பைரவா - திரைவிமர்சனம்

January 12, 2017



kalakkalcinema.com



bairavaa



                                                  பைரவா – திரைவிமர்சனம்


விஜயா புரொடக்ஷன்ஸ் பேனரில் பி வெங்கட்ராம ரெட்டி வழங்க பாரதி ரெட்டி தயாரிப்பில், விஜய் ஜோடியாக கீர்த்தி சுரேஷ் நடிக்க, இவர்களுடன் காமெடி சதீஷ், ஜெகபதி பாபு, சரத் லோகித்தாஸ், டேனியல் பாலாஜி, ஸ்ரீமன், ஹரீஷ் உத்தமன், ஆடுகளம் நரேன், தம்பி ராமைய்யா, மாரிமுத்து, சண்முகராஜன், 'அண்ணி' மாளவிகா... ஆகிய இன்னும் பல பிரபல நட்சத்திரங்கள் பங்கேற்க, பிரபல இயக்குனர் பரதனின் எழுத்து, இயக்கத்தில், தைப் பொங்களுக்கு இரண்டு தினங்கள் முன்னதாகவே திரைக்கு வந்திருக்கும் படமே "பைரவா".


கல்லூரியில் படிக்க வரும் மாணவனுக்கும், பாடம் நடத்தும் ஆசிரியருக்கும் இது மாதிரி தகுதி எல்லாம் வேண்டும். எனும் நம் கல்வி முறையில், கல்லூரி மற்றும் பல்கலை கழகத்தை யார் வேண்டுமானாலும் நடத்தி கல்வி தந்தை ஆவதையும், கல்வி வள்ளல் ஆவதையும் துணிந்து சாடியிருப்பதுதான் இப்படமையக்கரு!


கதைப்படி, ஒய்.ஜி.மகேந்திரா மேனேஜராக பணிபுரியும் தனியார் வங்கியில், வராத கடன் தொகையை வசூலித்து கொடுப்பவராக பணிபுரிந்து வருகிறார் விஜய். இவருடன் அதே வங்கி சார்பில் வேலை பார்க்கும் சதீஷும் தங்கி இருக்கிறார். ஒய்.ஜி.மகேந்திராவின் பரிந்துரையின் பேரில் வங்கியில் வாங்கிய ரூ.64 லட்சம் பணத்தை மைம் கோபி அந்த பணத்தை திருப்பிக்கொடுக்க முடியாது என்று அவரை ஏமாற்றி விடுகிறார்.


இதனால், ஒய்.ஜி.மகேந்திரனுக்கு பெரிய சிக்கல் ஏற்படுகிறது. அவரது மகளின் திருமணமும், இச்சமயம் நடக்கவுள்ளதால், இந்த பிரச்சினைக்கு தீர்வு காண விஜய்யின் உதவியை நாடுகிறார். ஒய்.ஜி.விஜய்யும், மைம் கோபியை அடித்து துவம்சம் செய்து ஒய்.ஜி.மகேந்திரனுக்கு வரவேண்டிய பணத்தை மீட்டு கொடுக்கிறார். அதனால், ஒய்.ஜி.மகேந்திரனின் மகள் திருமணம் நடக்கிறது.


C0LUpgdUUAA2dZA


அந்த திருமணத்திற்கு மணப்பெண்ணின் தோழியான கீர்த்தி சுரேஷ் திருநெல்வேலியிலிருந்து சென்னைக்கு வருகிறார். கீர்த்தி சுரேஷை பார்த்ததும் அவள்மீது காதல் வயப்படுகிறார் விஜய். பின்னர், அவரையே சுற்றி வருகிறார். திருமணம் முடிந்து, கீர்த்தி சுரேஷ் ஊருக்கு திரும்பும் நேரத்தில், கோயம்பேடு பேருந்து நிலையத்தில் வைத்து தனது காதலை வெளிப்படுத்த நினைக்கிறார் விஜய். ஆனால், அப்போது கீர்த்தி சுரேஷை ரவுடி கும்பல் ஒன்று தீர்த்துக்கட்ட வருகிறது. பின்னர், ஒரு டெலிபோன் அழைப்பு வந்ததும், அந்த ரவுடி கும்பல் கீர்த்தி சுரேஷை ஒன்றும் செய்யாமல் விட்டுவிட்டு சென்றுவிடுகிறது.


இதைப் பார்க்கும் விஜய், அந்த ரவுடி கும்பலுக்கும் கீர்த்தி சுரேஷுக்கும் என்ன சம்பந்தம் என்று அவரிடமே கேட்கிறார். அப்போது, கீர்த்தி சுரேஷ் தான் திருநெல்வேலியில் மருத்துவ கல்லூரியில் படித்து வருவதாகவும், தன்னுடன் படித்து வந்த சக தோழியான அபர்ணா வினோத்தை கல்லூரியின் முதல்வரான ஜெகபதி பாபு ஆட்களை வைத்து கொலை செய்துவிட்டு, அப்பெண் தவறான பெண் என பழியை சுமத்தி விட்டதாகவும் கூறுகிறாள்.


