அஜித் நடித்த ‘விடாமுயற்சி’ படத்திற்கு 5 இடங்களில் கத்திரி; சென்ஸார் ஆக்‌ஷன்..

‘விடாமுயற்சி’ திரைப்படத்திற்கு சென்ஸார் சான்றிதழ் கிடைத்து விட்டது. இது பற்றிய விவரம் காண்போம்..

மகிழ் திருமேனி இயக்கத்தில், ‘தல’ அஜித் நடித்த ‘விடாமுயற்சி’ படத்தில் திரிஷா மற்றும் யோகிபாபு, ரெஜினா கசெண்ட்ரா, அர்ஜுன், ஆரவ் ஆகியோர் நடித்துள்ளனர். இப்படத்தின் படப்பிடிப்பு முடிந்து அனிருத்தின் பின்னணி இசைப் பணி நடைபெற்று வருகிறது.

இப்படம், கடந்த 1997-ம் ஆண்டு ஹாலிவுட்டில் வெளிவந்த ‘பிரேக்டவுன்’ படத்தை தழுவி எடுக்கப்பட்டு உள்ளது.

படத்தின் கதைப்படி வெளிநாட்டுக்கு கணவன், மனைவி இருவரும் சுற்றுலா செல்கின்றனர். அப்போது, எதிர்பாராத விதமாக மனைவி காணாமல் போய்விடுகிறார். அவரை கணவர் எப்படி மீட்டார் என்பது தான் கதைக்களம். இப்படம், பிப்ரவரி முதல் வாரத்தில் ரிலீஸாகும் என எதிர்பார்க்கப்படுகிறது.

தற்போது, இப்படத்தின் சென்சார் சர்டிபிகேட் மற்றும் ரன்னிங் டைம் குறித்த தகவல் வெளியாகி இருக்கிறது.

அதன்படி, படத்தில் 5 இடங்களில் வரும் கெட்ட வார்த்தைகளுக்கு கத்திரி போட்டுள்ளது சென்சார் போர்டு. அதுமட்டுமின்றி, அதிகப்படியான ஆக்‌ஷன் காட்சிகள் இருப்பதன் காரணமாக இப்படத்திற்கு யு/ஏ சான்றிதழ் வழங்கப்பட்டு இருக்கிறது. மேலும், இப்படம் 2 மணிநேரம் 30 நிமிடம் 46 விநாடிகள் ரன்னிங் டைம் கொண்டுள்ளதும் அந்த சென்சார் சான்றிதழில் குறிப்பிடப்பட்டுள்ளது.

படம், சென்சார் செய்யப்பட்டு விட்டதால், விரைவில் ரிலீஸ் தேதி அதிகாரப்பூர்வமாக அறிவிக்கப்பட உள்ளது. ‘தல’ படம் ரிலீஸ் ஆவதிலும் விடாமுயற்சி தான்.!