கட்டா குஸ்தி 3 வரலாம்! – 50வது நாள் விழாவில் விஷ்ணு விஷால் கொடுத்த அப்டேட்!

வேல்ஸ் ஃபிலிம் இன்டர்நேஷனல் மற்றும் விஷ்ணு விஷால் ஸ்டூடியோஸ் இணைந்து தயாரித்துள்ள ‘கட்டா குஸ்தி 2’ திரைப்படம், வெளியாகி 50 நாட்களைக் கடந்து திரையரங்குகளில் வெற்றிகரமாக ஓடி வருகிறது. விஷ்ணு விஷால் மற்றும் ஐஸ்வர்யா லட்சுமி நடிப்பில், இயக்குநர் செல்லா அய்யாவு இயக்கத்தில் உருவான இப்படம், முதல் பாகத்தின் வெற்றியைத் தொடர்ந்து உருவாக்கப்பட்டது.

படத்தின் 50வது நாள் வெற்றியை கொண்டாடும் வகையில் படக்குழு சார்பில் சிறப்பு வெற்றி விழா மற்றும் நன்றி அறிவிப்பு நிகழ்ச்சி நடைபெற்றது. இதில் படக்குழுவினர் பத்திரிகை மற்றும் ஊடக நண்பர்களை நேரில் சந்தித்து, படத்திற்கு தொடர்ந்து அளித்து வரும் ஆதரவுக்கு நன்றி தெரிவித்தனர்.

மேலும், படத்தின் வெற்றிக்காக உழைத்த நடிகர்கள், நடிகைகள் மற்றும் தொழில்நுட்பக் கலைஞர்களை கௌரவிக்கும் விதமாக அவர்களுக்கு நினைவுப் பரிசுகள் மற்றும் பதக்கங்கள் வழங்கப்பட்டன. நிகழ்ச்சியில் படக்குழுவினர் தங்களது படப்பிடிப்பு அனுபவங்களையும், வெற்றிப் பயணத்தையும் பகிர்ந்து கொண்டனர்.

இயக்குநர் செல்லா அய்யாவு

நிகழ்ச்சியில் பேசிய இயக்குநர் செல்லா அய்யாவு, கடந்த ஆண்டு செப்டம்பர் 2ஆம் தேதி படத்திற்கு பூஜை போட்டு படப்பிடிப்பைத் தொடங்கியதாகவும், தற்போது படம் 50 நாட்களைக் கடந்து வெற்றிகரமாக ஓடுவது மிகுந்த மகிழ்ச்சி அளிப்பதாகவும் தெரிவித்தார்.

தற்போதைய சூழலில் ஒரு படம் வெளியாகி 50 நாட்கள் திரையரங்குகளில் ஓடுவது மிகப்பெரிய விஷயம் என்று குறிப்பிட்ட அவர், இந்த வெற்றியை வழங்கிய ரசிகர்களுக்கும், படத்தை மக்களிடம் கொண்டு சேர்த்த ஊடக நண்பர்களுக்கும் நன்றி தெரிவித்தார்.

மேலும், உதவி இயக்குநராக இருந்த காலத்தில் கிடைத்த வெற்றிக்கான நினைவுப் பரிசை இன்றளவும் பாதுகாத்து வருவதாகவும், தற்போது இயக்குநராக தான் உருவாக்கிய திரைப்படம் 50 நாட்கள் ஓடி மீண்டும் ஒரு வெற்றிக்கான நினைவுப் பரிசைப் பெறுவது தனக்கு மிகவும் உணர்வுபூர்வமான தருணம் என்றும் கூறினார்.

படத்தின் தொடக்கம் முதல் வெளியீடு மற்றும் விளம்பரப் பணிகள் வரை விஷ்ணு விஷால் முழுமையான ஈடுபாட்டுடன் செயல்பட்டதாகவும், ஒரு நடிகராக மட்டுமல்லாமல் தயாரிப்பாளராகவும் படத்தின் வெற்றிக்காக கடுமையாக உழைத்ததாகவும் செல்லா அய்யாவு தெரிவித்தார்.

தயாரிப்பாளர் ஐசரி கே. கணேஷ்

தயாரிப்பாளர் ஐசரி கே. கணேஷ் பேசுகையில், ‘கட்டா குஸ்தி 2’ படத்தின் 50வது நாள் விழாவில் படத்தில் பணியாற்றிய நடிகர்கள் மற்றும் தொழில்நுட்பக் கலைஞர்களை கௌரவிப்பதில் மகிழ்ச்சி அளிப்பதாக தெரிவித்தார்.