மேலும், இந்த கொலை சம்பந்தமாக ஜெகபதி பாபு மீது தான் வழக்கு தொடர்ந்திருப்பதால் எனக்கும், என்னுடைய குடும்பத்துக்கும் ஜெகபதி பாபுவால் தொடர்ந்து அச்சுறுத்தல் இருந்து வருவதாகவும் தன், போலீஸ் தந்தை ஆடுகளம் நரேனை, ஜெகபதி பாபு கொன்று விட்டதாகவும் கூறுகிறார். இதைக்கேட்ட விஜய், ஜெகபதி பாபுவின் ஆட்டத்துக்கு முடிவு கட்டும் முயற்சியில் களமிறங்குகிறார். இதிலும், நாயகியுடனான காதலிலும் விஜய் வெற்றி பெற்றாரா? இல்லையா? என்பதே பைரவா படத்தின் மொத்தக்கதையும்.


விஜய் இப்படத்தில் அறிமுகமாகும் அந்த சைக்கிள் காட்சியே மிகப்பெரிய மாஸாக உள்ளது. அதே மாதிரி முதல் ஆக்ஷன் காட்சியில் மைம் கோபியின் ஆட்களை, கோபி பாணியிலேயே கிரிக்கெட் விளையாடி துவம்சம் செய்யும் காட்சிகளில் எல்லாம் தியேட்டரில் ரசிகர்களின் ஆர்ப்பாட்டம் மூச்சு முட்டுகிறது. கீர்த்தி சுரேஷிடம் விஜய் காதல் செய்யும ஆரம்ப காட்சிகளும், அவருடன் லூட்டி அடிக்கும் காட்சிகளும் நச் - டச்.


அதே போன்று, வில்லன் ஜெகபதி பாபுவிடம் விஜய், சென்னையில் இருந்தபடி போனில், "கசப்புக் கடையில ஆடு வெட்ட ஆரம்பிச்சு, காசுக்காக ஆளவெட்டி கல்லூரி ஆரம்பிச்சு, கல்வி தந்தை, கல்வி வள்ளல்லுன்னு உனக்கு நீயே பேரை போட்டுக்கிட்டு... " பண்ற கூத்தெல்லாம் தெரியும். என்ன உனக்கு யாருன்னு தெரியுமா...? எனக் கேட்டு ஜெகபதி பாபுவுக்கு விஜய் தான் யார் என்பதை அறிமுகம் செய்து கொள்ளும் காட்சியிலிருந்து, ஜெகபதி பாபு கொடுக்கும் ஒவ்வொரு இடையூறுகளையும் தகர்ந்தெறிந்து செல்லும் காட்சிகளில் எல்லாம் விஜய், செம மாஸ் காட்டியிருக்கிறார். படு இளமையான தோற்றம், ஸ்டைலான நடிப்பு, பக்கா வசனங்கள், அதிரடியான சண்டைக் காட்சிகள் என விஜய், பைரவா வாக வழக்கம் போலவே வாழ்ந்திருக்கிறார்.


கதாநாயகியாக திருநெல்வேலிபாஷை பேசியபடி, கீர்த்தி சுரேஷ் படம் முழுக்க அழகியாக, காந்தாரக்கள்ளியாக வலம் வந்திருக்கிறார். விஜய்யை கீர்த்தி சந்திக்கும் முதல் சந்திப்பிலேயே. விஜய்யுடன் கீர்த்தியை பார்க்கும் ரவுடிகள், டிராபிக் போலீஸ்... உள்ளிட்ட எல்லோரும் அண்ணி, அண்ணி... என விஜய்யின் ஜோடியாக அழைக்க டென்ஷன் ஆகும் கீர்த்தி சுரேஷ் ஒரு பொறுக்கி பூதமும், ஒரு போலீஸ் பூதமும்... சொன்னதால நான் அண்ணியும் கிடையாது, நீ அண்ணனும் கிடையாது... என குதிக்கும் இடங்கள் சுவாரஸ்யம்.


அதே மாதிரி, ‘பாப்பா பாப்பா’ பாடலில் விஜய்யுக்கு இணையாக ஆட்டம் போட்டு கலக்கியிருக்கிறார். அந்த பாடலில் இவருடைய முக பாவணைகள் எல்லாம் மிக அழகாக இருக்கிறது.


