ஸ்கெட்ச் திரை விமர்சனம்

January 12, 2018


வெற்றிப்படத்தயாரிப்பாளர் "கலைப்புலி " எஸ்.தாணுவின் "வி கிரியேஷன்ஸ்" வழங்க மூவிங் பிரேம் தயாரிப்பில், விக்ரம், தமன்னா, சூரி, ஆர்.கே.சுரேஷ், அருள்தாஸ், மலையாள நடிகர் ஹரீஷ், ஸ்ரீமன், "கபாலி" விஷ்வாந்த், பாபுராஜா, வினோத், வேல ராமமூர்த்தி உள்ளிட்ட நட்சத்திர பட்டாளங்கள் நடிக்க சுகுமாரின் ஒளிப்பதிவில், எஸ்.எஸ்.தமனின் இசையில், விஜய் சந்தர் கதை, திரைக்கதை, வசனம் எழுதி இயக்கவும் செய்திருக்கும் திரைப்படம் தான் "ஸ்கெட்ச். "

கதைப்படி, வாகனங்களுக்கு பைனான்ஸ் செய்யும், சேட்டிடம் பைனான்ஸ் பெற்று வண்டி வாங்கிவிட்டு, டியூ கட்டாதவர்களின் வாகனங்களை தன் நண்பர்களுடன் ஸ்கெட்ச் போட்டு தூக்கும் வேலை பார்க்கிறார் ஸ்கெட்ச்.

விக்ரம் அவர் ஸ்கெட்ச் போட்டால் யாருடைய வண்டியையும் திட்டம் போட்டபடி லாவகமாக தூக்குவதில் படுகெட்டிக்காரர் அந்த குணமே, விக்ரமுக்கு தமன்னாவுடனான ஒரு அழகிய காதலையும், நண்டு சிண்டுகள் தொடங்கி, ராயபுரம் தாதா வரை நிறைய விரோதத்தையும் சம்பாதித்துக் கொடுக்கிறது.


sketch movie review




Sketch Movie Tamil Review


அந்த விரோதங்களை வெற்றி கொண்டு விக்ரம், தமன்னாவின் கரம் பிடித்தாரா? அல்லது, விரோதிகளால் வீழ்த்தப்பட்டாரா...? என்பது தான் "ஸ்கெட்ச்" படத்தின் கரு, கதை, களம், காட்சிப்படுத்தல்...எல்லாம்! ஹீரோ ஸ்கெட்ச்சாக புது லுக்கில் பழைய லூட்டி விக்ரமை பார்க்க முடிவது ரசிகர்களுக்கு கிடைத்த பெரும் பொங்கல் போனஸ்.

"சந்தர்ப்பம் சூழ்நிலை நேரம் இது 3ம் தான் ஒரு மனுஷனை மொத்தமா மாத்துது...." என அவர் பேசும் முதல் பன்ச்சில் தொடங்கி ஸ்கெட்ச், ஸ்கெட்ச் பண்ணா ஸ்கெட்ச் மிஸ் ஆகாது, அப்படியே மிஸ் ஆனா மட்டும் சொல்லு பிசிறே இல்லாமல் செய்து முடிக்கிறேன்......" என அடிக்கடி, "பன்ச் " அடிப்பதில் தொடர்ந்து "பசங்க புக்க தூக்கற வயசுல புக்கதூக்கணும்" என குழந்தை தொழிலாளர் கள் கூடாது என இறுதி காட்சியில் "பன்ச் "அடிப்பது வரை, சகலத்திலும் சக்கை போடு போட்டிருக்கிறார். வெல்டன் விக்ரம்!

கதாநாயகி தமன்னா, வெள்ளைக்காரிக்கு சேலை கட்டியது மாதிரி படம் முழுக்க சேலையில் வந்து விக்ரமை மட்டுமின்றி ரசிகர்களையும் பெரிதாக டிஸ்டர்ப் செய்கிறார். சூரி பர்ஸ்ட் ஆப்பில் ஒரு சீனிலும், செகன்ட் ஆப்பில் ஹீரோவுக்கு உதவும் நான்கைந்து சீனிலும் வந்து காணாமல் போகிறார்.


Sketch Movie English Review


நாயகரின் எதிராளியாக ஆர்.கே.சுரேஷ், நாயகரின் மாமா வாக அருள்தாஸ், பைனான்ஸ் சேட்டாக மலையாள நடிகர் ஹரீஷ், நாயகரின் நண்பர்கள் ஸ்ரீமன், "கபாலி" விஷ்வாந்த். பாபுராஜா, வினோத், நாயகரின் அப்பா வேல ராமமூர்த்தி நாயகியின் தோழி ப்ரியங்கா, சூரியின் ஜோடி மதுமிதா உள்ளிட்ட நட்சத்திர பட்டாளம் தங்கள் கேரக்டருக்கு பக்காவாக வலு சேர்த்திருக்கின்றனர்.

சுகுமாரின் ஒளிப்பதிவில், பெரிய அளவில் ஒளி ஜீவனாக இருப்பது படத்திற்கு பெரும் பலம் எஸ்.எஸ்.தமனின் இசையில், "சூ...சூ...ஷோக்கா....", "ஸ்கெட்சு போட்டான்....", "கனவே கனவே...", "வானம் தூறாமலே....", " எந்தன் மெளனங்கள்...." உள்ளிட்ட பாடல்கள் படத்திற்கு பெரிய ப்ளஸ்.

விஜய் சந்தரின் கதை, திரைக்கதை, வசனம் இயக்கத்தில், ஒரு சில லாஜிக் மீறல்கள் மேஜிக் காட்சிகள் படம் முழுக்க இடம் பெற்றிருந்தாலும், குழந்தை தொழிலாளர்கள் கூடாது....எனும் இறுதி மெஸேஜிற்காக "ஸ்கெட்ச்." படத்தைக் கொண்டாடலாம்!

ஆக மொத்தத்தில் "ஸ்கெட்ச்' '- தமிழ் சினிமாவுக்கு தற்போதைய சூழலில் மிகவும் தேவையான கமர்ஷியல் கலர்புல் 'பிட்ச்!"

Rating: 3/5