ஒரு காலத்தில் திரைப்படங்கள் 100, 175, 200 நாட்கள் ஓடியதை வெற்றியாகக் கொண்டாடிய நிலையில், தற்போதைய சூழலில் ஒரு படம் சில நாட்கள் திரையரங்குகளில் ஓடுவதற்கே சவாலான நிலை இருப்பதாகக் குறிப்பிட்டார். அத்தகைய சூழலில் ‘கட்டா குஸ்தி 2’ 50 நாட்களைக் கடந்துள்ளது மிகப்பெரிய சாதனை என்றும் கூறினார்.

இந்த வெற்றிக்காக விஷ்ணு விஷால் மிகுந்த அர்ப்பணிப்புடன் உழைத்ததாகவும், இயக்குநர் செல்லா அய்யாவுவின் பங்களிப்பும் முக்கியமானதாக இருந்ததாகவும் அவர் பாராட்டினார்.

விஷ்ணு விஷால்

நடிகரும் தயாரிப்பாளருமான விஷ்ணு விஷால் பேசுகையில், ரசிகர்கள்தான் ஒரு திரைப்படத்தின் வெற்றியை தீர்மானிக்கும் முக்கிய சக்தி என்றும், ‘கட்டா குஸ்தி’ படத்திற்கு ரசிகர்கள் அளித்த அன்பே இந்த வெற்றிக்கு காரணம் என்றும் தெரிவித்தார்.

மேலும், படத்திற்கு ஆதரவளித்த ஊடக நண்பர்களுக்கும், தனது திரைப்பயணத்தில் தொடர்ந்து ஆதரவு அளித்து வருபவர்களுக்கும் நன்றி தெரிவித்தார்.

நடிகை ரம்யா கிருஷ்ணன் சிறப்புத் தோற்றத்தில் நடித்ததற்கும் நன்றி தெரிவித்த விஷ்ணு விஷால், முதலில் 15 நிமிட சிறப்புத் தோற்றம் என்று கூறியபோதும், தனது மீதான அன்பால் அவர் கதாபாத்திரத்தை ஏற்றுக்கொண்டதாக தெரிவித்தார்.

படத்தில் ஜாரா கதாபாத்திரத்தில் நடித்த குழந்தை நட்சத்திரத்திற்கும் ரசிகர்கள் அளித்த வரவேற்பை அவர் பாராட்டினார். இயக்குநர் செல்லா அய்யாவுடன் தொடர்ந்து பணியாற்ற விரும்புவதாகவும், குடும்ப ரசிகர்களை திரையரங்குகளுக்கு அழைத்து வரும் வகையிலான படங்களை அவர் தொடர்ந்து உருவாக்க வேண்டும் என்றும் தெரிவித்தார்.

மேலும், ‘கட்டா குஸ்தி 3’ படத்திற்கான எதிர்பார்ப்பையும் அவர் வெளிப்படுத்தினார்.

ஐஸ்வர்யா லட்சுமி

நடிகை ஐஸ்வர்யா லட்சுமி பேசுகையில், ‘கட்டா குஸ்தி’ படத்தின் கீர்த்தி கதாபாத்திரத்திற்கு கிடைத்த வரவேற்பு தனக்கு மிகவும் சிறப்பானது என்றும், அந்தக் கதாபாத்திரத்தின் மூலம் ரசிகர்களிடம் பெற்ற அன்பை எப்போதும் மறக்க முடியாது என்றும் தெரிவித்தார்.

விஷ்ணு விஷால் ஒரு சிறந்த சக நடிகராகவும், தயாரிப்பாளராகவும் தன்னை கவர்ந்ததாக குறிப்பிட்ட அவர், இயக்குநர் செல்லா அய்யாவு மற்றும் தயாரிப்பாளர் குஷ்மிதா கணேஷ் ஆகியோருக்கும் நன்றி தெரிவித்தார்.

ரம்யா கிருஷ்ணன்

நடிகை ரம்யா கிருஷ்ணன், நீண்ட நாட்களுக்குப் பிறகு இதுபோன்ற ஒரு வெற்றி விழாவில் கலந்து கொள்வது மகிழ்ச்சியாக இருப்பதாக தெரிவித்தார். முதல் பாகத்தை விட இரண்டாம் பாகம் சிறப்பாக அமைய வேண்டும் என்ற எதிர்பார்ப்பு தனக்கு இருந்ததாகவும், படக்குழுவினர் அதை சிறப்பாக செய்துள்ளதாகவும் பாராட்டினார்.

மேலும், இயக்குநர் செல்லா அய்யாவுவின் எழுத்தில் இயல்பாகவே நகைச்சுவை கலந்திருப்பதாகவும், இந்தப் படத்தில் பணியாற்றியது மகிழ்ச்சியான அனுபவமாக இருந்ததாகவும் தெரிவித்தார்.

