பியார் பிரேமா காதல் - திரை விமர்சனம்

August 11, 2018


"பிக் பாஸ்" புகழ் ஹரிஷ் கல்யாண் - ரெய்சா ஜோடி நடிக்க இளன் இயக்கத்தில், இசைஞர் யுவன் சங்கர் ராஜா இசை மற்றும் தயாரிப்பில் வெளிவந்திருக்கும் படம் தான் "பியார் பிரேமா காதல்."


பியார் பிரேமா காதல் - திரை விமர்சனம்




Pyaar Prema Kaadhal Movie Review


கதைப்படி, ஸ்ரீகுமார்-ஹரிஷ் கல்யாணும், சிந்துஜா - ரெய்சாவும் ஒரே அலுவலகத்தில் வேலை பார்க்கின்றனர். ஹரிஷ்க்கு முதன்முதலாக ரெய்சாவை கண்டதுமே காதல். ஆனால், ரெய்சாவுக்கு காதல் கத்திரிக்காய் எல்லாம் பிடிக்காது... எடுத்த எடுப்பிலேயே ஹரிஷ் கல்யாணுடன் செக்ஸில் ஈடுபடும் ரெய்சா, அதன் பிறகு ப்ரண்ட்ஷிப்பாய் இருக்கலாம என்கிறார். அதை ஏற்க மறுக்கும் ஹரிஷ், தான் ரெய்சா வை காதலிப்பதாக திரும்ப திரும்பக் கூற, நோ, நோ... ப்ரண்ட்ஷிப் எனும் ரெய்சா ஒரு கட்டத்தில் ஹரீஷின் காதலுக்கு ஓ.கே சொல்லி தனக்கு ஒருலட்சியம் இருப்பதால், கல்யாணம் பற்றி பேசவே கூடாது.... லிவிங் டூ கெதர் ஜோடியாக ஒரே வீட்டில் இருவரும் வாழலாம்... என்கிறார்.

அதற்கு, ஓ.கே சொல்லும் ஹரிஷ், ரெய்சாவுடன் சேர்ந்து ஒரே வீட்டில் தன் வீட்டிற்கு தெரியாமல் வாழ ஆரம்பிக்கிறார். ஒரு கட்டத்தில் உடல் நிலை முடியாத தன் தாய்க்காக திருமணம் செய்து கொள்ள முடிவெடுக்கும், ஹரிஷ், ரெய்சா வை திருமணத்திற்கு சம்மதிக்கும் படி கேட்கிறார். அதற்கு தன் ஹோட்டல் லட்சியத்தை சொல்லி திருமணத்திற்கு ரெய்சா மறுக்க, வேறு ஒரு பெண்ணை ஹரிஷ் திருமணம் செய்து கொள்ள, ரெய்சா, தன் எல்லை பகுதியில் ஹோட்டல் வைக்க வேண்டும்... எனும் லட்சியத்தில் மூழ்குகிறார்.

இருவரும் தங்கள் காதலை மறந்து விரும்பிய வாழ்க்கையை விரும்பியபடி வாழ்ந்தார்களா? மீண்டும் சந்தித்தனரா? இல்லையா..? என்பது தான் "பியார் பிரேமா காதல்" படத்தின் வித்தியாசமும், நவீனமுமான கரு, கதை, களம்... எல்லாம்.


Pyaar Prema Kaadhal English Review


கதாநாயகர் ஸ்ரீகுமாராக - ஹரிஷ் கல்யாண், காதல், காதல்.... இல்லையேல் சாதல்.... எனும் நடுத்தர குடும்பத்து விடலை பையனாக புகுந்து விளையாடியிருக்கிறார் பேஷ், பேஷ்.

"உனக்கு என்னை விட உன் ட்ரீம் தான் முக்கியமா? உனக்கு என்னை விட உங்க அம்மாதான் முக்கியமா?" என ஹரிஷும், ரெய்சாவும் அடித்து கொள்ளும் இடங்களில் ஹரிஷ் அதகளம் செய்திருக்கிறார். பலே!


கதாநாயகி சிந்துஜா - ரெய்சா அல்ட்ரா மார்டன் பெண்ணாக செக்ஸ் ஒ.கே, லவ், மேரேஜ் எல்லாம் செட் ஆகாது.... என வாழும் அடமன்ட் கேரக்டரில் அசத்தியிருக்கிறார். அதிலும், ரெய்சா, "உன் ஒர்த் அவளுக்கு சத்தியமா தெரியலைடா..." என ஹீரோவுக்கு சர்ட்டிபிகேட் கொடுக்கும் இடத்தில் தியேட்டர் கைதட்டலில் அதிர்கிறது. வாரே வா.

