7.5% இட ஒதுக்கீட்டால் மாணவர்கள் மத்தியில் மருத்துவ கனவு நிச்சயம் நனவாகும் என்ற நம்பிக்கை எழுந்துள்ளது. இதனை உறுதி செய்யும் விதமாக அரசு அளிக்கும் நீட் தேர்வு பயிற்சியில் பங்கேற்க விரும்பும் மாணவர்கள் எண்ணிக்கை இரு மடங்காக உயர்ந்துள்ளது.
Tamilnadu Govt Move on MBBS Sheet Allocation : தமிழகத்தில் தற்போது முதல்வர் எடப்பாடி பழனிசாமி தலைமயிலான அதிமுக அரசு துரிதமாக செயலாற்றி வருகிறது. மக்களுக்கு என்ன தேவை என்பதை அறிந்து அவைகளை பூர்த்தி செய்து வருகிறது. சமீபத்தில் கூட அரசு பள்ளி மாணவர்களுக்காக மருத்துவ படிப்பில் 7.5% உள் ஒதுக்கீட்டை அறிவித்திருந்தது.
MBBS சேர்க்கைகளில் அரசு பள்ளி மாணவர்களுக்கு 7.5% இடஒதுக்கீடு என்ற அரசாணை அமல்படுத்தப்பட்டதைத் தொடர்ந்து, அரசால் வழங்கப்படும் தேசிய தகுதி-நுழைவுத் தேர்வு (நீட்) பயிற்சிக்கு விண்ணப்பித்துள்ள மாணவர்களின் எண்ணிக்கை கடந்த ஆண்டை விட இரு மடங்காக அதிகரித்துள்ளது.
கடந்த ஆண்டு நீட் பயிற்சிக்காக அரசு மற்றும் உதவி பெறும் பள்ளிகளைச் சேர்ந்த 8,132 மாணவர்கள், இந்த ஆண்டு இதுவரை சுமார் 16,000 மாணவர்கள் பயிற்சிக்கு பதிவு செய்துள்ளனர். கடந்த வாரம் வரை சுமார் 9,000 பேர் பதிவு செய்துள்ள நிலையில், கடந்த சில நாட்களில் ஆன்லைன் பதிவுகள் அதிகரித்துள்ளன என்று வட்டாரங்கள் தெரிவித்தன.
நீட் பயிற்சிக்கு சேரும் மாணவர்களின் எண்ணிக்கை இந்த ஆண்டு 25,000 ஐ எட்டக்கூடும் என்று பள்ளி கல்வித் துறை அதிகாரி ஒருவர் தெரிவித்துள்ளார். அரசு மற்றும் உதவி பெறும் பள்ளிகளில் இருந்து நீட் 2020 தேர்வெழுதிய 6,692 மாணவர்களில், அரசுப் பள்ளிகளைச் சேர்ந்த 747 மாணவர்கள் உட்பட 1,633 மாணவர்கள் தேர்வில் தேர்ச்சி பெற்றனர்.
இந்த ஆண்டு, பள்ளி கல்வித் துறை நவம்பர் 1 முதல் மாணவர்களுக்கு ஆன்லைன் நீட் பயிற்சியைத் தொடங்க திட்டமிட்டிருந்தது. இருப்பினும், நவம்பர் 16 முதல் பன்னிரெண்டாம் வகுப்பு வரையிலான பள்ளிகளை மீண்டும் திறக்க முடிவு செய்ததைத் தொடர்ந்து, பயிற்சியில் ஆன்லைன் மற்றும் ஆஃப்லைன் வகுப்புகள் இரண்டையும் உள்ளடக்கியிருக்கலாம் என்று வட்டாரங்கள் தெரிவித்தன. ஆன்லைன் பயிற்சி அடுத்த வாரம் தொடங்கும் என்று எதிர்பார்க்கப்படுகிறது.
அரசு பள்ளி தலைமை ஆசிரியர் ஒருவர், பன்னிரெண்டாம் வகுப்பு மாணவர்களுக்கு நீட் பயிற்சி அளிக்க வேண்டும் என்றார். “நீட் தேர்வில் பெரும்பாலான கேள்விகள் 11-ம் வகுப்பு மற்றும் 12-ம் வகுப்பிலிருந்து வந்தன. நாங்கள் இரண்டு வருட பயிற்சி அளித்தால், பல மாணவர்கள் எம்.பி.பி.எஸ்ஸில் சேரலாம், மருத்துவக் கல்லூரிகளில் தனி ஒதுக்கீட்டில் நுழையும் மாணவர்களும் இது உதவியாக இருக்கும் என கூறியுள்ளார்.