காமெடி சதீஷ், செம அலப்பறை. "நம்ம அப்பன் ஏழையா இருந்தா அது விதி... மாமனார் ஏழையா இருந்தா அது நமக்கு நாமே பண்ணிக்கிற சதி... அதனால பணக்கார பெண்ணா பார்த்து செட்டில் ஆயிடுணும்... அதுதான் மதி... "என்றபடி காமெடி பண்ணும் சதீஷ் ,முன் பாதி படத்தை தூக்கி நிறுத்துகிறார்.


வில்லன்களாக வரும் ஜெகபதி பாபு, டேனியல் பாலாஜி இருவரும் வில்லத்தனத்தில் மிரட்டுகிறார்கள். ஜெகபதி பாபுவுக்கு இப்படத்தில் கதையை தாங்கிச் செல்லும் கனமான கதாபாத்திரம். அதை உணர்ந்து சிறப்பாக நடித்திருக்கிறார். டேனியல் பாலாஜியும் தன் பங்குக்கு சிறப்பான நடிப்பை வெளிப்படுத்தியிருக்கிறார். அவர் தன் மனைவி மீது வைத்திருக்கும் பிரியம் வில்லன்கள் நெஞ்சிலும் ஈரம் உண்டென காட்டும் படி படமாக்கப்பட்டுள்ளது. பலே. மற்றபடி, தம்பி ராமையா, ஸ்ரீமன், நான் கடவுள் ராஜேந்திரன் என நகைச்சுவை நட்சத்திர பட்டாளம் இருந்தாலும், படத்தில் பெரிதாக காமெடி எடுபடவில்லை.


அதேபோன்று ஒய்.ஜி.மகேந்திரனுக்கும் பேராசிரியர் மாரிமுத்து, வக்கில் சண்முகராஜன், மினிஸ்டராக வரும் சரத் லோகித்தாஸ் உள்ளிட்டவர்களுக்கு இன்னும் கொஞ்சம் வாய்ப்பு கொடுத்திருக்கலாம். பாவம் கீர்த்தியின் அக்காவாகவும், தோழியாகவும் வரும் அபர்ணா வினோத், சிஜா ரோஸ் இருவரும் ஒருசில காட்சிகளே வந்தாலும் யார் என கேட்க வைக்கிறார்கள் சபாஷ்!


அனல் அரசுவின் சண்டைக் காட்சிகள் மிரட்டல். சண்டைகள் ஒவ்வொன்றும் செமயாய் ரசிக்கும் படியாகவும் அமைந்திருக்கிறது. சுகுமாரின் ஒளிப்பதிவும், கலர்புல்லாக இருக்கிறது. சுகுமாரின் ஒளிப்பதிவில் சண்டைக்காட்சிகளில் தனித்துவம் தெரிகிறது. பிரவின் கே.எல்லின் படத்தொகுப்பு, படத்திற்கு இன்னும் கொஞ்சம் கத்திரி போட்டிருக்கலாமோ? என அடிக்கடி யோசிக்க வைக்கிறது.


சந்தோஷ் நாராயணனின் இசையில் "பட்டையைக் கிளப்பு, குட்டையைக் குழப்பு......", "மஞ்சள் மேகம் என் மஞ்சள் மேகம்..", "பாப்பா பாப்பா பப்பரப்பா..." உள்ளிட்ட பாடல் காட்சிகளும் பின்னணி இசையும் சிறப்பாய் செவிசாய்க்க வைக்கின்றன. அதே மாதிரி அதே மாதிரி, சந்தோஷ் இசையில், விஜய் வரும் காட்சிகளில் "யார் ரா யார் ரா.? இவன் ஊரைக் கேட் டா தெரியும்.. "என்னும் பின்னணி பீட்டும் மிரட்டல்.


bairavaa-vijay-images


விஜய் என்ற மாஸ் ஹீரோவை வைத்துக்கொண்டு, பரதனின் வசனங்கள்தான் படத்திற்கு பெரிய பலமாக அமைந்துள்ளது. "ஒருத்தன் டைமிங்கை மட்டும் சரியா கிப் அப பண்ணிட்டான்னா அவன் தனக்கு டைம் சரியில்லைன்னு சொல்ல வேண்டிய அவசியமே இருக்காது", "நேர்மையான அதிகாரிகள் ளாம் தற்கொலை பண்ணிட்டு சாகறதும் அதுக்கு காரணமானவங்க சந்தோஷமாதிரியறுதும், இன்னைக்கு சர்வ சாதாரணமா சகஜம் அயிடுச்சுல்ல..." ,"சேமிச்ச உணவு பழசு ,பிரிட்ஜ் ல வச்சு சாப்பிடற மாதிரி ... வேட்டையாடி சாப்பிடுறது தான் பிரஷ்ஷா இருக்கும்... " என்பது உள்ளிட்ட "பன்ச்" டயலாக்குகள் விஜய் ரசிகர்களை பெரிதாக திருப்திபடுத்தும் பலமாகும்! அதே மாதிரி, பன்ச் டயலாக்குகள் மட்டுமில்லாமல், சாதாரண வசனங்களிலும் ஒரு பன்ச் இருப்பது சிறப்பு.