பிரபுதேவா

நடன இயக்குநரும் நடிகருமான பத்மஸ்ரீ பிரபுதேவா, வெளிநாட்டு நிகழ்ச்சிகளை முடித்துவிட்டு சென்னை வந்த உடனேயே இந்த விழாவில் கலந்து கொண்டார். விஷ்ணு விஷாலுடன் தனக்கு நெருக்கமான உறவு இருப்பதாகக் குறிப்பிட்ட அவர், ஒவ்வொரு படத்திற்கும் அவர் 200 சதவீத அர்ப்பணிப்புடன் உழைத்து வருவதாக பாராட்டினார்.

இரண்டாம் பாகத்தையும் வெற்றிப் படமாக மாற்றிய இயக்குநர் செல்லா அய்யாவுவுக்கு வாழ்த்து தெரிவித்த அவர், படக்குழுவினர் அனைவரும் தொடர்ந்து பல வெற்றிகளைப் பெற வேண்டும் என்று கூறினார்.

அமைச்சர் ராஜ்மோகன்

நிகழ்ச்சியில் கலந்து கொண்ட அமைச்சர் ராஜ்மோகன், ‘கட்டா குஸ்தி 2’ 50 நாட்களைக் கடந்து ஓடுவது இன்றைய காலகட்டத்தில் மிகப்பெரிய சாதனை என்று பாராட்டினார்.

விஷ்ணு விஷால், ஐஸ்வர்யா லட்சுமி, ஜாரா உள்ளிட்ட நடிகர்களின் பங்களிப்பையும், படத்தின் பின்னணியில் பணியாற்றிய தொழில்நுட்பக் கலைஞர்களின் உழைப்பையும் அவர் பாராட்டினார்.

மேலும், இசையமைப்பாளர் ஷான் ரோல்டன், ஒளிப்பதிவாளர், எடிட்டர், ஸ்டண்ட் குழுவினர் உள்ளிட்ட அனைவரின் உழைப்பும் படத்தின் வெற்றிக்கு முக்கிய காரணமாக அமைந்துள்ளதாக தெரிவித்தார்.

மோக்ஷா மற்றும் யோகி பாபு

நடிகை மோக்ஷா பேசுகையில், ‘மீனாட்சி’ கதாபாத்திரத்திற்கு ரசிகர்கள் அளித்த வரவேற்பு தனக்கு மிகப்பெரிய மகிழ்ச்சியை அளித்துள்ளதாக தெரிவித்தார். ஓடிடி வெளியீட்டுக்குப் பிறகு பிற மொழி ரசிகர்களும் அந்தக் கதாபாத்திரத்தை அடையாளம் கண்டு பாராட்டுவது மகிழ்ச்சி அளிப்பதாக கூறினார்.

நடிகர் யோகி பாபு, 50வது நாள் வெற்றி விழா நடத்துவது தற்போது மிகவும் அரிதாகிவிட்ட நிலையில், படக்குழுவினரை கௌரவிக்கும் வகையில் இந்த விழா நடத்தப்படுவது மகிழ்ச்சி அளிப்பதாக தெரிவித்தார். மேலும், ‘கட்டா குஸ்தி 3’ உருவாகும் வாய்ப்பை ஏற்படுத்தும் வகையில் இரண்டாம் பாகத்தின் இறுதியில் இடம்பெற்றுள்ள வசனத்தையும் அவர் குறிப்பிட்டார்.

ஓடிடியிலும் வரவேற்பு

‘கட்டா குஸ்தி 2’ திரைப்படம் திரையரங்கு வெளியீட்டைத் தொடர்ந்து ஓடிடியிலும் வெளியாகி ரசிகர்களிடம் நல்ல வரவேற்பைப் பெற்றுள்ளது. குறிப்பாக ஓடிடி வெளியீட்டுக்குப் பிறகு இந்திய அளவில் டாப் 10 பட்டியலில் படம் இடம்பெற்றிருப்பதாக படக்குழு தெரிவித்துள்ளது.

முதல் பாகத்தைப் போலவே இரண்டாம் பாகத்திற்கும் ரசிகர்களிடம் கிடைத்த வரவேற்பு படக்குழுவினருக்கு உற்சாகத்தை அளித்துள்ளது. சுப்ரா, ஆர்யன் ரமேஷ் மற்றும் இஷான் சக்சேனா ஆகியோர் இணை தயாரிப்பாளர்களாக பணியாற்றியுள்ள இப்படத்தின் 50வது நாள் வெற்றி விழா, படத்திற்காக உழைத்த ஒட்டுமொத்த குழுவினரையும் கௌரவிக்கும் வகையில் சிறப்பாக நடைபெற்றது.