அல்லு அர்ஜுன்: அட்லி – சன் பிக்சர்ஸ் கூட்டணியின் மிரட்டலான ஃபர்ஸ்ட் லுக் வெளியீடு!

தென்னிந்தியத் திரையுலகின் ‘ஸ்டைலிஷ் ஸ்டார்’ அல்லு அர்ஜுனின் பிறந்தநாளை முன்னிட்டு, ரசிகர்கள் ஆவலோடு எதிர்பார்த்த அட்லி – அல்லு அர்ஜுன் கூட்டணியின் புதிய பட அறிவிப்பு வெளியாகியுள்ளது. சன் பிக்சர்ஸ் நிறுவனம் மிகப்பிரம்மாண்டமான பொருட்செலவில் தயாரிக்கும் இந்தப் படத்திற்கு ‘ராக்கா’ (Raaka) எனத் தலைப்பிடப்பட்டுள்ளது. இன்று வெளியான இப்படத்தின் ஃபர்ஸ்ட் லுக் போஸ்டர், அல்லு அர்ஜுனை இதுவரை பார்த்திராத முற்றிலும் வித்தியாசமான ஒரு கெட்டப்பில் காட்டி ரசிகர்களை வியப்பில் ஆழ்த்தியுள்ளது.

மும்பையில் உள்ள ஸ்டூடியோக்களில் ரகசியமாக நடைபெற்று வரும் இப்படத்தின் படப்பிடிப்பில், அல்லு அர்ஜுன் பல விதமான தோற்றங்களில் நடித்து வருவதாகக் கூறப்படுகிறது. இதன் காரணமாகப் படத்தின் கதைக்களம் குறித்த தகவல்களைப் படக்குழு அதீத ரகசியமாக வைத்துள்ளது. இப்படத்திற்கு அட்லியின் ஆஸ்தான ஒளிப்பதிவாளர் ஜி.கே. விஷ்ணு ஒளிப்பதிவு செய்கிறார். இசையமைப்பாளராக இளம் இசைக்கலைஞர் சாய் அபயங்கர் பணிபுரிந்து வருவதாகத் தகவல்கள் கசிந்துள்ள போதிலும், படக்குழு இன்னும் அதிகாரப்பூர்வமாக உறுதிப்படுத்தவில்லை.

இப்படத்தில் பாலிவுட் நட்சத்திரம் தீபிகா படுகோன் நாயகியாக நடிப்பதை மட்டும் படக்குழு தற்போது உறுதி செய்துள்ளது. இவர்களுடன் இன்னும் பல முன்னணி நாயகிகள் இப்படத்தில் இணைந்துள்ளதாகத் தெரிகிறது. அல்லு அர்ஜுனின் பிறந்தநாளை ஒட்டி சமூக வலைதளங்களில் #Raaka மற்றும் #AlluArjun ஆகிய ஹேஷ்டேக்குகள் ட்ரெண்டாகி வருகின்றன. திரையுலகைச் சேர்ந்த பல பிரபலங்களும் தொழில்நுட்பக் கலைஞர்களும் அவருக்குத் தங்களது வாழ்த்துக்களைத் தெரிவித்து வருகின்றனர்.