மூன்று மணி நேரத்திற்கு கிட்டத்தட்ட பத்து நிமிடம் கம்மியான படத்தின் பெரு நீளம் பெரும் பலவீனம். அதே மாதிரி, படத்திற்கு தேவையில்லாத காட்சிகள் ஆங்காங்கே இருப்பது படத்தின் வேகத்திற்கு தடை போடுகிறது. என்பதும் பலவீனம்.


தனது எழுத்து, இயக்கத்தில் இயக்குனர் பரதன், நாட்டுக்கு முக்கியமானது கல்வியும், மருத்துவம். அந்த மருத்துவத்தையும் மருத்துவ கல்வியையும் சொல்லிக் கொடுக்கக்கூடிய கல்வி நிறுவனங்கள் தகுதியான நபர்களிடம் இல்லை? என்பதை சுட்டிக்காட்டும்படியான படமாக இப்படத்தை உருவாக்கியிருக்கிறார்.


ஆனாலும், "கிளாஸ் ரூம்ல வச்சு குழந்தை எப்படி பிறக்கும்னு பச்சை தமிழ்ல சொல்லு என மெடிக்கல் கல்லூரி மாணவி கீர்த்தியிடம் பேராசிரியர் மாரிமுத்து கேட்பதும், அதையே விஜய், புதுக்கல்யாணம் ஆன அவர் மகளிடம் கேட்க சொல்லி விஜய் போன் போட்டு கொடுத்து கலங்கடிப்பதும் படு விரசமாக வும் ரொம்பவே சினிமாட்டிக்காகவும் இருக்கிறது.


அதே மாதிரி கீர்த்தியின் அக்கா புருஷன் கம் இன்ஸ்பெக்டரான ஹரீஷ் உத்தமன், அயோக்கியராக இருந்து திருந்துவது.. அவரை ஆம்பளையே இல்லை... என அவர் மனைவியே சொல்வது உள்ளிட்ட காட்சி களில் இயக்குனர் ரொம்பவே கோட்டை விட்டிருப்பதும், இன்கம்டாக்ஸ் ரெய்டு அதிகாரியாக விஜய் அவதாரம் எடுப்பதும், வில்லன் ஜெகபதி பாணியிலேயே விஜய், வில்லனை சொல்லி சொல்லி அடிப்பதும் நிறைய படங்களில் பார்த்து சலித்த, தவித்த காட்சிகள் என்பதால் பைரவா ரொம்பவே போரா இருக்கிறது.


அதே மாதிரி, படத்தின் பெரும்பாலான காட்சியமைப்புகள் விஜய்யை மட்டுமே நம்பி காட்சிப்படுத்தப்பட்டுள்ளது பலவீனம், மேலும், "இன்னைக்கு நிறைய பேருகிட்ட இல்லாத ஒரு கெட்ட பழக்கம் என்கிட்டே இருக்கு... அது சொன்னா, சொன்ன வார்த்தையை காப்பாத்தறது... ", என்றும், இப்படத்தில் சிறப்பு, மிகச்சிறப்பு என்றபடி விஜய், அடிக்கடி கூறுவதும் காட்சிப்படுத்தப்பட்டுள்ள விதம், ஆரம்பத்தில் ரசிக்கும் படி இருந்தாலும், ஒரு கட்டத்திற்கு மேல் போரடிக்கிறது.


ஆனாலும், அதே நேரம், விஜய் என்ட்ரி, கீர்த்தி அறிமுகம், ஜெகபதி பாபு ப்ளாஷ்பேக் உள்ளிட்டவை காட்சிப்படுத்தப்பட்டுள்ள விதம் சூப்பர் ப் எனும் வகையில் விஜய் ரசிகர்களுக்கு இந்த படம் திருப்தியை கொடுக்கும் என்றாலும். படத்திற்கு தேவையில்லாத காட்சிகள் ஆங்காங்கே அதிகம் இருப்பது படத்தின் வேகத்திற்கு தடை போடுகிறது. அந்த காட்சிகளை கொஞ்சம் நீக்கிவிட்டு பார்த்தால் ஒரு வேளை இப்படம் எல்லா தரப்பு ரசிகர்களுக்கும் விறுவிறுப்பாக இருக்கலாம் எனலாம்.


மொத்தத்தில், '‘பைரவா’ விஜய் ரசிகர்களுக்கு 'ஜோரா'கவும்.. பிற ரசிகர்களுக்கு கொஞ்சம் 'போரா' கவும் தெரிகிறது!"


Star-2.75