான ஆரத்தி கிருஷ்ணா நடிக்கிறார். இது அவரது அறிமுக திரைப்படமாகும். மாறுபட்ட பின்னணியைச் சேர்ந்த இருவரும் முதன்முறையாக இணைந்திருப்பது படத்தின் மீதான எதிர்பார்ப்பை அதிகரித்துள்ளது.
‘லைட் வெயிட் பேபி’ படத்தை கே.சி. குரு எழுதி இயக்குகிறார். ஹிதா ஸ்டுடியோஸ் தயாரிக்கும் இப்படத்தில் சாகரா சந்தேஷ் இணை தயாரிப்பாளராக பணியாற்றுகிறார்.
படப்பிடிப்பு நிறைவடைந்தது குறித்து இயக்குநர் கே.சி. குரு கூறுகையில், “கடந்த 45 நாட்களும் அற்புதமான பயணமாக அமைந்தன. ஒவ்வொரு நகரமும் படத்திற்கு தனித்துவமான சிறப்பை சேர்த்துள்ளது. வெவ்வேறு உலகங்களைச் சேர்ந்த இருவரை மையமாகக் கொண்டு தொடங்கிய கதை, தற்போது நாங்கள் பெருமைப்படும் படைப்பாக உருவாகியுள்ளது. படப்பிடிப்பு முடிந்தாலும், படத்தொகுப்பு அறையில் மற்றொரு உற்சாகமான கட்டம் தொடங்கியுள்ளது” என்றார்.
விக்கல்ஸ் விக்ரம் கூறுகையில், “முதன்முறையாக கதாநாயகனாக நடித்தது மிகவும் உற்சாகமான அனுபவமாக இருந்தது. அதே நேரத்தில் வசனங்களையும் எழுதும் வாய்ப்பு கிடைத்தது இந்தப் பயணத்தை மேலும் சிறப்பாக்கியது. ரசிகர்களுக்கு இது மகிழ்ச்சியான, மனதிற்கு நெருக்கமான பொழுதுபோக்கு படமாக இருக்கும்” என தெரிவித்துள்ளார்.
ஆரத்தி கிருஷ்ணா, “ஃபிட்னஸ் எனக்கு உடல் ரீதியான சவால்களை வழங்கியிருந்தாலும், நடிப்பு முற்றிலும் புதிய உணர்வுப்பூர்வமான சவாலை அளித்தது. இந்தக் கதாபாத்திரத்தின் மூலம் என்னுள் இருந்த மற்றொரு பரிமாணத்தை கண்டறிந்தேன். எனது முதல் திரைப்படத்தை மறக்க முடியாத அனுபவமாக மாற்றிய படக்குழுவினருக்கு நன்றி” எனக் கூறியுள்ளார்.
பிரமோத் கொட்டியன் ஒளிப்பதிவு செய்ய, சர்வனா சுப்பிரமணியம் இசையமைக்கிறார். ஹரிஷ் கொம்மே படத்தொகுப்பை கவனிக்கிறார். சங்கரகௌடா கலை இயக்குநராக பணியாற்றுகிறார்.
‘லைட் வெயிட் பேபி’ திரைப்படத்தின் ஃபர்ஸ்ட் லுக் ஆகஸ்ட் மாதத்தின் இரண்டாவது வாரத்தில் வெளியாகும் என அறிவிக்கப்பட்டுள்ளது. இப்படம் இந்த ஆண்டு இறுதியில் திரையரங்குகளில் வெளியாகும் என எதிர்பார்க்கப்படுகிறது.