ரெய்சாவின் அப்பாவாக டான்ஸ்டீச்சராக ஆனந்த பாபு ரொம்ப நாளைக்கு அப்புறம் வெயிட்டான பாத்திரத்தில் வாழ்த்திருக்கிறார். அதிலும், "ஆனா தெரிந்தே பண்ற தப்புக்கு இன்னொரு வாய்ப்பு கிடைக்காது..... நான் உன் அம்மாவை தொலைத்த மாதிரி நீ உன் ஸ்ரீயை தொலைத்துடாதே.. "என மகளுக்கு அட்வைஸுக்கும் இடங்களில் பொறுப்பான அப்பாவாக ஆனந்த பாபு பொளந்து கட்டியிருக்கிறார். சபாஷ்.

ஹரிஷின் அம்மாவாக "கடலோரக் கவிதைகள்" ரேகா, அப்பா "ராஜா ராணி' பாண்டியன், பாஸ் பஞ்சு சுப்பு, தங்கராஜ் - முனிஸ்காந்த், சதிஷ் - தீப்ஸ் உள்ளிட்டவர்கள் பாத்திரமறிந்து பளிச்சிட்டிருக்கின்றனர். அதிலும், "ஒரே மாதிரி பேசுறவளை நம்பலாம்... ஒரு மாதிரி பேசுற வளை நம்பவேக்கூடாது... " எனும் முனிஸ்காந்த் பக்கா "பளிச்!"

மணிக்குமாரன் சங்கராவின் படத்தொகுப்பு, பலே பலே தொகுப்பு. ராஜா பட்டாச்சார்யாவின் ஒளிப்பதிவு ஒளிவு மறைவு இல்லா ஒவியப்பதிவு.. "சிக்கி சிக்கி நெஞ்சில் சிக்கி...", "கண்ணே நீ அழ...", "ஹை ஆன் லவ்...", சர்பரைஸ் மீ .." , "ஹலோ.. ", "இட்ஸ் ஓவர்...", "மிஸ் யூ பாப்பா..." உள்ளிட்ட ஒரு டஜன் பாடல்களும், யுவன் சங்கர் ராஜாவின் பின்னணி இசையும், இந்த காதல் படத்தை காவியப் படமாக்க முயற்சித்துள்ளன. பாராட்டுக்கள்.

ஆரம்பத்தில், காதல், கல்யாணம், என வலியுறுத்திய ஹீரோ லிவிங் டூ கெதர் லைப்புக்கு மாறத் துடிப்பதும், லிவிங் டூ கெதர் லைப் தான் வசதி என வாழ்ந்த நாயகி, இறுதியில் திருமண வாழ்க்கையை தேர்ந் தெடுக்க விரும்புவதையும் அழகாக படம் பிடித்துக் காட்டி அதன் மூலம் சில, பல மெஸேஜுக்களையும் சொல்லியிருப்பதில் இயக்குனர் இளன் ஜெயித்திருக்கிறார்.

"எனக்கு தொண்டை சரியில்ல..... எங்கப்பா வீட்ல இல்ல.... மெடிக்கல் ஷாப்ல ஒரு விக்ஸ் வாங்கிட்டு உனக்கு ஏதாவது தேவைப்பட்டால் வாங்கிட்டு வந்துடு..." என ஹீரோவை "அது" க்கு அழைக்கும் ஹீரோயின், வாயிலாக இயக்குனர் இளம் ரசிகர்களை தியேட்டருக்கு அழைப்பதில் மேலும் ஜெயித்திருக்கிறார்.

அதே மாதிரி, அடிக்கடி வரும். "லிப் டு லிப்" முத்தக்காட்சிகள், படுக்கையறை காட்சிகள் போன்றவற்றைக் கூட விரசம் இல்லாமல் பொயட்டிக்காக காட்டியிருப்பது "பியார் பிரேமா காதல்" படத்தின் பெரும் பலம்.

மேலும, " இப்பல்லாம்" ஸ்கூல் பீஸ் கட்டுறதுக்காகவே தனியா சம்பாதிக்கணும் போல...", "குழந்தையோட லைப் பத்தி யோசிக்காமல் குழந்தை பெத்துக்கக் கூடாது...." உள்ளிட்ட வசனங் களிலும் திரும்பி பார்க்க வைக்கிறார் இயக்குனர் இளன். வாவ்.. கீப் இட் அப்டைரக்டர் சார்!

மொத்தத்தில், நிச்சயம், "பியார் பிரேமா காதல்' - 'இன்றைய இளசுகளுக்கு பிடிக்கும் காதல் !"

Rating: 3/5