‘எஸ்டிஆர்-49’ படம் குறித்து, தயாரிப்பாளர் தாணு அப்டேட்ஸ்: ரசிகர்கள் அதிருப்தி..

தயாரிப்பாளர் கலைப்புலி எஸ். தாணு கடந்த வாரம் எஸ்டிஆர் 49 ப்ரொமோ வரும் 4-ந்தேதி வெளியாகும் என எக்ஸ் தளத்தில் அதிகாரப்பூர்வமாக அறிவித்தார். அதோடு இந்த முன்னோட்ட வீடியோவுக்காக சிம்பு டப்பிங் செய்த புகைப்படம் ஒன்றையும் வெளியிட்டிருந்தார்.

இதனால், ரசிகர்கள் பெரும் எதிர்பார்ப்புடன் காத்திருப்பில் இருந்தனர். இந்நிலையில் வெற்றிமாறன், சிம்பு படத்துக்கான ப்ரொமோ குறித்து புதிய தகவல் ஒன்றை வெளியிட்டுள்ளார் தயாரிப்பாளர் தாணு.

இது தொடர்பாக அவர் பகிர்ந்துள்ள எக்ஸ் தள பதிவில், ‘சிம்பு ரசிகர்களின் அன்பு வேண்டுகோளுக்கு இணங்க எஸ்டிஆர், வெற்றிமாறன் படத்துடைய முன்னோட்டம் திரையரங்கு மற்றும் சமூக வலைத்தளங்களில் ஒரே நேரத்தில் வெளியிடுவது, இத்தனை நாள் ரசிகர்களுடைய பொறுமைக்கு ஈடுசெய்யும் நிகழ்வாக அமையும்.

ஆகையால், சென்சார் பணிகள் நிறைவடைந்து, உங்கள் கண்முன்னே அந்த மாபெரும் முன்னோட்டம் விரைவில் வெளிவர இருக்கிறது. இதுவே எஸ்டிஆர், வெற்றிமாறன் கூட்டணி மீது ரசிகர்கள் வைத்துள்ள அன்பிற்கும் நம்பிக்கைக்கும் எங்களின் நன்றியை தெரிவிக்கும் சிறப்பு தருணமாகும். இனி ஆட்டம் பாட்டம் கொண்டாட்டம். இவ்வாறு தனது பதிவில் தெரிவித்துள்ளார் தயாரிப்பாளர் தாணு.

அவருடைய இந்த பதிவின் மூலமாக இன்று எஸ்டிஆர் 49 ப்ரொமோ வெளியாக வாய்ப்பில்லை என கூறப்படுகிறது. சென்சார் முடிந்த பிறகு தான் இந்த முன்னோட்ட வீடியோ வெளியாகும் என எதிர்ப்பார்க்கப்படுகிறது. இதனால், இன்று ப்ரொமோ வெளியாகும் என ஆசையாக காத்திருந்த சிம்பு ரசிகர்கள் கடும் அதிருப்தி அடைந்துள்ளனர். இதனையடுத்து தீபாவளிக்கு எஸ்டிஆர் 49 முன்னோட்ட வீடியோ வெளியாக வாய்ப்பிருப்பதாக சினிமா வட்டாரங்கள் தெரிவிக்கின்றன.

தீபாவளி பண்டிகை முன்னோட்ட வீடியோவை ரிலீஸ் செய்வதற்கு சரியான தருணமாக அமையும் எனவும் கூறப்படுகிறது. சிம்பு கடைசியாக மணிரத்னம் இயக்கத்தில் வெளியான ‘தக் லைஃப்’ படத்தில் கமலுடன் இணைந்து அமர் என்ற முக்கியமான ரோலில் நடித்திருந்தார். இப்படத்தில் எஸ்டிஆரின் நடிப்பு பாராட்டுக்களை குவித்திருந்தாலும், தக் லைஃப் பெரியளவில் ரசிகர்களை கவரவில்லை.

தனுஷ் நடிப்பில் வெளியாகி பெரும் வரவேற்பினை பெற்ற ‘வடசென்னை’ உலகில் நடப்பதை போன்று எஸ்டிஆர் 49 உருவாக இருக்கிறது. இந்த தகவலை இயக்குனர் வெற்றிமாறனும் உறுதி செய்துள்ளார். இந்த படத்தில் சிம்பு கேங்ஸ்டராக நடிக்க இருப்பதாக கூறப்படும் நிலையில், அவர் புதிய லுக்கிற்கும் மாறியுள்ளார்.